ЫЙЫК КИТЕПТЕ ЭМНЕ ДЕЛЕТ?
Машаяк
Ыйык Китепте Машаяк келип, бүт адамзатты оорудан, азап-кайгыдан жана өлүмдөн арылтары алдын ала айтылган. Ошол Машаяк ким? Исабы?
Машаякты кантип таанышмак?
Ыйык Китепте айтылган боюнча Машаяк эки жолу келип, эки ролду аткармак *. Ал келе турган эки учурдун ортосунда бир топ убакыт өтмөк. Биринчи келгенинде адам болуп келмек. Ошондуктан эл аны оңой таанымак. Себеп дегенде Ыйык Китепте анын жашоосуна жана кызматына байланыштуу көп нерселер алдына ала айтылган. Негизи эле, «Иса жөнүндөгү күбөлөндүрүү» Ыйык Китепте жазылган пайгамбарлыктардын маңызы болуп эсептелет (Аян 19:10).
Исанын адам болуп келгенде кылган кереметтери келечекте күчтүү рух катары жер жүзү боюнча кыла тургандарынын чети эле болгон
ЫЙЫК КИТЕПТЕ ЭМНЕ ДЕЛЕТ?
Машаяктын өзгөчөлүктөрү:
-
Дөөтү падышанын тукумунан чыкмак (Ышая 9:7; Лука 3:23—31) *.
-
Бетлехем шаарында төрөлмөк (Микей 5:2; Лука 2:4—7).
-
«Жакшы кабар» жарыяламак (Ышая 61:1; Лука 4:43).
-
Аны баркка албай коюшмак, киши ордуна көрүшмөк эмес (Ышая 53:3; Матай 26:67, 68).
-
Отуз күмүш тыйынга сатып жиберишмек (Закарыя 11:12, 13; Матай 26:14, 15).
-
Ага адилетсиз түрдө өлүм өкүмү чыгарылганда ооз ачмак эмес (Ышая 53:6, 7; Матай 27:12—14).
-
Курмандыкка чалынган «козу» катары адамзаттын күнөөсүн өзүнө артып, Кудайдын алдында адамзатты күнөөдөн тазаламак (Ышая 53:7; Жакан 1:29, 34, 36).
-
Аны өлтүрүшкөндө бир да сөөгү сынмак эмес (Забур 34:20; Жакан 19:33, 36).
-
Сөөгү байлар менен коюлмак (Ышая 53:9; Матай 27:57—60).
-
Үч күндөн кийин тирилмек (Матай 16:21; 28:5—7).
Жерге келгенде Иса пайгамбардын жашоосунда ушул айтылгандардын баары жана мындан башка дагы көп нерселер аткарылган. Алсак, ал оорулууларды сакайткан, өлгөндөрдү тирилткен. Ушундайча өзүнүн Машаяк экенин эле далилдебестен, Ыйык Китепте жазылгандай, келечекте бүт адамзат үчүн ошол сыяктуу кереметтерди жасай турганын тастыктаган. Ошонун аркасында бизде андай кереметтердин болоруна ишенүүгө толук негиз бар (Лука 7:21—23; Аян 21:3, 4). Тирилгенден кийин Иса өзүнүн машаяктык милдетин толук аткара турган убак келгенге чейин Кудайдын «оң жагына» отуруп күтмөк (Забур 110:1—6).
«Машаяк келгенде кантип эле мындан да көп керемет жасасын?» (Жакан 7:31).
Машаяк өз ишин кантип аягына чыгарат?
Исанын күндөрүндө жашаган жүйүттөр Машаяк келгенде аларды римдиктердин эзүүсүнөн бошотуп, Ысрайылдын падышалыгын калыбына келтирет жана ага башчылык кылат деп үмүттөнүшкөн (Элчилер 1:6). Исанын жолун жолдогондор Машаяк ага тапшырылган ишти чоң бийликке ээ, күчтүү рух катары асмандан бүтүрөрүн кийинчерээк гана түшүнүшкөн (Матай 28:18).
ЫЙЫК КИТЕПТЕ ЭМНЕ ДЕЛЕТ?
Экинчи жолу келгенде Машаяк:
-
Кудайдын Падышалыгынын Падышасы катары бүткүл дүйнөлүк өкмөттү башкарат (Даниел 7:13, 14; Аян 11:15).
-
Ага ишенгендердин баарына батасын төгөт (Башталыш 22:17, 18; Забур 72:7, 8).
-
Ага каршы чыккандарды кыйратып, «көптөгөн элдерди» жана алардын башкаруучуларын селт эттирет (Ышая 52:15; Аян 19:19, 20).
-
Ар улуттан турган «эбегейсиз көп» адил адамдарды сактап калып, бейкуттук өкүм сүргөн жаңы дүйнө орнотот (Аян 7:9, 10, 13—17).
-
Жахаба Кудай экөө өлгөндөрдү Бейиштеги жашоого тирилтет (Лука 23:43; Жакан 5:21, 28, 29).
-
Өз жарандарын тынчтыкта жашоого үйрөтөт (Ышая 11:1, 2, 9, 10).
-
Ооруга жана өлүмгө себеп болуп жаткан күнөөнү түп-тамыры менен жок кылат (Жакан 1:29; Римдиктер 5:12).
-
Акырында Шайтандын бардык иштерин кыйратат жана Жахаба Кудайдын бийлиги алдында адамзатты бир үй-бүлө кылып бириктирет (1 Корунттуктар 15:25—28; 1 Жакан 3:8).
Иса жерге келгенде Машаяк катары биринчи ролун толук аткарган. Келечекте экинчи ролун да толугу менен аткарат. Ал жөнүндө көбүрөөк билүүгө аракет кылганыбыз акылдуулукка жатат. Анткени ал өзү жөнүндө: «Мен жолмун, чындыкмын жана өмүрмүн»,— деп айткан (Жакан 14:6).
«Анын күндөрүндө адил адам гүлдөйт, ай жарыгын бербей калганча, тынчтык мол болот. Анын кол алдындагы эли... жердин учу-кыйырына чейин жашайт» (Забур 72:7, 8).
^ абз. 5 «Машаяк» деген сөз еврей тилинен алынган. Грек тилинен алынган «Христос» деген сөз ошол эле мааниге ээ (Жакан 1:41).
^ абз. 7 Келтирилген аяттардын биринчисинде алдын ала айтылган пайгамбарлык, экинчисинде анын аткарылышы жазылган.
Сизге булар да кызыктуу болушу мүмкүн
СУРООЛОР ЖАНА ЖООПТОР
Машаякка байланыштуу пайгамбарлыктар Исанын Машаяк болгонун далилдейби?
Бир нече Машаяк болушу мүмкүн беле?
КҮЗӨТ МУНАРАСЫ
«Биз Машаякты таптык»!
Көптөр Исанын Машаяк болгонуна ишенишет. Башкалар болсо буга ишенбейт. Ыйык Китепте бул тууралуу эмне делерин окуп көргүлө.
