LITEYA 03
Makambo oyo Biblia elobi ezali mpenza solo?
Biblia ezali na bilaka mingi mpe na batoli ebele. Ekoki kozala ete olukaka koyeba makambo oyo yango eteyaka, kasi mbala mosusu obangaka kondima likambo mbala moko. Osengeli mpenza kondimela bilaka mpe batoli ya buku wana ya kalakala? Makambo oyo Biblia elobi ekoki mpenza kosalisa biso tózala na bomoi ya malamu lelo? Tokoki mpenza kondima makambo oyo yango elobi mpo na mikolo ezali koya? Bato mingi bandimaka yango. Tótalela makambo oyo ekoki mpe kondimisa yo.
1. Masolo ya Biblia ezali mpenza solo?
Biblia elobi ete ezali na “maloba ya solo na bosikisiki.” (Mosakoli 12:10) Ebɛtaka masolo ya solo oyo elobelaka bato oyo bazalaki mpenza na bomoi. (Tángá Luka 1:3; 3:1, 2.) Bato mingi ya istware mpe baoyo balukalukaka biloko ya kala balobi ete badati, bato, bisika mpe makambo oyo Biblia elobeli ezali mpenza solo.
2. Mpo na nini Biblia esilaka ngala te?
Mbala mingi, Biblia elobeli makambo oyo eyebanaki te na ntango oyo yango ekomamaki. Na ndakisa elobeli makambo ya siansi. Ntango Biblia ekomamaki, bato mingi bazalaki kondima makambo yango te. Kasi, lelo bato ya mayele na makambo ya siansi bandimi ete makambo oyo Biblia elobi ezali solo. Makambo yango ‘esimbami malamu mpo na libela mpe mpo na seko.’—Nzembo 111:8.
3. Mpo na nini tosengeli kondima makambo oyo Biblia elobi mpo na mikolo ezali koya?
Biblia ezali na bisakweli * oyo elobeli “makambo oyo esalemi naino te.” (Yisaya 46:10) Elobelá makambo na bosikisiki liboso ete makambo yango esalema. Elobelá mpe na bosikisiki mpenza makambo oyo ezali kosalema na mokili lelo oyo. Na liteya oyo, tokolobela bisakweli mosusu ya Biblia. Komona ndenge ekokisamá ekamwisaka mpenza!
KƆTÁ NA MOZINDO
Luká koyeba ndenge siansi endimi makambo oyo Biblia elobi, mpe ndenge oyo bisakweli mosusu ya Biblia ekokisamaki.
4. Siansi endimi makambo oyo Biblia elobi
Na ntango ya kala, bato mingi bazalaki kondima ete mabele efandi likoló ya eloko moko boye. Talá VIDEO.
Talá makambo oyo mokanda ya Yobo elobaki eleki sikoyo bambula soki 3 500. Tángá Yobo 26:7, mpe na nsima yanolá na motuna oyo:
-
Mpo na nini koyeba ete mabele esimbami “na eloko moko te” ezali kokamwisa?
Kaka na bambula ya 1800 nde bato bayaki koyeba esika oyo mai ya mbula eutaka. Kasi, talá oyo Biblia elobaki eleki sikoyo bambula soki 3 500. Tángá Yobo 36:27, 28, mpe na nsima yanolá na mituna oyo:
-
Mpo na nini ndenge oyo Biblia elobeli esika oyo mai ya mbula eutaka ezali kokamwisa?
-
Bavɛrsɛ oyo outi kotánga ebakisi kondima na yo mpo na Biblia?
5. Biblia esakolá makambo ya ntina
Tángá Yisaya 44:27–45:2, mpe na nsima yanolá na motuna oyo:
-
Makambo nini Biblia esakolaki bambula 200 liboso ete Babilone ekwea?
Istware emonisi ete Siruse, mokonzi ya Perse, ná basoda na ye bakweisaki Babilone na mobu 539 L.T.B. * Balekisaki mai ya ebale oyo ezalaki kobatela engumba yango na nzela mosusu. Bakɔtaki na engumba na baporte oyo etikalaki ya kofungwama mpe bazwaki yango na pɛtɛɛ nyonso kozanga ete bábunda. Lelo oyo, nsima ya bambula koleka 2 500, Babilone etikalá mpamba. Sikoyo tótala makambo oyo Biblia esakolaki.
Tángá Yisaya 13:19, 20, mpe na nsima yanolá na motuna oyo:
-
Ndenge nini esakweli yango ekokisamaki?
Lelo na Irak, Babilone etikalá mpamba
6. Biblia esakolá makambo oyo ezali kosalema lelo
Biblia elobi ete tozali na “mikolo ya nsuka.” (2 Timote 3:1) Talá makambo oyo Biblia esakolaki ete ekosalema na mikolo ya nsuka.
Tángá Matai 24:6, 7, mpe na nsima yanolá na motuna oyo:
-
Biblia esakolaki ete makambo nini ekosalema na mikolo ya nsuka?
Tángá 2 Timote 3:1-5, mpe na nsima yanolá na mituna oyo:
-
Biblia esakolaki ete bizaleli nini bato bakozala na yango na mikolo ya nsuka?
-
Bizaleli nini ozali komona epai ya bato lelo oyo?
SOKI MOTO ALOBI NA YO: “Biblia ezali buku ya masapo.”
-
Nini endimisi yo mpenza ete okoki kotyela Biblia motema?
NA MOKUSE
Istware, siansi, mpe bisakweli emonisi ete okoki kotyela Biblia motema.
Bozongeli
-
Masolo ya Biblia ezali mpenza solo?
-
Wapi mwa makambo oyo Biblia elobi mpe siansi endimi yango?
-
Okanisi ete Biblia elobeli makambo oyo ekosalema na mikolo ezali koya? Mpo na nini?
MAKANISI MOSUSU
Ntango Biblia elobelaka makambo ya siansi, elobaka solo?
Makambo nini Biblia elobi mpo na “mikolo ya nsuka”?
“Bisakweli 6 ya Biblia oyo ozali komona kokokisama na yango” (Linɔ́ngi ya Mosɛnzɛli ya 01/05/2011)
Luká koyeba ndenge bisakweli ya Biblia oyo etali ampire ya Grɛsi ekokisamaki.
Talá ndenge bisakweli ya Biblia ebongolaki bomoi ya moto moko.
“Nazalaki kondima te ete Nzambe azali” (Linɔ́ngi ya Mosɛnzɛli No. 5 2017)
Talá mpe...
MITUNA OYO BATO BATUNAKA MINGI
Koyekola Biblia elimboli nini?
Na lisalisi ya boyekoli ya Biblia ya ofele oyo Batatoli ya Yehova bayekolaka bato, okoki kosalela libongoli ya Biblia oyo olingi. Koyoka nsɔni te mpo na kobengisa bato nyonso ya libota na yo to baninga na yo mpo básangana na boyekoli na yo.
