Yesu alobaki ete mokristo nyonso asengeli kozwa batisimo. (Tángá Matai 28:19, 20.) Kasi batisimo ezali nini? Moto asengeli kosala nini mpo azwa batisimo?

1. Batisimo ezali nini?

Liloba “kobatisa” euti na liloba moko ya Grɛki oyo elakisi “kozindisa” na mai. Ntango Yoane abatisaki Yesu, azindisaki ye mobimba na ebale Yordani, mpe na nsima Yesu “abimaki na mai.” (Marko 1:9, 10) Ndenge moko na Yesu, bakristo ya solo bazwaka batisimo, elingi koloba, bazindisaka bango nzoto mobimba na kati ya mai.

2. Ntango moto azwi batisimo amonisaka nini?

Ntango moto azwi batisimo, amonisaka ete amipesi mobimba epai ya Yehova Nzambe. Ndenge nini moto amipesaka? Liboso azwa batisimo, moto yango asalaka libondeli mpe ayebisaka Yehova ete alingi kosalela ye bomoi na ye mobimba. Alakaka Yehova ete akosambela kaka ye mpe akoluka libosoliboso kosala mokano ya Nzambe na bomoi na ye. Moto yango andimaka ‘komiboya mpe . . . akobaka kolanda’ mateya mpe ndakisa ya Yesu. (Matai 16:24) Soki moto amipesi mpe azwi batisimo, akokóma moninga ya Yehova mpe ya bato oyo basambelaka Yehova.

3. Moto asengeli kosala nini liboso azwa batisimo?

Liboso ozwa batisimo, osengeli koyekola makambo ya Yehova mpe kokóma na kondima makasi epai na ye. (Tángá Baebre 11:6.) Ntango ozali kokolisa boyebi na yo mpe kokómisa kondima na yo makasi, okolinga Yehova mingi. Yango ekopesa yo mposa ya kotosa mibeko na ye mpe ya koyebisa bato mosusu makambo etali ye. (2 Timote 4:2; 1 Yoane 5:3) Ntango moto azali ‘komitambwisa na ndenge oyo ebongi na Yehova mpe kosepelisa ye mpenza,’ akoki kopesa bomoi na ye epai ya Nzambe mpe kozwa batisimo.​—Bakolose 1:9, 10. a

 KƆTÁ NA MOZINDO

4. Tokoki kozwa mateya na batisimo ya Yesu

Tángá Matai 3:13-17 mpo na koyeba makambo mosusu etali batisimo ya Yesu. Mpe na nsima yanolá na mituna oyo:

• Yesu azalaki bebe ntango azwaki batisimo?

• Ndenge nini babatisaki ye? Basopelaki ye kaka mwa matangá ya mai na motó?

Nsima ya kozwa batisimo, Yesu abandaki mosala ya ntina mingi oyo Nzambe apesaki ye. Tángá Luka 3:21-23 mpe Yoane 6:38, mpe na nsima yanolá na motuna oyo:

• Nsima ya kozwa batisimo, mosala nini Yesu atyaki na esika ya liboso na bomoi na ye?

5. Okoki kozwa batisimo!

Okoki kobanga soki okanisi ete osengeli komipesa na Nzambe mpe kozwa batisimo. Kasi, soki okobi koyekola makambo mingi ya Yehova mpe oyebi ye malamumalamu, okotika kobanga mpe okozwa ekateli wana ya ntina mingi. Mpo na komona bato mosusu oyo basalaki bongo, talá VIDEO.

Tángá Yoane 17:3 mpe Yakobo 1:5, mpe na nsima yanolá na motuna oyo:

• Nini ekoki kosalisa moto amibongisa mpo na batisimo?

1. Tomipesaka epai ya Yehova ntango toyebisaka ye na libondeli ete tolingi kosalela ye bomoi na biso mobimba

2. Ntango tozali kozwa batisimo, tomonisaka epai ya bato oyo bazali kotala biso ete tomipesi epai ya Nzambe

 6. Ntango moto azwi batisimo, akɔtaka na libota ya Yehova

Ntango moto azwi batisimo, akɔtaka na libota moko ya mokili mobimba oyo ezali na bomoko. Atako tofandi bisika ndenge na ndenge mpe tozali na mimeseno ndenge moko te, biso nyonso tondimaka mateya moko mpe totosaka mibeko ya Biblia. Tángá Nzembo 25:14 mpe 1 Petro 2:17, mpe na nsima yanolá na motuna oyo:

• Soki moto azwi batisimo, boyokani nini akozala na yango ná Yehova mpe ná bato mosusu oyo basambelaka ye?

 NA MOKUSE

Yesu alobaki ete bakristo basengeli kozwa batisimo. Mpo moto azwa batisimo asengeli kokóma na kondima makasi epai ya Yehova, kotosa mibeko na ye, mpe komipesa epai na ye.

Bozongeli

• Batisimo ezali nini, mpe mpo na nini ezali na ntina?

• Boyokani nini ezali kati na komipesa mpe batisimo?

• Makambo nini moto asengeli kosala mpo amipesa mpe azwa batisimo?