Wantu batukidi kuna Este. I afimpi a ntetembwa, yau belongokanga e kadilu kia ntetembwa, bevovanga vo bena ye lendo kia sakula mambu mebwilwanga wantu. (Yesaya 47:13) Wau bena kuna vata diau, kuna Este, bamwene “ntetembwa,” balende yo kilometa zayingi. Ke ibanete ntete kuna Beteleme ko, kansi kuna Yerusaleme.

Wau afimpi a ntetembwa balweke muna mbanza Yerusaleme, bayuvuidi vo: “Akweyi kena o ntinu a Yuda ona owutukidi? Kadi tumwene ntetembw’andi vava tukedi kuna Este, twizidi twankunda.”—Matai 2:1, 2.

Erodi wa ntinu kuna Yerusaleme owidi e nsangu zazi, ofungidi kikilu makasi. Obokelese mbuta za nganga ye mfumu za dibundi dia Ayuda, ubayuvuidi kana akweyi o Kristu kewutukila. Landila e Sono, bavutwidi vo: “Muna Beteleme.” (Matai 2:5; Mika 5:2) Muna kuma kiaki, Erodi obokelese afimpi a ntetembwa kuna sweki, ubavovese vo: “Nwenda toma vava e kingiana-ngiana, avo nunsolwele, nwiza kunsamunwina, kimana omono mpe ngienda, yankunda.” (Matai2:8) Kansi, Erodi ozolele solola kingiana-ngiana kimana kamvonda.

Afimpi a ntetembwa wau bavaikidi, vavangamene diambu diasivi. E ntetembwa ina bamona vava bakala kuna Este, ibavitidi kuna ntwala. Kieleka, e ntetembwa yayi yasivi, kadi yamoneka kimana yabasonga e nzila. Afimpi a ntetembwa balende yo yavana yatelama vana nzo yakala Yosefe yo Maria kumosi yo mwan’au.

Vava bakotele muna nzo, bamwene Maria ye mwan’andi, Yesu. Vana vau, afimpi a ntetembwa bakundidi Yesu. I bosi, bamvene tukau twa wolo, ndumbu a dimbu ye mô. Wau bazolele vutuka kwa Erodi, basiminu kwa Nzambi muna ndozi. Dianu vo, bele kuna nsi au muna nzila yankaka.

Nani obenze watuma “ntetembwa” yayina kimana yasonga e nzila kw’afimpi a ntetembwa? Sungamena dio vo, vana fulu kia kubafila kwa Yesu kuna Beteleme, yibafididi ntete kuna Yerusaleme, i kûna bawananene yo Erodi wa Ntinu ona ozolele vonda Yesu. Kele vo Nzambi kavangi diambu ko yo lukisa afimpi a ntetembwa balembi zayisa Erodi e fulu Yesu kakala, wadi kumvonda kikilu. Kieleka, Satana wa ntantu a Nzambi wazola vonda Yesu, wasadila ntetembwa yayi mu lungisa e kani diandi.