Yesu ’yo ’ba ima vuti bipi ’diyi pini kini: “Diza emini ma di ’ba ma milia ’dini, eyi ma ndre ’yeta emini onyiru ’diyi, ma inzi Ati emini ovupi ’buari ani beni.” (Matayo 5:16) Ani e’yo ’disi ama di afa ’bani omve indaneti (internet) ru ri ayu kilili ru. Pari amani kompiota ma alea webusaiti ru, jw.org ri pari mini ecozu e’yo dria dria ’Ba Yehova ma E’yo Eti Nzepi ’Diyi pi ma dria azi eyini nga ri pie ri isuzu ri. Alenia a’du afa ni ya?

Biblia ma omvita zita ’ba ni ozi saaru ’diyi ma dria riki. Mi eco omvita zita orodriru ’ba kakau ni ebi ozi ’diyi pini riki isu alenia ra. Eceta si, trakti Candi Nyaza Ni Nga I De Ra Ya? azini ’Ba Odrapi ’Bo ’Diyi Nga Enga Idriru Dika Ra Ya? ’diyi indaneti ma alea ti 600 ma drilea ri si. Mi eco vini Biblia New World Translation ru ri isu alenia ti 130 ma drilea ri si dika mi eco buku azi ndundu Biblia onizu ekile E’yo Ada Biblia ni Imba ri Ngoni? rile ’diyi isu gazeti Watchtower azini Awake! ru ’diyi pie. Mi eco buku ’diyi inze indaneti ma alea si geri ’ba yini a’yu tu ekile MP3, PDF, kaniku EPUB le ’diyi si. Mi eco vini buku ’diyi ma peji azi ki gba e’yo oluzu agu azi ni ti erini nze risi! ’Ba vini ti ’bani e’yo nzezu ’ba bile koko ’diyi pie ri e’da pari ’di ma alea vidio si. Mi eco e’yo ’yepiru Biblia ma alea ’bani ede avita ru riki isu Biblia ’bani la o’duko si ri pie azini ongo onyiru mini eco eri ava li ria ri pie.

E’yo ada ’Ba Yehova ma E’yo Eti Nzepi ’Diyi pi ma dria ri. Afa azi vini mini eco isu pari ’di ma alea indi ri vidio e’yo e’dapi azi amani nga wudrikuru si ri ma dria, e’yo ndundu ’Ba Yehova ma E’yo Eti Nzepi ’Diyi obipi riki pie azini azi amani nga okporu ’ba e’yo ewaru ma alea ’diyi ma aza kozu ri pie ri. Mi eco vini otuta okuza nga emupi ’diyi pini riki isu sanduku namba ofisi amani ndundu wudrikurua ’diyi niri pie.

Geri ’diyi si dria, ama fe diza e’yo adari niri di wudrikuru ma kalatisi dria. ’Ba wudrikuru ma woko ndundua ekile Antarctica le ’diyi dria orodri isu ria. Ama izi e’yo Yehova niri ma idri i “drile drile mbele” diza ejizu Mungu ni wudrikuru drisi dria beni.—2 ’Ba Tesalonikia ’Diyi 3:1.

• Azakoma jw.org ni fe ’ba kara kara ni e’yo ada onizu ri ngoni?

• Mi le webusaiti amani ri ma alea e’yo ngole ’diyi oni?