Эзра 3:1—13
3 Жетинчи айда+ ысрайылдыктар өз шаарларында жашап калган убакта бүт эл Иерусалимге бир кишидей чогулду.
2 Чыныгы Кудайдын кишиси Мусанын Мыйзамында жазылгандай,+ бүтүндөй өрттөлчү курмандыктар чалынышы үчүн, Жеосадактын уулу Жешуя+ менен башка дин кызматчылар, ошондой эле Шалтиелдин+ уулу Зоробабыл+ менен бир туугандары Ысрайылдын Кудайына арнап курмандык жайын курушту.
3 Алар айлана-тегеректеги элдерден коркконуна+ карабастан курмандык жайын мурунку ордуна кайра куруп, Жахабага арнап бүтүндөй өрттөлчү курмандыктарды: эртең менен жана кечинде чалынчу бүтүндөй өрттөлчү курмандыктарды чала башташты.+
4 Андан кийин, Мыйзамда жазылгандай, Алачык майрамын* өткөрүштү.+ Майрам убагында, күнүгө бүтүндөй өрттөлчү курмандыктан канча чалынышы керек болсо, күн сайын ошончодон чалышты.+
5 Ошондон тартып дайыма чалынчу бүтүндөй өрттөлчү курмандыктарды+ жана ай жаңырганда,+ Жахабага арналган ыйык майрамдарда+ чалынчу бүтүндөй өрттөлчү курмандыктарды чала башташты. Ошондой эле ар бири Жахабага арнап өз ыктыяры менен тартуу+ алып келе баштады.
6 Ошентип, Жахабанын ибадатканасынын пайдубалы тургузула элек болсо да, алар жетинчи айдын биринчи күнүнөн+ баштап Жахабага арнап бүтүндөй өрттөлчү курмандыктарды чала башташты.
7 Эл таш кескендер+ менен усталарга+ акча төлөп турду. Ошондой эле Персиянын падышасы Корештин+ уруксаты менен Лебанондон* деңиз аркылуу Жапага бал карагай жөнөтүп турганы үчүн сидондуктар менен тирликтерге тамак-аш, суусундук, май берип турду.+
8 Иерусалимдеги чыныгы Кудайдын ибадатканасына кайтып келишкенден кийин экинчи жылдын экинчи айында Шалтиелдин уулу Зоробабыл, Жеосадактын уулу Жешуя жана башка жүйүттөр — дин кызматчылар менен лебилер, ошондой эле туткундан чыгып, Иерусалимге кайтып келгендердин+ баары — ишке киришти. Алар Жахабанын ибадатканасындагы иштерди көзөмөлдөп турганга жыйырма жаштан жогорку лебилерди дайындашты.
9 Ошондуктан Жүйүттүн* тукумдары: Жешуя менен анын уулдары жана бир туугандары, Кадмиел менен анын уулдары биригип, чыныгы Кудайдын ибадатканасында иштегендерди көзөмөлдөп турушту. Алар менен чогуу лебилерден болгон Хенадаттын+ тукумдары менен алардын уулдары жана бир туугандары да көзөмөлдөп турушту.
10 Куруучулар Жахабанын ибадатканасынын пайдубалын тургузуп бүткөндө,+ дин кызматчылар өздөрүнүн кийимдерин кийип, сурнайларын алып,+ Асаптын тукумдарынан болгон лебилер болсо жез табактарын* алып, Жахабаны даңкташ үчүн Ысрайылдын падышасы Дөөтү бекиткен тартип боюнча турушту.+
11 Анан кезектешип: «...анткени ал мээримдүү*, анын Ысрайылга көрсөткөн сүйүүсү түбөлүктүү»,+— деп Жахабаны даңктап ырдап,+ ыраазычылык билдиришти. Эл болсо Жахабанын ибадатканасынын пайдубалы тургузулганы үчүн Жахабаны үнүн бийик чыгарып даңктады.
12 Ошондо ибадаткананын пайдубалынын тургузулуп жатканын көрүп, мурунку ибадаткананы көргөн карылардын көптөрү:+ дин кызматчылар, лебилер, урук башчылары катуу ыйлашты, ал эми башкалары кубанганынан жер жаңырта кыйкырып жатышты.+
13 Эл кубангандар менен ыйлагандардын үнүн ажырата албай калды. Алар ушунчалык катуу кыйкыргандыктан, үндөрү тээ алыска чейин угулуп жатты.
Шилтемелер
^ Ливандан.
^ Эзра 2:40та «Одабия», Некемия 7:43тө «Одеба».
^ Музыкалык аспап.
^ Сөзмө-сөз: «жакшы».
