Ri ká ka ndi kaka ndrŭ krʉ dhó maisha é ddiddi?
Njonjo kʉ ná ngø lu bí kʉ ná ndrŭ marche de kolere nji ndima nanga kani mbø dhi lo kana haki kʉ nga nari dho. Coronavirus liri fø kpakpalo rá anzi dhonalo bí kʉ ná izine tso le tae ta ndirigoti hopitale djo nzá ndrŭ ka ndima sie ndima ji nari bbai ri dhonalo ndrŭ dhó maisha nga kʉ ddiddi ri.
Mbø dhi kpakpalo kʉ dz’ djó nari ká ka ndi sini si bbʉbbʉ? Bbʉbbʉ o. Biblia ngbaribbai ma Mungu si ko nzani dho ná fø kpakpalo tso d’ø nari d’ra ko dho.
D’ø tso Mungu si d’ø ná lo
Kpakpalo: Ndrŭ nzá kpe ddikpa lo ro maddi ri, ndiri gba ndrŭ krʉ dhó lo tso d’e.
Lo thika si thɨni nari: Mungu si ndidhó guvernema li ndrŭ dhó ri rɨngana, føri kʉ kedhó Pidhinga. Ri si pinyo ra nǎ ro dz’ lu djo.—Danieli 2:44; Matayo 6:10.
Ri si bbʉ ná bblonga: Mungu dhó Pidhinga si pinyo dz’ lu djo nari dho, dz’ djó lo thika si thɨni kaka ná chu nǎ. Ndrŭ ki ro nga sie njedha ri ndirigoti ndrŭ djǒnga ngbʉni mbø dhi lo dho nari ro ma nga ddi sie ri. (Zaburi 9:7-9, 18) Føri djolu pli, kpa nanga si jini ji ndima dhó familia ma na ndima nji ná njí dho, dhonalo ri sie ndidhi bblo kʉ ná matokeo na. Biblia tsoni ɨ: “Kpa si dza chi ndima di na, kpa si mizabibu zʉ ndima nyó ri djó tunda d’e. Kpa nzɨ ka si dza ro chi d’i ke di na ri, nyo kpa ro zʉ d’i ke nyó ri.”—Isaya 65:21, 22.
Kpakpalo: Ndrŭ nzá ka ndima cho nzadha bbʉ ná lo tso ro ndima dhó maisha nǎ ri.
Lo thika si thɨni nari: Ndidhó Pidhinga chulu Mungu si do le nji dho ná lo ma, nga kʉ chø ná lo ma na tso d’ød’ø.
Ri si bbʉ ná bblonga: Mungu dhó le ronga b’odha tsena, ndrŭ tso cho ndima ba lazima dhi ritsi ná lo ro nga sie ri. Loroji na, lɨ ma, nyo le kosa nari ma, ndirigoti nya ndina nyá ná dhe nga ki ro ma nzɨ ddi le ka si no ri. (Zaburi 46:9; 72:16; Isaya 33:24) Mungu pori: “Madzá ndrŭ si di ngoi dhi ngana, ndirigoti ndima ronga chʉdha dhi ko ndima jotso ko ná ngana.”—Isaya 32:18.
Kpakpalo: Ndrŭ nzani ndima lai ndrŭ kʉ dya ndirigoti jidha na nga nari dho.
Lo thika si thɨni nari: Mungu dhó Pidhinga tsena ndrŭ si ndima lai ndrŭ dhó faida li anziro.—Matayo 22:37-39.
Ri si bbʉ ná bblonga: Mungu dhó Pidhinga tsena, ndrŭ krʉ si Mungu dhó ro si ná jidha dho, fø jidha “nzɨ adi ndi nganga dhó faida dhé ne ri.” (1 Wakorinto 13:4, 5) Biblia pori: “chelo ro nzɨ le si nji takatifu kʉ ná ngøtsi djo ri dhonalo dz’ djonga si lili bbʉbbʉ lochudha na Yova djo a ddiddi dda adi jʉdda djonga tso gble nari bbai.”—Isaya 11:9.
Biblia ripo ko ishi nga sini ná saa na, føri dho Mungu tsoni ndi si mbø dhi lo ko djǒnga ngbʉ nari tso d’ød’ø. b (Zaburi 12:5) Fø ddo ni b’o ro, Biblia nǎ kanuni ka ndi kó ni tsotso nja ni hwini mbø dhi lo ni djǒnga ngbʉ njʉ nari dhi kpakpalo tso ró d’e. Loroji na, anja ɨ djo ripo ná lo “Jinsi ya Kuishi Ukiwa na Pesa Kidogo” ndirigoti “Maoni Yenye Usawaziko Kuhusu Pesa.”
a Biblia ripo Mungu ró dho kʉ Yova.—Zaburi 83:18.
b Ndiro ni chú addudho ma ringani ni li ni thí Biblia nǎ lo djo nari d’e, anja i djo ripo ná lo “Biblia Ni Kitabu Chenye Kinatusaidia Kupata Kweli.”
