IMBATA 2
Rebeka Fe Ndra Ayiko Yehovani
Rebeka ni ndra oku Yehova ni lepi tu ni. Agupi eri vuri ma ru ndra Isaka i. Le vini ndra Yehovani saaru. Rebeka fu ndra dri Isaka be ngoni ru? E’da ndra i le ayiko fe Yehova ni ri ngoni ru ya? Ama oniki nga e’yo angiri eri ma dria.
Isaka ma tipika yi ndra Ibrahimu pi Sarah be. Eyi ndra woro o’a angu Kanania, ’ba alenia ’diyi ni Yehova ni inzizu ku ria. Te Ibrahimu le ndra i ma mvi ma ’du oku Yehova ni inzipi ri. Ani nga di ati’bo erini Eliaza ma ti pe Harania muzu oku ndazu erini ori’ba Ibrahimu ni ’diyi ma eselea.
Rebeka nga nzu yi ko dika dika
Eliaza nga mu ati’ba Ibrahimu ni ’diyi ma azi pie. ’Diri ndra aci izu ru ni. Ayuki ngamia mudri nyaka ki jizu feta feza pie. Eliaza ni nga oku erini pe Isaka niri ni ngoni ru ya? Eliaza pini cazu ati’ba azi ’diyi pie Harania ’bo ria, soki pa yi a’di tia a’dusiku niki ra sawa ’bani yi kozu ri ace were. Nga di Yehovani zi kini, ‘Ma ka zamva azini zi yi fezu mani, dika ka fe mani azini ngamia mani ’diyi ni indi, ma di nga ni ra ’di oku mini pele ri i.’
’Di ma vutia coti coti Rebeka nga di eca pari yi kozu ria. Biblia ni ’yo risi eri ndra ndrizaru tu. Eliaza ni erivu yi mvuza aizu ’bo ri ma vutia, nga di ’yo: ‘Ma mini fe ra. Ma nga yi fe mini azini ngamia mini ’diyi ni.’ Mi ega di nga! Ngamia yi vico pie riki yi mvu saaru, ani ledi Rebeka ma eji yi dika dika pale kakau. Mi ico eri azi nga okporu ri ne i’da ’di ma alea ra ya?— Eliaza osu saaru geri Yehova ni eri ma izita omvizu risi.
Eliaza fe ndra Rebeka ni feta onyiru ’diyi kakau. Omve di Eliaza pi ima agyipika pie eyivu akua. Eliaza ecedi eyini asisile Ibrahimu ni ima ti pezu ’daa ri azini geri Yehova ni ima izita omvizu ri. ’Ba Rebeka pivu akua ’diyi o’aki ayikosi eri fezu Isaka ni okuru.
Rebeka nga mu Eliaza be dika ’du Isakani agupiru
Te mini egarisi Rebeka o’a ndra ayikosi Isaka ni ’duzu agupiru ra ya?— Rebeka ni ndra ra Yehova epe Eliaza ma ti ’daa ni. Ani ’ba Rebeka pivu akua ’diyi ni eri zizu mi le mu Kanania Isaka ni ’duzu agupiru ra ya ria, nga ’yo ‘Ee, Ale mu ra.’ Coti coti, ko dri muzu Eliaza be. Eyini cazu Kanania ’bo ria, ’du Isaka ni ima agupi ru.
Rebeka ni e’yo Yehova ni leleri ’yezu risi, Yehova co tusu eri ma dria ra. Eli kakau ma vutia, Yesu nga ndra ifu ori erini ma aliasi! Mi ka ayiko feYehova ni Rebeka dri rile, eri nga tusu co mi dria indi.
