Bibila kivovanga vo Nzambi ozolele vo wantu “bayikenga muna mavangu ma zumba.” (1 Tesalonika 4:3) Muna Bibila, e mvovo “mavangu ma zumba” usadilwanga mu yika muntu wasompa ovukane yo muntu una vo ke nkaz’andi ko, vukana yakala yo yakala yovo nkento yo nkento, vukana yo muntu kwa kakazala yandi ko vana meso ma luyalu.

•  Ekuma Nzambi kazolele vo yakala yo nkento bakazala muna zinga vamosi se akazi?

•  Nga ke diambote ko yakala yo nkento bazinga vamosi vitila bakazala kimana batoma zayana?

•  Aweyi akazi balenda kadila ye longo lwakiese?

•   Nzambi i tuku dia longo. Nzambi wasikidisa longo vava kakazalesa yakala yo nkento antete. (Tuku 2:22-24) Nzambi kakana ko vo yakala yo nkento bazinga vamosi lembi kazala.

•   Nzambi ozeye edi disundidi o wete kwa wantu. Nzambi wasikidisa o longo mu kala se kangu diakwele mvu vana vena yakala yo nkento kimana diatwasa nlunta yo tanina esi nzo awonso. O luludiku lwa mvangi a kunda yovo meza lusadisanga mu zaya una ufwete yikakeselwa e mabaya. Diau dimosi mpe, o tuludiku twa Nzambi tukutusadisanga mu zaya una tulenda kadila ye zingu kia nzo kiakiese. Ndiona olemvokelanga nsiku mia Nzambi nluta kaka kevuanga.—Yesaya 48:17, 18.

•   Ovukana lembi kazala mfwilu kaka ditwasanga. Muna bonga e nona, ovukana lembi kazala dilenda fila muntu mu yimita lembi yo kana, bakama yimbevo isambukilanga muna vangu diadi yo lukendalalu lwasaka.

•   Nzambi wavana kwa yakala yo nkento lendo kia wuta wana muna vukuna. Kuna kwa Nzambi moyo wantalu. Muna kuma kiaki, e lendo kia wuta wana lukau lwa Nzambi. Ozolele vo twazitisanga lukau lwalu muna lemvokelanga mawonso kasikidisa mu kuma kia longo.—Ayibere 13:4.

 Muna kala ye longo lwakiese, ke divavanga ko vo yakala yo nkento bateka zinga entwandi lembi kazala mu zaya kana vo longo lusikila yovo ve. Kansi, muna kala ye longo lwakiese, yakala yo nkento bafwete salanga entwadi muna sunda konso mpasi balenda wanana zau. a Ediadi disiamisanga o longo.—Matai 19:6.

 Ke vena longo lwa lunga ko. Kansi, akazi balenda kala ye longo lwakiese muna lemvokelanga malongi ma Bibila. Tala nona ilende:

•   Sianga nsatu za nkaz’aku va fulu kiantete.—1 Korinto 7:3-5; Filipi 2:3, 4.

•   Nusongaziananga zola yo zitisa muntu yo nkwandi.—Efeso 5:25, 33.

•   Toma lunga-lunganga lubini lwaku.—Ngana 12:18.

•   Songanga luzindalalu yo lolokanga vana vau.—Kolosai 3:13, 14.