Vava kiafinama lufwa lwandi, Yesu wamokena ye alongoki andi ayá, Petelo, Yakobo, Yoane yo Andere. Wabazayisa e sinsu kia ngiz’andi muna lumbu yambaninu ye wavanga kiuvu kiaki kiamfunu: “Nani i ntaudi akwikizi yo lulungalalu, ina isiwa kwa mfumu andi e kiyekwa kia nzo andi, kabavana madia muna ntangw’andi?” (Matai 24:​3, 45; Maku 13:​3, 4) Yesu i “mfumu,” wavovesa alongoki andi vo osola “ntaudi” ona ovana madia ma mwanda kwa alandi andi mu lumbu yayi yambaninu. Nani i ntaudi ndioyu?

Buka kiakete kia alandi a Yesu bakuswa muna mwanda. O “ntaudi,” i Selo Yambuta ya Mbangi za Yave. Ovananga madia ma mwanda kwa asambidi a Yave muna ntangw’andi. Oyeto, buka kiaki kia ntaudi akwikizi tutadilanga muna tambula e “nkuta muna ntangw’andi.”​—Luka 12:42.

Belunga-lunganga nkutakani a Nzambi. (1 Timoteo 3:​15) Yesu wayekeka mbebe ampwena kwa ntaudi akwikizi ya lunga-lunga e salu kia ndambu a nkubika a Yave ova ntoto, i sia vo lunga-lunga mavwa mandi, salu kia samuna nsangu zambote ye kia kutulonga muna nkutakani zeto. Muna kutuvana ina tuvuidi o mfunu muna ntangw’andi, o “ntaudi akwikizi yo lulungalalu” ovananga madia ma mwanda muna vaikisa e nkanda tusadilanga mu salu kieto kia umbangi, ye malongi tulongwanga muna tukutakanu tweto.

E buka kia ntaudi akwikizi kisonganga e kwikizi muna tatidila e ludi kia Nkand’a Nzambi ye salu kia samuna e nsangu zambote. Kialungalala mu mpila kilunga-lungilanga e salanganu ya Kristu ova ntoto. (Mavangu 10:​42) E salu kiaki kiwokelanga muna nsambu za Yave.​—Yesaya 60:22; 65:13.

• Yesu nani kasola mu dikila alongoki andi muna mwanda?

• Aweyi o “ntaudi” kesongelanga kwikizi yo lulungalalu?