Ыйык Китепте «алтын эреже» деген сөз айкашы кездешпейт. Анткен менен көптөр аны Иса пайгамбар үйрөткөн эрежеге карата колдонушат. Ал тоодо айткан насаатында мындай деген: «Башкалардын өзүңөргө кандай мамиле кылышын кааласаңар, силер да аларга бардык жагынан ошондой мамиле кылгыла» (Мт. 7:12; Лк. 6:31).

•  Алтын эреже эмнени билдирет?

•  Алтын эрежеге кармануунун кандай пайдасы бар?

•  Алтын эреже жөн гана эсептешүүнү билдиреби?

•  Канткенде алтын эрежеге кармана алабыз?

 Алтын эреже башкалардан кандай мамилени күтсөк, аларга да ошондой мамиле кылууну билдирет. Мисалы, көптөр башкалардын аларды кадырлап-сыйлашын, боорукердик менен мамиле кылышын жана аларды жакшы көрүшүн каалашат. Демек, өздөрү да башкаларга «ошондой мамиле кылышы» керек (Лк. 6:31).

 Алтын эреже бардык жагдайларда колдонорлук. Маселен, ал...

•   Нике түйүнүн бекемдейт (Эфестиктер 5:28, 33).

•   Ата-энелерге балдарын тарбиялаганга көмөк кылат (Эфестиктер 6:4).

•   Жоро-жолдоштордун, жакын адамдардын жана чогуу иштешкендердин мамилесин чыңдайт (Накыл сөздөр 3:27, 28; Колосалыктар 3:13).

 Алтын эреже Ыйык Китептин Байыркы Келишим деп белгилүү болгон бөлүгүнүн өзөгүн түзөт. Иса пайгамбар ал эреже тууралуу: «Мыйзамдын да [Ыйык Китептин алгачкы 5 китеби], пайгамбарлар айткан сөздөрдүн да [пайгамбарлар жазган китептер] маңызы ушунда»,— деп айткан (Матай 7:12). Башкача айтканда, алтын эреженин пайдубалын Байыркы Келишимдеги «жакыныңды сүй» деген маанилүү осуят түзөт (Римдиктер 13:8—10).

 Жок. Алтын эрежеде, негизинен, башкаларга берүүгө басым жасалат. Иса пайгамбар алтын эрежени бекиткенде жалпы жонунан адамдарга кандай мамиле кылышыбыз керектигин эле эмес, атүгүл душмандарыбызга да ошондой мамиле кылышыбыз керектигин айткан (Лука 6:27—31, 35). Андыктан алтын эреже бизге бардык адамдарга жакшылык кылууга түрткү берет.

1.  1. Кыраакы болгула. Айланаңардагы адамдарга байкоо салгыла. Мисалы, кимдир бирөөнүн оор баштыкты араңдан-зорго көтөрүп келатканын көрүшүңөр, жакыныңардын ооруканага жатып калганын угушуңар же кесиптешиңердин кайгыга чөгүп турганын байкашыңар мүмкүн. Эгер башкалардын «кызыкчылыктарын ойлосоңор», аларга көңүл жубатарлык сөздөрдү айтасыңар же кандайдыр бир жакшылык кыласыңар (Филипиликтер 2:4).

2.  2. Түшүнүктүү болгула. Өзүңөрдү башканын ордуна коюп көргүлө. Аныкындай жагдайга туш болсоңор, өзүңөрдү кандай сезет элеңер? (Римдиктер 12:15). Башкалардын сезимдерин түшүнгөнгө аракет кылсаңар, аларга жардам бергенге түрткү аласыңар.

3.  3. Ылайыкташа билгиле. Ар бирибиз өзүнчө инсан экенибизди эсиңерден чыгарбагыла. Силер каалаган нерсе башкалар каалаган нерседен айырмаланышы мүмкүн. Ошондуктан бирөөгө бир нерсе кыларда ага эмне көбүрөөк жагымдуу болору жөнүндө ойлонгула (1 Корунттуктар 10:24).