Maloba ya ebandeli

Epai wapi nakoki kozwa  toli oyo ebongi?

Mpo na bana basi

Butu moi ozali kokanisa mwana mobali moko kitoko oyo ayei sika na kelasi na bino. Okanisi boye: ‘Kutu ayebi na ye ata ngai te; sikoyo mabe ezali wapi soki nazali kokanisakanisa ye?’ Ezali yo moko te nde okanisaka mwana mobali yango. Bana basi nyonso balelá ye. Oyebi yango mpo oyokaka ndenge bana basi mosusu babɛtaka masolo na ye ntango nyonso.

Otala boye, ye wana azali kotala yo. Miso na bino ekutani mpe asɛkisi yo mwa moke. Yo mpe osɛkisi ye. Apusani pene na yo.

Atuni na mwa nsɔni: “Ndenge nini?”

Ozongiseli ye: “Malamu.”

Alobi na yo: “Nkombo na ngai Eric.”

 Mbala moko oyebisi ye: “Namoni oyei sika na eteyelo oyo?”

Azongisi boye: “Ɛɛ, tokɔti na kartye oyo kala mingi te.”

Elekeli yo komona ete Eric azali mpenza kosolisa yo!

Eric alobi lisusu boye: “Oyebi, lelo na mpokwa nakosala mwa fɛti epai na biso. Okoya?”

Afini yo mwa liso mpe ayebisi yo makambo na litoi.

Abakisi boye: “Kobanga te, baboti na ngai bakozala te, mpe masanga ekozala. Olobi nini kasi, okoya?”

Eric aozela opesa ye reponse. Mwana mwasi nyonso ya eteyelo alingaki kondima mbala moko!

Okoloba nini?

Mpo na bana mibali

Baninga na yo mibale ya kelasi bazali koya esika ozali. Mbala moko motema na yo ebebi, mpo mbala mibale na pɔsɔ, bana yango balukaki komɛlisa yo likaya. Oyo ekozala mbala na bango ya misato ya komeka yo.

Oyo ya liboso alobi boye: “Ozali lisusu kaka yo moko? Nalingi nalakisa yo moninga moko.” Mpe ntango alobi liloba moninga, abɛti yo mwa moke na lipeka, abimisi eloko moko na poshɛ na ye mpe atandeli yo lobɔkɔ.

Omoni eloko moko na kati ya misapi na ye lokola likaya. Oyebi mbala moko ke eza likaya, mpe motema na yo ebebi lisusu makasi.

Olobi boye: “Pardɔ, nasi nayebisá bino ke namɛlaka te . . .”

Mwana mobali ya mibale akati yo maloba: “Ezali nde mpo na lingomba na bino wana? Bapekisaka bino nde komisepelisa?”

Oyo ya liboso abakisi boye mpo na kotumola yo: “To ozali nde yuma?”

Na mpiko nyonso oyebisi ye ete: “Te, naza yuma te.”

Sikoyo, oyo ya mibale atye lobɔkɔ na ye na lipeka na yo, mpe alobi na yo na malɛmbɛ: “Aa masta zwá!”

Oyo ya liboso atye likaya yango pene mpenza ya zolo na yo mpe alobi na mongongo ya nse ete: “Tokoyebisa moto te. Moto akoyeba te.”

Okosala nini?

 MOKOLO na mokolo, makambo ya ndenge wana ezali kokómela bilenge na mokili mobimba. Atako bongo, bilenge mosusu bayebi malamumalamu liboso oyo basengeli kosala soki makambo ya ndenge wana ekómeli bango, kasi mosusu bayebi te. Na ndakisa, mwana mobali oyo bazali kotya ye mbamba mpo amɛla likaya akoki mbala mosusu kokanisa boye: ‘Nalingi te kosala likambo oyo balingi nasala, kasi mitungisi eleki. Mpo na nini te nalakisa mpe baninga na ngai ya kelasi ke ngai mpe naza?’ To mwana mwasi oyo mwana mobali moko asɛngi bábima na ye akoki kokanisa boye: ‘Aza na ye mabe te. Mpo na nini naboya ye?’ Nandima ata mpo na mbala oyo!

Nzokande, baboti mingi bateyá bana na bango ndenge bakoki kokɔtela na mpiko nyonso mateya ya Biblia. Na ndenge yango, ezalaka mpasi mpo básala mabe. Okosepela kozala elenge ya ndenge wana? Likambo ya esengo ezali ete yo mpe okoki kozala bongo! Nini ekoki kosalisa yo?

Biblia ekoki kosalisa yo olonga na ndenge ebongi mikakatano oyo bilenge bakutanaka na yango. Ezali na batoli oyo eleki batoli nyonso mpo ezali Liloba ya Nzambe. (2 Timote 3:16, 17) Biblia ekoki kosalisa yo olonga mikakatano nini? Talá liste oyo ezali awa na nse, mpe tyá elembo ✔ na masolo oyo esepelisi yo mingi.

□ Boyokani na ngai ná bana basi to bana mibali

□ Ndenge ya komesana na bambongwana oyo ezali kosalema na nzoto na ngai

□ Ndenge ya kozwa baninga

□ Ndenge ya kolonga mikakatano na kelasi

□ Ndenge ya kosalela mbongo

□ Ndenge ya kosolola na baboti

□ Ndenge ya kobatela makanisi

□ Ndenge ya kopona masano ya malamu

□ Ndenge ya kokóma na boyokani makasi ná Nzambe

Ndenge tozali komona yango na nkasa 4 mpe 5, masolo oyo ezali na liste oyo, eyokani na biteni libwa ya buku oyo. Otye elembo na oyo wapi? Mbala mosusu yango nde okosepela  kotánga liboso. Batoli ya Biblia ekoki kosalisa yo na likambo wana mokomoko. Buku oyo ozali kotánga sikoyo ekolakisa yo ndenge okoki kosalela batoli yango. *

Buku oyo ezali mpe na bisika oyo ekosɛnga obimisa makanisi na yo. Na ndakisa, pene na nsuka ya mokapo mokomoko, okokuta etanda oyo elobi “makambo oyo nakosala” Ekosɛnga okoma na etanda yango ndenge oyo okosalela makambo oyo otángi. Bisika mosusu ezali lokola badevuare mpo na kosalisa yo okanisa; na ndakisa na nkasa 132 mpe 133 ezali na devuare oyo elobi “ndenge ya komibongisa liboso.” Yango ekosalisa yo otalela mikakatano oyo ozali kokutana na yango, okanisa mpe okoma mayele oyo okosalela mpo olonga. Lisusu, eteni mokomoko ya buku oyo esuki na etanda oyo elobi “makambo oyo nakosalela,” esika oyo okoki kokoma ndenge oyo likambo moko ya eteni oyo outi kotánga etaleli yo mpenza. Buku oyo ezali mpe na nkasa libwa oyo mokomoko ezali na motó ya likambo “bandakisa ya kolanda.” Na esika yango, okokuta bato ndenge na ndenge oyo Biblia elobeli, oyo ebongi kolanda ndakisa na bango.

Biblia esɛngi yo ete: “Zwá bwanya, zwá mayele.” (Masese 4:5) Maloba “bwanya” mpe “mayele” elimboli kaka te koyeba kokesenisa malamu ná mabe. Esengeli mpe koyeba mozindo ya likambo. Na ndakisa, soki oyebi makama oyo ezaleli mabe ekoki komemela yo mpe bolamu oyo okozwa soki ozali na bizaleli ya malamu, yango ekosalisa yo ozala mpenza na mpiko ya koboya makanisi mabe ya baninga.

Yebá likambo oyo: Ata soki okoki kokanisa ete mikakatano na yo eleki ndelo, yebá ete mbala mosusu bilenge mosusu mpe bakutaná na mikakatano ya ndenge yango. Bilenge mosusu bakutanaki mpe na mikakatano lokola oyo ya yo mpe balongaki yango. Yo mpe okoki kolonga! Salelá malamu buku Mituna oyo bilenge batunaka—Biyano oyo ebongi, Volimi 2. Ekosalisa yo omona ete Biblia ezali na batoli ya malamu mpenza oyo okoki kozwa esika mosusu te na mokili!

[Maloba na nse ya lokasa]