Ingeta. Mbangi za Yave bekwikilanga vo Nkand’a Nzambi wawonso ‘wavumunwinwa kwa Nzambi, una yo mfunu.’ (2 Timoteo 3:16) Ediadi disongele vo tuka Luwawanu Luankulu ye Luwawanu Luampa, nze una utoma yikilwanga. Kansi, e Mbangi za Yave beyikilanga e kunku yayi yau yole Nkand’a Nzambi vo Sono ya Kiyibere ye Sono ya Kingerekia ya Kikristu. Ediadi disadisanga mu katula o nyindu wa wabendomoka wa sia vo e kunku kiankaka kia Nkand’a Nzambi wau vo kia nkulu kiaviokela e ntangwa yovo ke kina diaka mfunu ko.

 Paulu wa ntumwa wavumuninwa kwa Nzambi mu soneka vo: “Kadi konso mana mateka sonekwa, masonekenwa muna longwa kweto.” (Roma 15:4) Muna kuma kiaki, o mambu masonama muna Sono ya Kiyibere mamfunu kikilu. Mankaka muna mambu mama i tusansu twamfunu ye malongi mambote.

•   Tusansu twamfunu. E Sono ya Kiyibere itoma songanga lusansu lwa nsema ye una wantu babwila muna esumu. Kele vo mambu mama ke masonama ko, diampasi diadi kala mu lenda baka e mvutu za yuvu eyi: Akweyi twatuka? Ekuma wantu befwilanga (Etuku 2:7, 17) Vana ntandu, e Sono ya Kiyibere itoma yikanga una Yave wa Nzambi kakadilanga yo wantu bakala ye zingu kiakiese yo bwilwa e mpasi nze ezi zikutubwilanga.—Yakobo 5:17.

•   Malongi mambote. O nkanda Ngana ye Kimpovi mina muna Sono ya Kiyibere, miazala ye malongi ma ngangu mu kuma kia zingu ke meviokelanga ntangwa ko. Metoma songanga una tulenda kadila ye zingu kia nzo kiakiese (Ngana 15:17), una tulenda kadila ye tezo muna diambu dia salu (Ngana 10:4; Kimpovi 4:6) ye una aleke balenda sadila kileke kiau mu mpila yambote (11:9–12:1).

 Vana ntandu, tulenda baka nluta miayingi muna longoka Nsiku a Mose nze una wasonama muna Torá (nkanda ntanu miantete muna Nkand’a Nzambi). Kana una vo Nsiku wau ke wavewa kwa Akristu ko, uvuidi nkanikinu miamfunu milenda kutusadisa mu kala ye zingu kiakiese.—Fuka 19:18; Nsiku 6:5-7.