Muna Bibila o mvovo wasekolwa vo “lufuluku,” wabongelwa muna mvovo wa Kingerekia, a·naʹsta·sis, una ye nsasa vo “telama,” yovo “telama diaka.” Avo muntu ofulukidi, ofulwanga muna mafwa yo vutuka zinga diaka.—1 Korinto 15:12, 13.

 O mvovo “lufuluku,” ke umonekanga ko muna Sono ya Kiyibere, izayakene mpe vo Luwawanu Lwankulu, kansi e longi dia lufuluku, dilongwanga mu sono yayi. Muna bona e nona, Nzambi wasia nsilu kwa Osea wa ngunza vo: “Ikubavevola muna nkum’a Ziami; Ikubakûla muna lufwa.”—Osea 13:14; Yobi 14:13-15; Yesaya 26:19; Daniele 12:2, 13.

 Akweyi wantu befutumukina? Wantu ankaka befutumunua yo kwenda kuna zulu muna yala yo Kristu. (2 Korinto 5:1; Lusengomono 5:9, 10) Bibila kiyikilanga lufuluku lwalu vo “lufuluku lwantete,” kadi i lwau luvita vangama. O mvovo wau usonganga vo vena diaka ye lufuluku lwankaka luvagama. (Lusengomono 20:6; Filipi 3:11) Ulolo wa wantu befutumunua mu lufuluku lwanzole, bezingila vava ntoto.—Nkunga 37:29.

 Aweyi wantu befutumukina? Nzambi wavana Yesu o nkuma wafutumuna wantu. (Yoane 11:25) Yesu ofutumuna “awonso bena muna ziami,” konso muntu ye kiwuntu kiandi ye ngindu zandi mpe. (Yoane 5:28, 29) Awana befulwa yo kwenda kuna zulu, bevewa nitu ya kimwanda, vo i awana befulwa ova ntoto, bekala ye nitu ya kinsuni, bekala ye mpe ye mavimpi mambote.—Yesaya 33:24; 35:5, 6; 1 Korinto 15:42-44, 50.

 Nani ofuluka? Bibila kivovanga vo: “Vekala yo lufuluku lwa ansongi ye awana bena vo ke ansongi ko.” (Mavangu 24:15) Wantu awaya ansongi i akwa kwikizi nze, Noa, Sara yo Abarayama. (Tuku 6:9; Ayibere 11:11; Yakobo 2:21) Awana bena vo ke ansongi ko i wantu ana ke balemvokela Nzambi ko kadi ke bakala ye lau dia longoka malongi mandi ko.

 Kansi, awana bakala vo yimpumbulu yo lembi soba e mpila zingu kiau, ke befutumunua ko. Avo muntu a mpila yayi ofwidi, ofwaswa emvimba lembi kala ye lau dia zinga diaka.—Matai 23:33; Ayibere 10:26, 27.

 Nkia ntangwa o lufuluku luvangama? Bibila kivovanga vo lufuluku kuna zulu luvangama muna ngiz’a Kristu eyi yayantika muna mvu wa 1914. (1 Korinto 15:21-23) O lufuluku ova ntoto luvangama muna kolo kia Luyalu lwa Yesu Kristu lwa Funda dia Mvu, vava ntoto ukituka se paradiso.—Luka 23:43; Lusengomono 20:6, 12, 13.

 Ekuma tufwete kwikidila muna lufuluku? Bibila kivovelanga lusansu lwa lufuluku lwa wantu nana, vava kiavangama konso lufuluku vakala ambangi bamona diambu diadi. (1 Ntinu 17:17-24; 2 Ntinu 4:32-37; 13:20, 21; Luka 7:11-17; 8:40-56; Yoane 11:38-44; Mavangu 9:36-42; 20:7-12; 1 Korinto 15:3-6) O lufuluku lwa Lazaro lwamfunu kibeni kadi vava Yesu kamfutumuna wakifwila kala lumbu yá ye wavanga e sivi diadi vana fulu kia ndong’ayingi. (Yoane 11:39, 42) Kana nkutu mbeni za Yesu bamona e sivi diadi, muna kuma kiaki bavava vonda Yesu yo Lazaro.—Yoane 11:47, 53; 12:9-11.

 Bibila kisonganga vo Nzambi una yo nkuma ye luzolo lwa futumuna wantu. Olundanga mambu mawonso matadidi konso muntu ona kefutumuna muna nkum’andi wampwena. (Yobi 37:23; Matai 10:30; Luka 20:37, 38) Nzambi olenda fula wantu ye ozolele wo vanga. Mu kuma kia lufuluku, Bibila kivovanga vo Nzambi una ye ‘viangi muna salu kia moko mandi.’—Yobi 14:15.

Ngindu zabendomoka mu kuma kia lufuluku

 Luvunu: O lufuluku i vutulwisa moyo muna nitu.

 Ludi: Bibila kilonganga vo moyo i muntu, kansi ke lekwa ko kivaikanga kunima lufwa. (Tuku 2:7; Yezekele 18:4) Ozevo, lufuluku ke bundikisa moyo ye nitu ko, kansi i vangulula emvimba o muntu.

 Luvunu: Wantu ankaka befutumunua ye fwaswa vana vau.

 Ludi: Bibila kivovanga vo “awana bavanga mambu mambi, befulwa mu fundiswa.” (Yoane 5:29) Kansi, befundisilwa mu kuma kia mambu bevanga, ke mu kuma kia mana bateka vanga ko vitila bafwa. Yesu wavova vo: “O mafwa mewa e nding’a Mwan’a Nzambi, awana besia sungididi bekala o moyo.” (Yoane 5:25) Awana betamba o matu yovo ana belemvokela mana belongoka vava befuluka, e nkumbu zau zisonekwa muna “nkand’a moyo.”—Lusengomono 20:12, 13.

 Luvunu: Awana befuluka, bekala ye nitu ina bakala yau vitila bafwa.

 Ludi: Vava muntu kefwanga, e nitu andi ‘ivutukanga muna ntoto,’ i sia vo, ifwasukanga emvimba.—Kimpovi 3:19, 20.