Yee! Bibila kwe “Nzambi, Yibombaka bô bê ba nôka” diatûka. (2 Bisi-Korente 7:6) Ni bu sa ti Bibila ka diena buku dia bimbevo bia mutu ko, diabakisa bantu mu telamana mabanza ma tihonda. Malongi ma Bibila malendi ku bakisa mpe.

•  Ntia malongi ma delakana Bibila dihanaka?

•  Ngano Bibila beto dizonzelaka bantu badinga mu fwa?

•  Ntia verse za Bibila zilendi ku bakisa mu telama mabanza ma tihonda?

•  Mbo tala ti ndiku yitêle: “Nzololo nafwa”?

•  Mbo tala ti nadinga mu tihonda?

• ● Zonzela mbanzulu zaku.

   Bibila ditêle: “Nkatika ndiku ntangu zazansoni yisongelaka luzolo, mpe mpangi yena yabutuka mu bungu dia ntangu za mpasi.”​—Bingana 17:17.

   Nsasa: Lutindusu lwa bantu bakaka lu bâka neto bu tubâka na mabanza ma mpasi.

   Tala ti lundiri mabanza maku, mabanza maku ma mbi, mbo mabâ nkatika mpasi mu korela. Kâ tala ti zonzele mbanzulu zaku, mbo mona bubote mpe mbo mwina misamu mu mpila ya mbote.

   Malongi: Zonza kwe muntu lumbu ti, kampe muntu wa kanda peleko ndiku ya mutima. a Lendi tsoneka mabanza maku mpe.

• ● Dinga lubakusu lwa badoktere.

   Bibila ditêle: “Ka bantu ba wasa ko bê na nsatu doktere, kâ bô bê na bimbevo.”​—Matie 9:12.

   Nsasa: Tufweti dingaka lubakusu lwa doktere bu tubâka na timbevo.

   Mabanza ma tihonda malendi bâ tidimbu tia timbevo tia mutu peleko tia mfwemoso za yôka. Ntiana timbevo tia mu nitu, ka tufweti’â tamona nsoni ko. Bimbevo bia mutu peleko mfwemoso za yôka, bia babukaka.

   Malongi: Kulu monekena doktere. Kuyôkesandi ntangu.

• ● Bambukaka ti Nzambi beto babelokelaka lwaka.

   Bibila ditêle: “Nswini tanu batekaka mu mipata miole milembolo mfunu, ka buna ko? Kâ ka kwena wumosi ko Nzambi wu kazimbakana. [. . .] Ka lubândi na bunkuta: luyôkele nswini zazingi mu ntalu.”​—Like 12:6, 7.

   Nsasa: Nge, ntalu wena kwe Nzambi.

   Lendi banza ti ka kwena muntu ko wuta ku belokela lwaka, kâ Nzambi mpasi zaku za kabakulaka. Nge kabelokela lwaka​—Ni bu sa ti kusiri’â na nsatu luzingu ko. Mikunga 51:17 yitêle: “Mukayulu wutâka Nzambi nsayi ni mabanza ma lwala; mutima wa lwala na watendoka, ô Nzambi, kukala wo ko.” Nzambi zololo ti nge wabâ wa moyo mu bungu ti nge kazololo.

   Malongi: Taluzula bidimbu bie mu Bibila bisongelaka ti Nzambi nge kazololo. Mu tifwani, tala timoko 24 tia buku dia ndongokolo dia Approchez-vous de Jéhovah.

• ● Sambilaka Nzambi.

   Bibila ditêle: “[Haneno] maniongo meno mamansoni [kwe Nzambi], mu bungu ti beno kafwilaka tiari.”​—1 Piere 5:7.

   Nsasa: Nzambi ku lombele wamutêlaka mabanza maku mu mutima wawansoni mu bunsungu.

   Nzambi lendi ku hana tidzunu tia ku kati na ngolo za tatamana mu tindila musamu’aku. (Bisi-Filipe 4:6, 7, 13) Buna, mpila ni yo kabakisilaka bô bamulombaka lubakusu.​—Mikunga 55:22.

   Malongi: Sambila Nzambi lumbu ti. Sarila nkumbu’andi Yehova, mpe mu têla mabanza maku. (Mikunga 83:18) Mu lomba lubakusu mu tatamana mu tindila.

• ● Dimbitila mu tivuvu tia Bibila mu bungu dia bilumbu bia ku matu.

   Bibila ditêle: “Tivuvu tio tie neto ntiana tikâlu mu bungu dia luzingu lweto, tia matieleka mpe tia sikama.”​—Bahebre 6:19, note.

   Nsasa: Misamu mi monaka ku mutima milendi bâ ntiana matuma (vagues) mu ntangu ya titembo tia ngolo, manakaka mpe makokaka, kâ tivuvu ti hanaka Bibila tilendi ku bakisa mu sikama.

   Tivuvu tio ka yena ndozi ko, mu makani ma Nzambi ma katula mpasi zazansoni tisikamanaka.​—Nzabukusu 21:4.

   Malongi: Longoka nsangu zakaka zitariri tivuvu ti hanaka Bibila mu timoko 5 tia mukanda wa Nsangu za mbote zitûkiri kwe Nzambi!

• ● Sa tima timosi ti zoloko.

   Bibila ditêle: “Mutima wa yangalala tilongo tia mbote tiena.”​—Bingana 17:22.

   Nsasa: Sa tima tikutâka nsayi kulendi tomesa tikolela tiaku tia mabanza na tia mutima.

   Malongi: Sa tima ti vulu zoloko mu sa. Mu tifwani, wirikila mizike mikutâka nsayi, tanga tima titindisaka, peleko sala tisalu ti tomo zoloko mu yôkeselaka ntangu. Mbo kurisa mpe nsayi’aku tala ti bakisi bantu bakaka, ni wubâ mu misamu mia fioti.—Bisalu 20:35.

• ● Tomo kipa tikolela tiaku.

   Bibila ditêle: “Sport salu yena.”​—1 Timote 4:8.

   Nsasa: Vulu saka sport, tomo bwaka tolo mpe diaka bidia bia delakana, ndandu binataka.

   Malongi: Saka mwendo wa ntinu, ni wubâ wa minite 15.

• ● Bambuka ti misamu miaku na mabanzulu zaku bilendi soba.

   Bibila ditêle: “Kâ kaluzebi’â ko bwe luzingu lweno lubâ mbazi.”​—Zaki 4:14.

   Nsasa: Musamu wufwemesaka​—ni wubâ musamu wa nkatika mpasi, balendi wa yirika.

   Ni bu sa ti kuzebi’â ko bwe sa mu yirika musamu, mbazi misamu milendi soba. Buna, dinga mpila ya tomo mia telamana. (2 Bisi-Korente 4:8) Tala ti sukisi luzingu lwaku, kulendi’â wavutu kâla manima ko; kâ, kampe misamu miaku mia ntangu fioti kwa miena.

   Malongi: Tanga binsamu bia mu Bibila bia bantu batomo bâ ba nôka mpe beri dingaka mu fwa. Mbo mona ti luzingu lwawu lwayizi toma, vula vula mu mpila ya nzitukulu. Tala bifwani.

 Yee. Bibila bantu dizonzelaka batâ: “Nzololo nafwa.” Nzambi kabasemba ko, kâ Yandi wabahana lubakusu. Wulendi bâ mpila mosi na nge.

Eliya

•  ● Nani wabâ? Eliya mbikuri yabâ yeri na butindi. Kâ, ka yizi’â kondo bunôkena ko. Zaki 5:17 yitêle: “Eliya muntu weri wabâ na mbanzulu zimosi na beto.

•  ● Mu bungu dia nti kadinga mu fwa? Ntangu yimosi ya luzingu lwandi, Eliya wayizi bâ na bunkuta, wabanza ti ka bâ salu ko. Ntiangu kalomba kwe Yehova: “Kungondesa.”​—1 Mitinu 19:4.

•  ● Nti biamubakisa? Eliya watâ musamu miandi miamiansoni kwe Nzambi. Bwe Nzambi kamubakisila? Yandi wamukipa mpe wamusongela ngolo zandi. Yandi wamuhana mpe lukwikulu bu kamutêla ti salu kwa kabâ mpe mbo kaketi mu hana tibakisi tia fwana mpe tiaketi mu kipa.

•  ▸ Tanga tinsamu tia Eliya: 1 Mitinu 19:2-18.

Yobe

•  ● Nani wabâ? Yobe muntu wa mvwama wabâ, kanda dia dinene dia bâ nandi. Nzambi ya matieleka keri sarilaka na kwikama kwakwansoni.

•  ● Mu bungu dia nti kadinga mu fwa? Luzingu lwa Yobe lwayizi beba mbala mosi. Yandi wahombesa bimvwama biandi biabiansoni. Bala bandi babansoni bayizi fwa mu katastrofe. Yandi beni wabaka timbevo tia ngolo. Ha manima, ndiku zandi zamukwikisila ti yandi beni watulumuna mpasi zandi. Yobe watâ: “Luzingu lwani ntomono lwa yina! Ka nsiri’â na nsatu luzingu ko.”​—Yobe 7:16.

•  ● Nti biamubakisa? Yobe wasambila Yehova mpe watiyekola kwe bantu bakaka (Yobe 10:1-3) Ndiku yimosi yabakula misamu miandi yamutindisa. Ntono miamiansoni, Yobe watambula malongi na lubakusu lwa Nzambi mu mutima wumosi.

•  ▸ Tanga tinsamu tia Yobe: Yobe 1:1-3, 13-​22; 2:7; 3:1-13; 36:1-7; 38:1-3; 42:1, 2, 10-13.

Mose

•  ● Nani wabâ? Mose mfumu yabâ ya kanda dia Israele na mbikuri ya kwikama.

•  ● Mu bungu dia nti kadinga mu fwa? Mose madema ma ngolo ma bâ nandi. Bubi beri vulu mu zonzelaka mpe wayizi kota mu bunôkena. Ntiangu katâ kwe Nzambi: “Kungonda kwani bwawu bu.”​—Lutangu 11:11, 15.

•  ● Nti biamubakisa? Mose wazonzela mabanza mandi kwe Nzambi. Nzambi wamubakisa mu betola madema mandi.

•  ▸ Tanga tinsamu tia Mose: Lutangu 11:4-6, 10-17.