Жакан 4:1—54
4 Фарисейлер Исанын Жаканга караганда көбүрөөк шакирт даярдап, чөмүлдүрүп жатканын+ угушту. Иса бул жөнүндө билди.
2 (Чынында, элди Иса өзү эмес, шакирттери чөмүлдүрүп жаткан эле.)
3 Ошондо ал Жүйүт жеринен кайра Галилеяны көздөй жөнөдү.
4 Самария аркылуу жол жүрүшү керек болгондуктан
5 ал самариялыктардын Сихар деген шаарына барды. Ал шаар Жакып өзүнүн уулу Жусупка берген талаага+ жакын жайгашкан эле.
6 Ошол жерде Жакыптын кудугу* бар болчу.+ Жол жүрүп аябай чарчаган Иса кудуктун жанында отурган. Түшкү саат он экилер* болчу.
7 Ошол маалда самариялык бир аял суу алганы келди. Иса ага: «Ичкенге суу берчи»,— деди.
8 Шакирттери болсо тамак-аш сатып келгени шаарга кетишкен эле.
9 Самариялык аял: «Жүйүт болуп туруп самариялык аялдан суу сураганың кандай?» — деди. Себеби жүйүттөр самариялыктар менен мамилелешчү эмес.+
10 Иса: «Эгер Кудайдын сага кандай белек берип жатканын,+ ошондой эле сага: „Ичкенге суу берчи“,— деп ким айтып жатканын билсең, өзүң андан суу сурамаксың. Ал сага өмүр суусун бермек»,— деп жооп берди.+
11 Аял: «Мырзам, суу сузуп алгыдай чакаң да жок экен, кудук болсо терең. Анан өмүр суусун кайдан алмак элең?
12 Сен, эмне, бизге ушу кудукту калтырган, ушундан өзү да, балдары да, малы да суу ичкен атабыз Жакыптан да улуксуңбу?» — деди.
13 Буга Иса: «Бул суудан ичкен киши кайра эле суусайт.
14 Ал эми ким мен берген суудан ичсе, эч качан суусабайт.+ Мен берген суу ал адамдын ичинде түбөлүк өмүр бере турган оргуштаган булакка айланат»,— деп жооп берди.+
15 Ошондо аял: «Мырзам, анда суусабашым үчүн, бул жерге кайра-кайра келе бербешим үчүн, ошол сууңдан берчи»,— деди.
16 Иса ага: «Барып, күйөөңдү чакырып кел»,— деп айтты.
17 «Менин күйөөм жок»,— деп жооп берди аял. Иса: «„Күйөөм жок“,— деп туура айттың.
18 Анткени сенин беш күйөөң болгон. Азыр чогуу жашап жаткан кишиң болсо күйөөң эмес. Сен чындыкты айттың»,— деди.
19 Аял ага: «Мырзам, сен пайгамбар окшойсуң.+
20 Биздин ата-бабаларыбыз Кудайга бул тоодо сыйынышчу, силер болсо Иерусалимде сыйыныш керек дейсиңер»,— деп айтты.+
21 Иса: «Ишенип кой, адамдар Атама бул тоодо да, Иерусалимде да сыйынбай турган убак келет.
22 Силер эмнеге сыйынып жатканыңарды билбейсиңер,+ биз болсо билебиз, анткени адамдардын куткарылышы жөнүндөгү билимди Кудай биринчи жүйүттөргө берген.+
23 Бирок Кудайга* туура сыйынган адамдар ага ыйык рухунун жетеги менен жана ал өзү ачып берген чындыкка ылайык сыйына турган убак келет, ал тургай, келип да калды. Анткени Кудай* өзүнө ошентип сыйына тургандарды издейт.+
24 Кудай — Рух.+ Ага сыйынгандар анын ыйык рухунун жетеги менен жана чындыкка ылайык сыйынышы керек»,+— деди.
25 Аял Исага: «Машаяк деп аталган бирөөнүн келерин билем. Ал келгенде бизге баарын айтып берет»,— деди.
26 Ошондо Иса: «Сен дал ошонун өзү менен сүйлөшүп турасың»,— деди.+
27 Ошол учурда шакирттери кайтып келип калышты да, Исанын аял менен сүйлөшүп жатканын көрүп таң калышты. Бирок эч кимиси: «Андан эмнени сурап жатасың?» же «Эмнеге аны менен сүйлөшүп жатасың?» — деп сураган жок.
28 Аял болсо кумарасын калтырып, шаарга барды да, элге:
29 «Жүргүлө, кылган иштеримдин баарын айтып берген кишини көргүлө. Машаяк ошол болуп жүрбөсүн!» — деди.
30 Алар шаардан чыгып, Исаны көздөй жөнөштү.
31 Ал ортодо шакирттери Исадан: «Устат,+ тамактанып ал»,— деп өтүнүштү.
32 Бирок ал: «Менин силер билбеген тамагым бар»,— деди.
33 Шакирттери бири-бирине: «Эмне, бирөө тамак алып келип бергенби?» — дешти.
34 Иса аларга мындай деди: «Менин тамагым — мени жибергендин эркин аткаруу+ жана ал тапшырган ишти аягына чыгаруу.+
35 Силер оруп-жыя турган маалга дагы төрт ай бар дейсиңер. Бирок силерге айтарым: талаага көз чаптыргылачы, эгин оргонго даяр болуп, бышып калды*.+
36 Орокчу азыртан эле акысын алып, түбөлүк өмүр үчүн түшүм жыйнап жатат. Ошентип, себүүчү менен орокчу чогуу кубанат.+
37 „Бири себет, экинчиси орот“,— деген сөз ушул учурга туура келет.
38 Мен силерди өзүңөр эмгек кылып өстүрбөгөн түшүмдү оргонго жибердим. Башкалар эмгектеништи, бирок анын үзүрүн силер да алар менен чогуу көрүп жатасыңар».
39 Ошол шаардагы көптөгөн самариялыктар: «Ал кылган иштеримдин баарын айтып берди»,+— деп айткан аялдын сөзүн угуп, Исага ишенип калышты.
40 Анан Исага келип, алар менен калышын өтүнүштү. Иса ал жерде эки күн болду.
41 Анын сөзүн угуп, дагы көптөр ишенип калышты.
42 Алар аялга: «Биз эми сенин айткандарың боюнча эле ишенип жаткан жокпуз, себеби анын сөзүн өз кулагыбыз менен угуп, чын эле дүйнөнүн куткаруучусу экенин билдик»,+— деп айтышты.
43 Эки күндөн кийин Иса ал жерден Галилеяга жөнөдү.
44 Бирок ал өзү пайгамбарды өз жеринде урматташпай турганын айткан болчу.+
45 Галилеяга барганда, галилеялыктар аны жакшы кабыл алышты, себеби алар да Иерусалимдеги майрамга барып,+ анын кылган иштеринин баарын көрүшкөн эле.+
46 Галилеяда жүргөндө Иса кайрадан Каанага, өзү мурун сууну шарапка айландырган шаарга, барды.+ Ошол учурда Капернаумда бир ак сарай кызматчысынын уулу ооруп жаткан болчу.
47 Ал киши Исанын Жүйүт жеринен Галилеяга келгенин угуп, ага барды да, өлүм алдында жаткан уулун айыктырып беришин өтүндү.
48 Бирок Иса ага: «Силер керемет-жышаандарды көрмөйүнчө эч ишенбейсиңер»,+— деп айтты.
49 Падышанын кызматчысы: «Мырзам, балам өлүп кала электе, жүрчү»,— деди.
50 Иса: «Үйүңө бара бер, балаң айыкты»,+— деди. Ал анын айткан сөзүнө ишенип, үйүнө жөнөдү.
51 Жолдон кулдары тосуп чыгып, баласынын айыгып калганын айтышты.
52 Ал кулдарынан анын саат канчада жакшы болуп калганын сурады. Алар: «Этинин ысыганы кечээ түшкү саат бирлерде* басылды»,— дешти.
53 Ошондо баланын атасы Исанын: «Балаң айыкты»,+— деп так ошол убакта айтканын эстеди. Ал бүт үйүндөгүлөрү менен Исага ишенип калды.
54 Бул Исанын Жүйүт жеринен Галилеяга барганда жасаган экинчи керемети эле.+
Шилтемелер
^ Же: «булагы».
^ Сөзмө-сөз: «Алтынчы саат чамасы».
^ Сөзмө-сөз: «Атага».
^ Сөзмө-сөз: «Ата».
^ Же: «агарып калды».
^ Сөзмө-сөз: «жетинчи саатта».
