Жезекиел 3:1—27
3 Анан ал мага: «Адам уулу, алдыңдагыны же. Ушул түрмөктү же да, барып, ысрайыл элине айт»,— деди.+
2 Мен оозумду ачтым, ал мага жегенге түрмөктү берди.
3 Анан: «Адам уулу, мен берген бул түрмөктү жеп, курсагыңды тойгуз»,— деди. Ошондо түрмөктү жей баштадым, ал оозумда балдай таттуу болду.+
4 Ал мага: «Адам уулу, ысрайыл элине барып, сөздөрүмдү айт.
5 Анткени сен түшүнгөнгө кыйын, сен билбеген тилде сүйлөгөн элге эмес, ысрайыл элине жиберилип жатасың.
6 Сени сен билбеген, түшүнгөнгө кыйын тилде сүйлөгөн, айткандары түшүнүксүз көп сандаган элдерге жиберип жаткан жокмун. Эгер аларга жиберсем, кулак кагышмак.+
7 Ысрайыл эли болсо сени укпайт, анткени алар мени уккусу келбейт.+ Ысрайыл элинин баарынын чекеси катуу, тоң моюн.+
8 Мына, сени алардай өжөр* кылдым, чекеңди да алардыкындай катуу кылдым.+
9 Чекеңди оттук таштан да катуу алмаздай кылдым.+ Алардан коркпо, жүздөрүн көрүп үрөйүң учпасын,+ анткени алар — козголоңчул эл»,— деди.
10 Анан: «Адам уулу, сага айта турган сөздөрүмдүн баарын угуп, жүрөгүңө түйүп ал.
11 Туткундагы элиңдин арасына барып,+ аларга айт. Кулак кагышса да, кагышпаса да: „Эгедер Теңир Жахаба мындай дейт...“ — деп айт»,— деди.+
12 Анан мени рух* көтөрүп кетти.+ Ошондо артыман: «Жахабанын даңкы өз жеринде даңазалансын!» — деген катуу үн угулду.
13 Анан тирүү жандыктардын бири-бирине тийип жаткан канаттарынын,+ алардын жанындагы дөңгөлөктөрдүн дабышы угулду,+ баягы катуу үн да угулду.
14 Ошондо мени рух көтөрүп, алып жөнөдү. Мен капаланып, ачууланып бараттым. Жахабанын күчү мага катуу таасир этип жатканын сездим.
15 Ошентип, Тел-Абипте туткунда жүргөн, Кебар дарыясынын+ боюнда жашаган элге бардым да, ошол жерде калдым; алардын арасында аң-таң болуп+ 7 күн жүрдүм.
16 Жети күндөн кийин мага Жахаба мындай деди:
17 «Адам уулу, мен сени ысрайыл элине күзөтчү кылып койдум.+ Мен айткандарды укканда аларга менин атыман эскертип турушуң керек.+
18 Мен ыймансызга: „Сөзсүз өлөсүң“,— дегенимде, ага эскертпесең, ал жаман жолунан кайтып аман калышы үчүн, эч нерсе айтпасаң,+ ал ыймансыз болгондуктан өз кылмышы үчүн өлөт,+ бирок анын каны үчүн сени жоопко тартам.+
19 Ал эми ыймансызга эскертсең да, ал ыймансыз иштерин таштабаса, жаман жолунан кайтпаса, өз кылмышы үчүн өлөт, сен болсо жаныңды сактап каласың.+
20 Эгер адил адам адилдигинен жазып, туура эмес иш кылса*, ага каргаша жиберем*, ал өлөт.+ Ага эскертпесең, ал өз күнөөсү үчүн өлөт, жасаган адил иштерин эске албайм, бирок анын каны үчүн сени жоопко тартам.+
21 Ал эми сен адил адамга күнөө кылбашы керектигин эскерткендиктен, ал күнөө кылбаса, эскертилгени үчүн сөзсүз аман калат.+ Сен жаныңды сактап каласың».
22 Ошол жерде мага Жахабанын күчү таасир этти. Ал мага: «Тур, өрөөнгө бар, сени менен ошол жактан сүйлөшөм»,— деди.
23 Мен ордуман туруп, өрөөнгө жөнөдүм. Ал жактан Жахабанын Кебар дарыясынын+ жанынан көргөн даңкына окшош даңкын көрүп, жүзтөмөндөп жыгылдым.+
24 Ошондо ичиме Кудайдын ыйык руху кирип, өйдө тургузду.+ Анан Кудай мындай деди:
«Үйүңө барып, эшикти бекитип ал.
25 Адам уулу, элдин арасына бара албашың үчүн, алар сени аркан менен байлап салышат.
26 Мен тилиңди таңдайыңа жабыштырып коём, ошондо сүйлөбөй, аларды ашкерелей албай каласың. Себеби алар — козголоңчул эл.
27 Бирок мен сени менен сүйлөшкөндө сага тил киргизем.+ Ошондо аларга: „Эгедер Теңир Жахаба мындай дейт...“ — дейсиң. Укканы уксун,+ уккусу келбегени укпай эле койсун. Анткени алар — козголоңчул эл.+
Шилтемелер
^ Сөзмө-сөз: «жүзүңдү алардыкындай катуу».
^ Бул жерде жана 14-аятта колдонулган еврей тилиндеги сөз Кудайдын ыйык рухун же периштени билдириши мүмкүн.
^ Же: «адилетсиздик кылса».
^ Же: «анын жолуна бөгөт коём».
