EBIKWATAGANA N’EBIRI KUNGULU | ABANTU ABAAFA
Abantu bwe Bafa Balaga Wa?
“Nnali ndowooza nti waliwo ebifo bisatu omuntu gy’ayinza okugenda ng’afudde: eggulu, ggeyeena, oba puligaatooli. Nnali nkimanyi nti sigwana kugenda mu ggulu, naye ate nga si nze omwonoonyi ennyo okugenda mu ggeyeena. Ate era nnali nneebuuza ebikolebwa mu puligaatooli. Kyokka tewali na kimu ku bifo ebyo kye nnali nsomyeko mu Bayibuli. Bantu be baabyogeranga.”
—Lionel.
“Banjigiriza nti abantu bonna bwe bafa bagenda mu ggulu, naye ekyo saakikkiriza. Nnali ndowooza nti abantu bwe bafa ebyabwe biba bikomye
—nti tebaba na ssuubi lyonna.” —Fernando.
Wali weebuuzizzaako ebibuuzo bino: ‘Abantu baffe abafa balaga wa? Baba mu kubonyaabonyezebwa? Tuliddamu okubalaba? Tukakasiza ku ki nti bajja kuddamu okuba abalamu?’ Weetegereze engeri Bayibuli gy’eddamu ebibuuzo ebyo. Ka tusooke tulabe ekyo Bayibuli ky’eyigiriza ku kufa. Oluvannyuma tujja kulaba essuubi Bayibuli ly’ewa.
Abafu bali mu mbeera ki?
BAYIBULI KY’EYIGIRIZA: “Kubanga abalamu bamanyi nga balifa: naye abafu tebaliiko kye bamanyi, so nga tebakyalina mpeera; kubanga ekijjukizo kyabwe kyerabirwa. Buli kintu omukono gwo kye gulaba okukola, okikolanga n’amaanyi go; kubanga tewali mulimu newakubadde okuteesa newakubadde okumanya newakubadde amagezi mu magombe gy’ogenda.” *
Emagombe kye kifo abafu bonna gye bali; kifo kya kabonero oba mbeera abafu gye balimu nga tebategeera era nga tebasobola kukola kintu kyonna. Yobu omusajja omwesigwa amagombe yali agatwala atya? Bwe yafiirwa ebintu bye byonna n’abaana be mu lunaku lumu, ate oluvannyuma n’alwala amayute agaluma ennyo okuva ku bigere okutuuka ku mutwe, yeegayirira Katonda nti: “Singa onkwese mu magombe [“mu ggeyeena,” enkyusa y’Abakatuliki eyitibwa Douay Version], singa onkisa kyama.” (Yobu 1:13-19; 2:7; 14:13) Kya lwatu nti Yobu bwe yayogera ku magombe yali tategeeza kifo gye yandyeyongedde okubonaabonera. Amagombe yali agatwala ng’ekifo gye yandifunidde obuweerero.
Ekirala ekisobola okutuyamba okumanya embeera abafu gye balimu, kwe kwekenneenya ebyawandiikibwa ebyogera ku bantu munaana abaazuukizibwa.
Tewali n’omu ku bantu abo abaazuukizibwa eyagamba nti yali agenze mu kifo eky’okubonyaabonyezebwa oba mu kifo eky’okwesiima. Singa abantu abo baali bagenze mu kimu ku bifo ebyo, tebandyogedde ebyo ebikolebwayo? Tebyandiwandiikiddwa mu Bayibuli abantu bonna basobole okubimanya? Naye tebiriimu mu Bayibuli. Lwaki abantu abo omunaana tebalina kye baayogera ku nsonga eyo? Kubanga baali tebalina kye bamanyi, baali ng’abali mu tulo otungi. Mu butuufu, emirundi egimu Bayibuli bw’eba eyogera ku kufa ekozesa ekigambo “okwebaka.” Ng’ekyokulabirako, Laazaalo bwe yafa, Yesu yagamba nti Laazaalo yali yeebase.
Kati olwo abafu baliddamu okuba abalamu? Balizuukuka okuva mu tulo?
^ lup. 7 Mu kifo ky’okukozesa ekigambo “amagombe,” enkyusa za Bayibuli ezimu zikozesa ekigambo “hell” ng’abamu bagamba nti kye kifo abafu gye babonyaabonyezebwa. Naye Bayibuli teyigiriza nti waliyo ekifo abafu gye babonyaabonyezebwa.
Era Oyinza Okwagala Okusoma Ebitundu Bino
OMUNAALA GW'OMUKUUMI
Ddala Yesu Yazuukiza Abafu?
Eky’okuba nti Yesu yazuukiza abafu kitukakasa ki ku ebyo bye yasuubiza?
