ELOBELI TITRE YA EZIPELI | OYO OKOKI KOSALA SOKI MPASI EKWELI YO
Kobungisa biloko ya kobikela
Mokolo ya 11/03/2011 mabele eninganaki makasi na Japon, ebomaki bato koleka 15 000 mpe mosolo ya badolare koleka miliare 200 ya badolare ebimaki mpo na likambo yango. Lokola bakebisaki ye ete tsunami ekosalema, Kei mobali moko ya mbula 32 akendaki komibomba likoló ya ngomba moko ya molai mpenza. Alobi boye: “Na ntɔngɔ oyo elandaki, nazongaki na ndako mpo na kozwa oyo nakokaki kozwa, kasi nyonso ekendaki na mbu, ata mpe ndako na ngai. Kaka fondasyo nde etikalaki.
“Esɛngaki mwa ntango mpo nandima mpenza ete nabungisaki kaka biloko na ngai te kasi mpe kartye na ngai mobimba. Motuka, ordinatɛrɛ oyo nazalaki kosalela na mosala, bamesa, bakiti, divan oyo nazalaki koyamba bapaya, clavier, gitare, ukulélé, piololo, bisaleli nazalaki kopakola na yango langi, mafuta, mpe pastels; mayemi mpe bililingi na ngai nyonso ekendaki na mai.”
SOKI MPASI EKWELI YO
Tyá miso na biloko oyo ozali na yango kasi te na oyo obungisi. Biblia elobi boye: “Ata soki moto azali na biloko mingi, biloko na ye ekopesa ye bomoi te.” (Luka 12:15) Kei akanisi lisusu likambo oyo akutanaki na yango; alobi boye: “Na ebandeli, nasalaki liste ya biloko oyo nazalaki na yango mposa, kasi yango ezongisaki na makanisi na ngai biloko nyonso oyo ekendaki na mai. Nazwaki ekateli ya kotya na liste na ngai kaka biloko oyo nazalaki mpenza na mposa na yango, mpe kobandela liste yango kaka soki bamposa na ngai ekokisami. Liste yango esalisaki ngai nabongisa lisusu bomoi na ngai.”
Na esika okóma komitungisa mingi, lobelá makambo oyo okutanaki na yango mpo na kobɔndisa basusu. Kei alobi boye: “Nazwaki lisungi mingi ezala epai ya Leta mpe epai ya baninga; kasi lokola namesanaki kozwa lisungi yango, nakómaki komona ete nasili valɛrɛ. Na nsima, nakanisaki maloba ya Biblia oyo ezali na Misala 20:35, oyo elobi ete ‘esengo ya kopesa eleki oyo ya kozwa.’ Lokola nazalaki na makoki mingi te mpo na kokabela basusu, namibongisaki mpo na kolendisa bato mosusu oyo likama ekwelaki bango na maloba na ngai. Kokabela basusu na ndenge wana esalisaki ngai mingi.”
Bondelá Nzambe apesa yo bwanya oyo ekosalisa yo olonga mikakatano na yo. Kei atyaki motema na elaka ya Biblia oyo elobi ete Nzambe ‘akoyoka libondeli ya baoyo biloko na bango nyonso epunzami.’ (Nzembo 102:17) Yo mpe okoki kosala bongo.
Oyebaki yango? Biblia esakoli ete ekozala na ntango oyo moto moko te akomitungisa mpo abungisi biloko na ye na makama lokola koningana ya mabele to mopɛpɛ makasi. *—Yisaya 65:21-23.
^ par. 9 Mpo na koyeba mokano ya Nzambe mpo na mabele, talá mokapo 3 ya buku Biblia eteyaka mpenza nini? ebimisami na Batatoli ya Yehova.
Talá mpe...
BIYANO NA MITUNA YA BIBLIA
Biblia elobi nini mpo na makama oyo ebimaka yango moko?
Ezali bitumbu ya Nzambe? Nzambe asalisaka baoyo bakutanaka na makama yango?
LINƆ́NGI YA MOSƐNZƐLI
Makama ekozala lisusu te!
Ekoki komonana lokola ete makama ekosila te, kasi Biblia epesi biso ntina ya kozala na elikya ete makambo ekobongwana, mosika te.
