Yonatane wa mwan’antete a ntinu Saulu, kesa dia unkabu kakala. Davidi wavova vo Yonatane nswalu kakala lutila ngo ezulu, o nkum’andi lutila e nkosi. Lumbu kimosi, Yonatane wamona 20 ma makesa ma Felesetia vana mongo. Wavovesa toko dianatanga e nuaninua yandi vo: ‘Tukubanuanisa kaka avo Yave utuvene sinsu. Avo Afelesetia batuvovese vo nuiza oku twina, tuzaya vo yayi i ntangwa ya nuana.’ Afelesetia bakaza vo: ‘Nuiza twanuana’. Muna kuma kiaki, makesa mole mama batomboka vana mongo yo sunda e buka kiakina kia masoladi.

Wau vo Yonatane i mwan’antete a ntinu Saulu, yandi wadi vinga vana kunda kia kintinu. Kansi, Yonatane wazaya wo vo Yave wasola Davidi mu kala ntinu a Isaele. Kana una vo i wau, kamwena Davidi kimpala ko. Yonatane yo Davidi bakituka akundi  ambote. Basilana o nsilu vo belunga-lunga yo tanina muntu yo nkwandi. Yonatane wavana Davidi mvuatu, nsosolo, tá ye mpond’andi kimana yakala se sinsu kia kikundi kiau.

Vava Davidi katinanga Saulu, Yonatane wayenda kuna kakala yo kumvovesa vo: ‘Kala ye nkuma yo unkabu. Yave ngeye kasolele wakala se ntinu. Kana nkutu se diame otomene wo zaya.’ Nga ozolele kala yo nkundi ambote nze Yonatane?

Nkumbu miayingi, Yonatane wasianga e zingu kiandi mu vonza mu tanina nkundi andi. Wazaya wo vo Saulu wa ntinu wavavanga vonda Davidi. Muna kuma kiaki, wavovesa se diandi vo: ‘Avo ovondele Davidi, sumu diampwena ovola kadi kavangidi diambu diambi ko.’ Saulu wafungila Yonatane makasi. Vioka mvu miayingi, Saulu ye Yonatane bafwa kumosi muna mvita.

Vava Yonatane kafwa, Davidi wavava Mefibosete wa mwan’a Yonatane. Vava Davidi kansolola, wavovesa Mefibosete vo: ‘Wau vo se diaku nkundi ambote kakala kwa mono, ikulunga-lunga muna zingu kiaku kiawonso. Kuna nzo ame ozingila yo dila vana mesa mame.’ Davidi kasidi vilakana nkundi andi Yonatane ko.