NGA ozeye aki nani awaya ye adieyi bevanganga? Ku vita bekwendanga. Ana bavitidi o ntu mu yimbila bena. Nanga olenda yuvula: ‘Ekuma ayimbidi ke bena ye nsosolo ko ngatu madionga?’ Tusinga zaya ekuma.

O Yosafate ntinu a makanda mole ma Isaele. Wazinganga muna lumbu ya Akabi yo Izebele wa ntinu a makanda 10. Kansi, Yosafate ntinu ambote, o Asa w’es’andi mpe ntinu ambote kakala. Ozevo, nkangu wa kintinu kia makanda mole kuna sude zingu kiambote bakala kiau.

Kansi, owau vabwidi diambu dimwesese nkangu o wonga. Basamunwini Yosafate vo: ‘Ndong’ayingi izidi kunwanisa, ituka kuna Moabe, Amone ye muna Mongo a Seyire.’ Ndonga muna Aneyisaele balungalakene muna Yerusaleme mu lomba lusadisu kwa Yave. Bele muna tempelo, o Yosafate osambidi vo: ‘Yave wa Nzambi eto, ke tuzeye edi tuvanga ko. Ke tuna ye ngolo ko muna ndonga ya makesa mama. Lusadisu lwaku tuvava.’

O Yave owidi e sambu kiau. Otumini ntaudi andi kavovesa nkangu vo: “E vita ke yeno ko, ya Nzambi kaka. Ke nuvwa mfunu a nwana ko; nukiatama, yo mona mpuluz’a Yave muna yeno.”

Muna lumbu kia landa muna mene o Yosafate ovovese nkangu vo: ‘Nubunda Yave e vuvu.’ Osidi ayimbidi kuna ntu a makesa. Bayantikidi o yimbila yo kembela Yave ekolo bayendanga. Nga ozeye edi diabwa vava bafinama kuna fulu kia vita? Yave oyambwidi vo makesa m’atantu bavondaziana. Vava Aneyisaele baluaka, ke vasala kana mosi ko, yau awonso bafwa.

Nga ke diangangu ko kavanga o Yosafate mu bunda Yave e vuvu? Oyeto mpe diangangu tuvanga avo tubunda Yave e vuvu.