LONGI DIA 01
E Bibila Aweyi Kilenda Tomesena e Zingu Kiaku?
Yeto awonso yuvu yayingi tuyuvulanga mu kuma kia zingu, mpasi, lufwa ye mambu mebwa kuna ntwala. Tutokananga mpe mu kuma kia una tulenda vuila e nzimbu muna lungisa e nsatu zeto za lumbu ke lumbu ye una tulenda kadila ye zingu kia nzo kiakiese. Ndonga bevovanga vo e Bibila kikubasadisanga mu baka mvutu za yuvu yau yamfunu. Kikubavananga mpe malongi mekubasadisanga muna zingu kia lumbu ke lumbu. Nga obenze vo e Bibila kilenda sadisa wantu awonso?
1. Nkia yuvu yankaka ivaninuanga e mvutu muna Bibila?
Bibila kivananga mvutu za yuvu eyi yamfunu: O moyo aweyi wayantikila? Adieyi i kani dia zingu? Ekuma wantu bemwenanga e mpasi? Adieyi dibwanga avo muntu ofwidi? Wau vo wantu awonso luvuvamu bezolanga, ekuma e nza izadidi ye vita? Adieyi divangama ova ntoto kuna sentu? Bibila kikutukasakesanga vo twavava e mvutu za yuvu yayi. Wantu ayingi besololanga e mvutu zina zikubayangidikanga.
2. E Bibila aweyi kilenda kutusadisila mu yangalela e zingu kia lumbu ke lumbu?
Bibila kikutuvananga malongi mambote. Muna bonga e nona, kilonganga esi nzo una balenda kadila ye kiese kiakieleka. Kikutuzayisanga mpe dina tulenda vanga vava tukalanga ye ntokani ye una tulenda yangalela e salu kieto. Ekolo tufimpa e longi diadi, ozaya dina e Bibila kilonganga mu kuma kia mambu mama ye mankaka mpe. Nanga okwikila vo “e Sono yawonso [mawonso mena muna Bibila] . . . yamfunu.”—2 Timoteo 3:16.
O nkanda wau ke uvingidi va fulu kia Bibila ko. Kansi, ukusadisa mu longoka e Bibila ngeye kibeni. Ozevo, tulombele watanganga e sono ya Bibila ina muna malongi yo tezanesa yo ye mambu olongokanga.
ZAYA DIAKA MANKAKA
Zaya una e Bibila kisadisilanga o wantu, una olenda yangalela tanga e Bibila ye e kuma dinina diamfunu mu vava lusadisu mu bakula mana otanganga muna Bibila.
3. Bibila kilenda kutufila
Bibila kilenda tezaneswa yo mwinda. Bibila kilenda kutusadisa mu baka nzengo zambote yo zaya mana mevangama kuna ntwala.
Tanga Nkunga 119:105, i bosi, vana e mvutu za yuvu ilende:
-
O nsoneki a nkunga wau aweyi kamwenanga e Bibila?
-
Vo i ngeye, aweyi omwenanga e Bibila?
4. Bibila kilenda vana mvutu za yuvu yeto
Nkento mosi wamona vo Bibila kiavana e mvutu za yuvu yantokanesanga mu mvu miayingi. Tala e VIDEO, i bosi, vana e mvutu za yuvu ilende.
-
O nkento oyikwanga muna video, nkia yuvu kakiyuvulanga?
-
E longi dia Bibila aweyi diasadisila nkento ndioyo?
Bibila kikutukasakesanga vo twayuvulanga e yuvu. Tanga Matai 7:7, i bosi, vana e mvutu za kiuvu eki:
-
Nkia yuvu una yau ozolele bakila e mvutu muna Bibila?
5. Olenda yangalela tanga e Bibila
Wantu ayingi beyangalelanga tanga e Bibila yo baka nluta. Tala e VIDEO, i bosi, vana e mvutu za yuvu ilende.
-
Aleke omwene muna video, ekuma ke bezolelanga tanga ko?
-
Kanele vo ke bena ye fu kia tanga ko, ekuma beyangalelanga tanga e Bibila?
E malongi ma Bibila malenda kutuvana lufiaulwisu ye vuvu. Tanga Roma 15:4, i bosi, vana e mvutu za kiuvu eki:
-
Nga ozolele zaya mayingi mu kuma kia nsilu uyikwanga mu sono kiaki?
6. Akaka balenda kutusadisa mu bakula mana tutanganga muna Bibila
Kanele vo akaka betanganga e Bibila yau kibeni, wantu ayingi bemonanga vo lusadisu lwa wantu ankaka bavuidi o mfunu mu bakula mana betanganga muna Bibila. Tanga Mavangu 8:26-31, i bosi, vana e mvutu za kiuvu eki:
-
Aweyi tulenda bakulwila mana tutanganga muna Bibila?—Tala e tini kia 30 ye 31.
Yakala dimosi wa musi Etiopia, lusadisu kavava mu bakula e Sono. O unu, wantu ayingi bemonanga vo lusadisu lwa wantu ankaka bavuidi o mfunu mu bakula mana betanganga muna Bibila
AVO MUNTU UVOVESE VO: “Ke dina kwandi mfunu ko mu longoka e Bibila.”
-
Adieyi okumvovesa? Ekuma?
MAMBU MASINA MA LONGI DIADI
Bibila kivananga malongi mamfunu muna mambu ma lumbu ke lumbu, kivananga mpe mvutu za yuvu yamfunu yo vana lufiaulwisu ye vuvu kwa wantu.
Nkia Mambu Olongokele?
-
Nkia malongi tulenda solola muna Bibila?
-
Nkia yuvu yankaka ivaninuanga e mvutu muna Bibila?
-
Nkia mambu ozolele longoka muna Bibila?
TALA MPE OMA MALENDE
Tala una malongi ma Bibila menena o mfunu mu lumbu yeto.
“Malongi ma Nkand’a Nzambi ma Tandu Yawonso” (Eyingidilu No. 1 2018)
Tala una Bibila kiasadisila muntu mosi wanuananga ye ngindu zabendomoka tuka muna kileke kiandi.
Fimpa malongi ma Bibila mu kuma kia zingu kia esi nzo.
“12 Segredos para uma família ser feliz” (Sikama! No. 2 2018)
Zaya una Bibila kisingikilanga ngindu zabendomoka za wantu mu kuma kia nyadi a nza yayi.
Nanga Oyangalela Mpe Malongi Mama
YUVU ITOMA YUVULWANGA
Ameyi Mevangamanga Muna Longi dia Bibila ye Mbangi za Yave?
Muna programa yayi ya ngovo ya longokela isadilwanga kwa Mbangi za Yave, olenda sadila kwaku konso nsekola ya Bibila. Olenda kwaku bokelesa esi nzo aku yawonso yovo akundi aku ana ozolele.
