Mu 2011, musi-Érythrée wumosi waye swama ku Norvège. Tilumbu timosi, Mbangi za Yehova zaye mu tala mu mu zonzela Bibila. Wabatêla ti Mbangi za Yehova za ku hata diandi za kazaba. Wavutu ba bangula ti bu kabâ tinwani, wamona ti Mbangi za Yehova zi batûla ku boloko mu bungu dia timinu tiawu ka zeri’â na bunkuta ko bu beri ba tumaka mu ngolo mu bâ binwani, ni bu sa ti mpasi beri monaka.

Mu ntangu misamu miayizi soba mu mbala mosi, bayizi tûla bakala diango ku boloko. Wayizi bwabana na Mbangi za Yehova zitatu—Paulos Eyasu, Negede Teklemariam, na Isaac Mogos. Mbangi zo ku boloko babatûla mu bungu dia timinu tiawu tûka 1994.

Bu keri ku boloko, bakala dîna wayizi mona mu yandi beni ti Mbangi za Yehova misamu mi balongesaka basarilaka. Wayizi mona ti ba nsungu beri mpe bidia biawu beri kabanaka bantu bakaka beri ku boloko. Bakala diango wamona mpe bwe beri longokaka Bibila tintwari bilimbu biabiansoni mpe bu beri tikisaka bantu bakaka mu longoka na bawu. Bu bayizi ba têla basa tiniemo mu mukanda weri songelaka ti ka basiri’â Mbangi za Yehova ko ngatu baduka, bayizi kala.

Tifwani tia Mbangi za Yehova zo tiatomo simba mutima wa bakala dio. Bu kamana tomesa mikanda na luzingu lwandi ku Norvège, wadinga mu zaba mu bungu dia nti Mbangi za Yehova ze na timinu tia ngolo. Buna, Mbangi za Yehova bu zayizi mu tala, wabatika mu longoka Bibila na bawu mpe ku tukutakanu twawu keri kwenda.

Mu septembre 2018, wayizi batusu, Mbangi ya Yehova. Bwawu bu, ngolo zazansoni kata sarila mu zonzela matieleka ma Bibila kwe bantu batûkaka ku Érythrée na ku Soudan. Mbo kabatindisaka mu longoka Bibila na mu kurisa timinu tia ngolo.