Жакан 18:1—40
-
Жүйүт Исага чыккынчылык кылат (1—9)
-
Петир башкы дин кызматчынын кулунун кулагын шылый чабат (10, 11)
-
Исаны Анаска алып барышат (12—14)
-
Петир Исаны тааныбайм деп биринчи жолу танат (15—18)
-
Анас Исаны суракка алат (19—24)
-
Петир Исаны тааныбайм деп экинчи жана үчүнчү жолу танат (25—27)
-
Исаны Пилаттын алдына алып барышат (28—40)
-
«Менин Падышалыгым бул дүйнөгө таандык эмес» (36)
-
18 Ушуларды айткандан кийин Иса шакирттери менен ал жерден чыгып, Кидрон өрөөнүнүн+ аркы тарабындагы бакка барды.+
2 Иса ал бакта шакирттери менен көп жолу болгондуктан, ал жерди саткын Жүйүт да билчү.
3 Ошондуктан ал бир топ жоокерди, жогорку дин кызматчылар менен фарисейлер жөнөткөн сакчыларды ээрчитип, ошол жакка барды. Алардын колунда шамана*, чырак, курал-жарак бар эле.+
4 Өзүн алдыда эмнелер күтүп турганын билгендиктен Иса алдыга чыгып: «Кимди издеп жүрөсүңөр?» — деп сурады.
5 Алар: «Назареттик Исаны»,+— деп жооп беришти. «Ал менмин»,— деди Иса. Саткын Жүйүт да алардын жанында турган эле.+
6 Исанын: «Ал менмин»,— дегенин укканда тигилер артка кетенчиктеп, жерге жыгылышты.+
7 Ошондо Иса: «Кимди издеп жүрөсүңөр?» — деп дагы сурады. Алар: «Назареттик Исаны»,— дешти.
8 «„Ал менмин“,— дебедимби. Эгер мени издеп жүрсөңөр, анда буларды коё бергиле»,— деди Иса.
9 Бул анын: «Мага бергендериңдин бирин да жоготкон жокмун»,+— деген сөздөрү аткарылышы үчүн болду.
10 Ошондо Симон Петир кылычын сууруп чыгып, башкы дин кызматчынын кулунун оң кулагын шылый чапты.+ Кулдун аты Малкос эле.
11 Бирок Иса Петирге: «Кылычыңды кынына сал.+ Атам берген чөйчөктөн* ичпей коймок белем?»+ — деди.
12 Ошондо жоокерлер менен миң башы жана жүйүттөр жиберген сакчылар Исаны кармап, байлашты да,
13 адегенде Каяпанын+ кайнатасы Анаска алып барышты. Каяпа ошол жылы башкы дин кызматчы болуп турган.+
14 Жүйүттөргө эл үчүн бир кишинин өлгөнү өздөрүнө жакшы экенин айтып, кеңеш кылган Каяпа ушул болчу.+
15 Симон Петир менен дагы бир шакирт Исанын артынан ээрчип барды.+ Ал шакирт башкы дин кызматчынын таанышы болгондуктан анын үйүнүн короосуна Иса менен кошо кирди.
16 Петир болсо сыртта калды. Ошондо башкы дин кызматчынын таанышы болгон тиги шакирт сыртка чыкты да, дарбаза кайтарган күң менен сүйлөшүп, Петирди ичкери киргизди.
17 Дарбаза кайтарган күң Петирге: «Сен да анын шакирттеринен эмессиңби?» — деди. Ал: «Жок»,— деп жооп берди.+
18 Күн суук болгондуктан, кулдар менен сакчылар от жагып, жылынып турушкан эле. Петир да алар менен кошо жылынып турду.
19 Ал ортодо жогорку дин кызматчы Исадан шакирттери, окуткан нерселери жөнүндө сурап жатты.
20 Иса ага: «Мен ачык эле элдин алдында сүйлөп, жүйүттөрдүн баары чогулган сыйынуу жайларында, ибадатканада окутуп жүрдүм.+ Эч нерсени жашыруун айткан жокмун.
21 Эмне үчүн менден сурап жатасың? Сөзүмдү уккандардан сура. Алар эмнелерди айтканымды билишет»,— деп жооп берди.
22 Ошондо жанында турган сакчылардын бири Исаны жаакка чаап:+ «Жогорку дин кызматчыга да ушинтип жооп бересиңби?» — деди.
23 Буга Иса: «Эгер туура эмес айтсам, эмнени туура эмес айтканымды айт*. Эгер айтканым туура болсо, анда эмнеге урасың?» — деди.
24 Андан кийин Анас Исаны колу байланган боюнча башкы дин кызматчы Каяпага жиберди.+
25 Симон Петир отко жылынып турганда, ал жердегилер: «Сен да анын шакирттеринен эмессиңби?» — деп сурашты. Ал: «Жок»,— деп танып койду.+
26 Ошондо башкы дин кызматчынын кулдарынын бири, Петир кулагын шылый чапкан кишинин+ тууганы, ага: «Эй, жана сени бактан көрбөдүм беле?! Сен анын жанында жүргөнсүң»,— деди.
27 Бирок Петир дагы танып койду. Ошол замат короз кыйкырды.+
28 Эртең менен эрте Исаны Каяпаныкынан алып чыгып, башкаруучу Пилаттын ак сарайына алып барышты.+ Бирок арамдалып калбаш үчүн+ өздөрү ак сарайга киришкен жок. Болбосо Куткарылуу майрамындагы тамактан жей албай калышмак.
29 Ошондуктан Пилат аларга өзү чыгып: «Бул кишиге кандай айып коюп жатасыңар?» — деп сурады.
30 Алар: «Эгер кылмышкер болбосо, алдыңызга алып келбейт болчубуз»,— дешти.
31 Пилат: «Алып кеткиле да, өзүңөрдүн мыйзамыңар боюнча соттой бергиле»,— деди.+ Жүйүттөр болсо: «Мыйзам боюнча, бирөөнү өлтүргөнгө укугубуз жок»,— деп жооп беришти.+
32 Бул Исанын өзүнүн кантип өлүшү керектиги жөнүндө айткандары аткарылышы үчүн болду.+
33 Пилат кайрадан ак сарайына кирди да, Исаны чакырып: «Сен жүйүттөрдүн Падышасысыңбы?» — деп сурады.+
34 Иса ага: «Муну өзүң билгиң келгендиктен сурап жатасыңбы же мен жөнүндө башкалар айткан үчүнбү?» — деди.
35 Ошондо Пилат: «Мен, эмне, жүйүт белем? Сени мага элиң менен жогорку дин кызматчылар алып келишти. Эмне кылдың эле?» — деп сурады.
36 Иса: «Менин Падышалыгым бул дүйнөгө таандык эмес.+ Эгер бул дүйнөгө таандык болсо, кызматчыларым жүйүттөрдүн колуна салынып берилбешим үчүн күрөшмөк.+ Менин Падышалыгым бул дүйнөгө таандык эмес»,— деп жооп берди.+
37 Пилат ага: «Демек, сен падыша экенсиң да?» — деди. Иса: «Падыша экенимди өзүң айтып жатасың.+ Мен чындыкты күбөлөндүрүш үчүн төрөлүп, ошол үчүн дүйнөгө келгем.+ Ким чындык тарапта болсо, ал менин үнүмө кулак салат»,— деди.
38 Пилат ага: «Чындык деген эмне?» — деди.
Анан кайрадан жүйүттөрдүн алдына чыгып: «Мен мындан эч кандай айып тапкан жокмун.+
39 Салтыңар боюнча, силерге Куткарылуу майрамында бир кылмышкерди бошотуп берчү эмес белем.+ Жүйүттөрдүн Падышасын бошотуп берейинби?» — деди.
40 Ошондо алар: «Муну эмес, Барабаны!» — деп кайрадан кыйкыра башташты. Бараба болсо каракчы эле.+
Шилтемелер
^ Баш жагына майлуу чүпүрөк оролуп, жарык кылыш үчүн күйгүзүлчү кыска жыгач.
^ Бул жерде «чөйчөк» деген сөз Кудайдын эрки боюнча Исанын Кудайга акарат кылды деп ак жерден айыпталып өлтүрүлөрүн билдирет.
^ Же: «далилде».
