Bibila tulandaka bu tukembela Ndia ya Mfumu, yi bazebi mpe mu “Salaka dia Mfumu“, peleko Mbambukulu moyo ya lufwa lwa Yezu. (1 Bisi-Korente 11:20; Bîbila kia kituâri) Kâ, mu musamu wo, nkwikulu na nsalulu zazingi za mabundu makaka malembo tûkaka mu Bibila.

 Kani dia Ndia ya Mfumu ni mu bambukila Yezu, bu tukwe tonde mu mukayulu wu kahaba mu bungu dia beto. (Matie 20:28; 1 Bisi-Korente 11:24) Salaka diango ka yena sakrema ko, nsalulu ya dibundu mu baka bweso peleko mulemvo wa masumu. a Bibila ditâka ti ka mu nsalulu za dibundu’â ko tulendi bakila mulemvo wa masumu meto, kâ mu timinu tieto kwa mu Yezu.​—Bisi-Rome 3:25; 1 Za 2:1, 2.

 Yezu walomba kwe milongoki miandi mu kembela Ndia ya Mfumu, kâ ka tomo’â tâ ko mbala zikwa bafweti ya sa. (Like 22:19) Bantu bakaka banzaka ti bafweti ya sa ngonda zazansoni, bakaka tumingu twatwansoni, bilumbu biabiansoni, mbala zazingi mu tilumbu, peleko buna bu tuta zolo. b Kâ misamu mie ko tufweti taluzula.

 Yezu wabatika mu kembela Ndia ya Mfumu mu tilumbu tia Pake ya Bayuda. (Matie 26:1, 2) Ka wena musamu wa papulukusu ko. Matsonoko mukayulu wa Yezu mafwanakasaka na mukayula wa timeme tia Pake. (1 Bisi-Korente 5:7, 8) Pake mbala mosi yimosi beri ya kembelaka mu muvu. (Ndukulu 12:1-6; Levitike 23:5) Mpila mosi mpe Bakristo c ba ntete mbala mosi kwa mpe beri kembelaka Mbambukulu moyo ya lufwa lwa Yezu, mpe Mbangi za Yehova tifwani tio balandaka.

 Tifwani tia hana Yezu mbo tita tubakisa mu zaba mbala zikwa tulendi kembela Mbambukulu ya lufwa lwa Yezu kâ mpe mu zaba tilumbu na ntangu. Yezu wabatika yo mu ntangu bwisi bwa yila, mu tilumbu tia 14 Niza mu muvu wa 33 M.B, tintwari na calendrier yeri sarilaka Bayuda mu ntama. (Matie 26:18-20, 26) Mivu miamiansoni mu tilumbu tio, Mbangi za Yehova Mbambukulu ya lufwa lwa Yezu bakembelaka ntiana bweri saka Bakristo ba ntete. d

 Ni bu sa ti tilumbu tia 14 Nisan, wa muvu 33 B.M, vendredi tia bâ, tilumbu tia Mbambukulu tilendi bwa tilumbu tiakaka tia lumingu. Mivu miamiansoni mpila yi beri sarilaka mu ntangu ya Yezu mu zaba tilumbu ti delakanaka na tia 14 Niza, kani tasarila calendrier ya Bayuda ya ntangu yi. e

 Mu batika salaka diango, Yezu wasarila dimpa dia lembo levire na vinu dia Pake dia sarila. (Matie 26:26-28) Mpila mosi mpe, dimpa tusarilaka dilembolo na leveri na bima biakaka mu kati, na vinu dilembolo na bima mu kati, kâ ka jus ya mbutu za vinu’â ko, vinu dia ngolo’â ko, dia sukari peleko die na arome.

 Mabundu makaka dimpa die na levire basarilaka, kâ mu Bibila, levire tidimbu tivulu bâka dia masumu na tima tia beba. (Like 12:1; 1 Bisi-Korente 5:6-8; Bisi-Ngalate 5:7-9) Buna, dimpa dilembolo na levire na tima tiakaka didelakane mu bâ tidimbu tia nitu ya Yezu yilembolo na musamu. (1 Piere 2:22) Nsalulu yilembo tûkaka mu Bibila ni yo yayingasa vinu mu jus mbutu za vinu. Mabundu makaka ni bo masarilaka mu bungu ti malavu ma ngolo mayiminaka mu nwa, kâ Bibila ka ditâka bo ko.​—1 Timote 5:23.

 Dimpa dilembolo na levire na vinu dibasarilaka ku Mbambukulu bidimbu biena bia nitu na menga ma Yezu. Ka mu timangu’â ko bikwizi balukaka mu nitu’andi na mu menga mandi. Tataluzuleno misamu mie mu Bibila.

•   Tala ti Yezu walomba kwe milongoki miandi mu nwa menga mandi, mbo kaketi balomba mu kolamana musiku wa Nzambi wuyiminaka mu dia menga. (Mbatukulu 9:4; Bisalu 15:28, 29) Ka bulendi’â bwa bâ ko, mu bungu ti Yezu ka keti’â lomba ko bakolamana musiku wa Nzambi wutariri menga me ma longo.​—Za 8:28, 29.

•   Tala ti bantumwa nkatika menga ma Yezu banwa, ka keti’â vutu tâ ko ti “menga mani mbo batsamuna mo,” mu songela ti mukayulu’andi mala kwa weri.​—Matie 26:28.

•   Mukayulu wa Yezu “mbala mosi” bahana wo. (Bahebre 9:25, 26) Kâ, tala ti dimpa na vinu mu nitu na menga ma Yezu matituka mu ntangu ya Ndia ya Mfumu, buna bantu badiaka dimpa mpe banwaka vinu mukayulu wo bakârilaka ntangu zazansoni.

•   Yezu watâ: “Yendeno se bo mu kumbambukilaka moyo,” ka tâ ko “mu bambukila moyo mukayulu’ani.”​—1 Bisi-Korente 11:24.

 Bantu bô bakwikilaka ti dimpa na vinu mu nitu na menga ma Yezu matitukaka, mu verse zakaka basikamasaka nkwikulu’awu. Mu tifwani, musamu watâ Yezu mu menga mu mpila eyi batâka wo mu mbangululu zazingi za Bibila: “Ma ni menga mani.” (Matie 26:28) Kâ nzonzolo ya Yezu balendi ya bangurila ebu: “Tii ni tifwani ntia menga mani,” “Menga mani mata monekesa,” peleko “tii ni tifwani ntia menga mani.” f Ntiana bu keri vulu saka, Yezu mu nzila ya bifwani keri longeselaka.​—Matie 13:34, 35.

 Mbangi za Yehova bu zikembelaka Ndia ya Mfumu, bantu ndambu kwa badiaka dimpa mpe banwaka vinu. Mu bungu dia nti?

 Menga ma tsamuna Yezu masingasa “luwawanu lwa môna” lwayingasa lo lwasa Yehova na kanda dia Israele ya ntama. (Bahebre 8:10-13) Bô bê mu luwawanu lwa môna dimpa badika na vinu banwaka. Ka Bakristo babansoni’â ko, kâ “bô kwa bê ba solo” kwe Nzambi mu mpila ya dzitukulu (Bahebre 9:15; Like 22:20) Na Kristo bayâla ku zulu, mpe mu mabanza ma Bibila bantu 144 000 kwa babâ na bweso bo.​—Like 22:28-30; Nzabukusu 5:9, 10; 14:1, 3.

 Mbangi za Yehova zazîngi tivuvu tibâ nawu bwabâ mu “yungi dia bantu” dibâ mankululu ha mutoto, kâ “twila dia fioti” na Yezu dikwe yâla ku zulu. (Like 12:32; Nzabukusu 7:9, 10) Ni bu sa ti bô bê na tivuvu tia bâ ha mutoto ka badiaka dimpa ko mpe ka banwaka vinu ko, ku Mbambukulu bakwendaka mu tonda mu bungu dia mukayulu wahana Yezu mu bungu dia bantu babansoni.​—1 Za 2:2.