“Kana una vo e COVID-19 ke vuku diaka ko kia nza yawonso, ediadi ke disongele ko vo e kimbevo kiaki ke vonza diaka ko kia vimpi wa wantu mu nza yawonso. Tukala ye ziku vo kuna sentu vesinga vaika diaka vuku kiankaka, tufwete kala twakubama mu kuma kia diambu diadi.”—Dr. Tedros Adhanom Ghebreyesus, diretor-geral da Organização Mundial da Saúde, kia 22 kia Mayu kia 2023.

 Wantu ayingi bakinu mona e mpasi muna nitu ye muna ngindu mu kuma kia COVID-19. Nga ayadi ye nkubika zitalanga mambu ma mawuku bekala bakubama mu kuma kia vuku kisinga kwiza? Nga balenda kikilu kutusadisa mu sunda e mpasi za mayela tunuananga zau owau?

 E Bibila kiyikanga luyalu olu lusinga twasa mawuku mana tuvuidi kikilu o mfunu. Kivovanga vo: “O Nzambi a zulu otongeka kintinu,” yovo luyalu. (Daniele 2:44) Vava luyalu lolo luyala e nza, o wantu mu nza “ke mosi ko ovova vo: ‘Yayela ngina.’” (Yesaya 33:24) Wantu awonso bekala yo mavimpi mambote ye ngolo zayingi, una bakala vava bakala matoko.—Yobi 33:25.