Muzingu wa Armagedo ni muzingu wa mansukina ha kati dia Nzambi na guvernema za bantu. Guvernema zo na bantu bayikaka zo moko, Nzambi batelamanaka bwawu bu mpe, bu bakalaka mu tambula lutumu lwandi. (Mikunga 2:2) Muzingu wa Armagedo mbo wusukisa luyâlu lwa bantu.​—Daniele 2:​44.

 Ntêlo ya “Armagedo” mbala yimosi kwa bazonzelaka yo mu Bibila, mu Nzabukusu 16:16. Mu mbikululu, mukanda wa Nzabukusu wasongele ti ku “mbuka yi batâka mu Hebre Armagedo,” “mitinu mia mutoto nsi wa mukaka” mbo bavukana “mu bungu dia muzingu wa tilumbu tia tinene tia Nzambi, Nkwa-Ngolo-Zazansoni.”​—Nzabukusu 16:14.

 Banani banwana ku Armagedo? Yezu Kristo mbo katwarisa mukangu wa binwani bia ku zulu mu nunga mbeni za Nzambi. (Nzabukusu 19:11-16, 19-21) Mbeni zo ni bô batelamanaka lutumu lwa Nzambi na bô bavwezaka Nzambi.​—Ezekiele 39:7.

 Ngano Armagedo ku Moyen-Orient yiyôkela? Kâni. Armagedo ka yiyôkela mu mbuka yimosi ko, kâ mu mutoto wawansoni.​—Yeremi 25:32-34; Ezekiele 39:17-20.

 Ntangu zakaka Armagedo, “Har–​Magedo” batâka yo (mu Hebre Har Meghiddone), wuzololo tâ “Mongo wa Megido.” Megido hata dieri dia ku Israele ya ntama. Misamu miayôka mitusongele ti mvita za mfunu zayôkela kûna, zakaka za bazonzelaka mu Bibila. (Mfundisi 5:19, 20; 2 Mitinu 9:27; 23:29) Kâ Armagedo ka yilendi’â yabâ mbuka ko ye penepene na Megido ko. Ka kwena mongo wa wunene kûna ko, luseke lwa Yizreyele lwe penepene ka lulendi’â lwabwana bantu babansoni banwanisa Nzambi ko. Buna, Armagedo ni lukutakanu lwa mansukina lwa makanda matelamanaka lutumu lwa Nzambi.

 Ngano muzingu wa Armagedo bwe wuyôkela? Ka tuzebi’â ko bwe Nzambi kasarila ngolo zandi, kâ tuzebi ti binwanunu bi kasarila mu ntama lendi vutu bia sarila: mvula ya matari, midikutulu mia mutoto, mvula za ngolo, tiya na mvula ya ngo za diki, nzazi na bimbevo. (Yobe 38:22, 23; Ezekiele 38:19, 22; Habakuke 3:10, 11; Zakari 14:12) Mu vwandi, mbeni zakaka za Nzambi zihondasana. Kâ mbo babakula ti ni Nzambi ta ba nwanisa.​—Ezekiele 38:21, 23; Zakari 14:13.

 Ngano Armagedo ni nsuka ya nza? Ka yibâ nsuka ya mutoto ko, mu bungu ti mutoto ni mbuka yifweti bâ muntu mankululu. (Mikunga 37:29; 96:10; Ekleziaste 1:4) Kani Armagedo yafukisa bantu babansoni, mbo yibavukisa, mu bungu ti “yungi dia bantu” dia bisari bia Nzambi bivuka.​—Nzabukusu 7:9, 14; Mikunga 37:34.

 Mu Bibila ntêlo ya “nza” mutoto yizonzelaka, kâ ntangu zakaka mpe bantu batelamanaka Nzambi yizonzelaka. (1 Za 2:15-17) Buna, Armagedo mbo yitulumuna “nsuka ya nza,”wuzololo tâ nsuka ya bantu bakolamanaka Nzambi​—Matie 24:3.

 Ntia ntangu Armagedo yisalama? Yezu bu kazonzela “mpasi ziyôkele,” Yezu watâ: “Tilumbu tio na ngunga yo, ka kwena muntu wuzebi yo ko, ni zibâ mbazi za ku zulu, ni wubâ Mwana, kâ Nzambi kwa.” (Matie 24:21, 36) Kâ, Bibila disongele ti Armagedo mu ntangu Kristo yi kabâ hô yitûla, yabatika mu 1914.​—Matie 24:37-39.