Yezekele 18:1-32
18 E diambu dia Yave dizidi diaka kwa mono, oku vo:
2 “Ayeyi i nsas’a kingana kiaki nutanga muna nsi a Isaele vo: ‘O mase i badidi e uva zina e ngani, kansi o meno ma wana i mena ngani’?+
3 “‘E nkal’ame kaka,’ u kavovele o Mfumu Yave, ‘ke nutá diaka kingana kiaki ko muna Isaele.
4 Tala! E mioyo* miawonso mono mvuidi mio. O moyo a se yo moyo a mwana mono mvuidi wo. O moyo una usumuka, fwa ufwa.*
5 “‘Yindula muntu una vo nkwa unsongi, ovanganga mambu mansongi ye mambu mambote,
6 ke dianga yimenga ya teke ko vana miongo;+ kesengolanga meso mandi kwa teke yangemi* ko ya nzo a Isaele; ke tanga zumba yo nkento a mfinangani+ andi ko yovo vukana yo nkento una ku ngonde;+
7 ke vanganga muntu mbi ko,+ kansi ovutulanga kina kaveno se nsimbi kwa ndevi;+ ke yiyanga muntu ko,+ kansi ovananga madia mandi kwa mumfwe a nzala+ yo vuika ndiona wina e nkonga;+
8 avo odevese ke vavanga nluta ko yovo ndandu,+ kansi ovenganga vanga mambu makondwa unsongi;+ mu unsongi kefundisilanga e diambu vana vena muntu yo nkwandi;+
9 okwamanananga diatila muna nsiku miame yo lunda e nzengo zame za mfundisa kimana kavanga mambu ma ziku; muntu ndioyo nkwa unsongi, okwamanana zinga,’+ u kavovele o Mfumu Yave.
10 “‘Kansi, yindula vo muntu ndioyo owutidi mwana una vo mwivi+ yovo mvondi*+ yovo ovanganga maka muna mambu mama
11 (kana una vo o se ke vanganga mambu mama ko)—odianga yimenga ya teke vana miongo, otanga e zumba yo nkento a mfinangani andi,
12 omwesanga munkondwa nsadisi ye nsukami+ e mpasi, mwivi, ke vutulanga ko kina kaveno se nsimbi kwa ndevi, osengolanga meso kwa teke yangemi,+ ovanganga mambu mangemi,+
13 avo odevese, nluta ye ndandu kevavanga+—mwana ndioyo ke kwamanana zinga ko. Fwa kikilu kefwa mu kuma kia mambu mama mawonso mangemi kevanganga. O menga mandi mekala vana ntu andi.
14 “‘Kansi, yindula vo o se owutidi mwana, o mwana ndioyo omwene masumu mawonso kevanganga o se diandi, kana una vo i wau, kavangidi mambu momo ko.
15 Ke dianga yimenga ya teke ko vana miongo; ke sengolanga meso mandi kwa teke yangemi ko ya nzo a Isaele; ke tanga zumba yo nkento a mfinangani andi ko;
16 ke vanganga muntu mbi ko, kansi ovutulanga kina kaveno se nsimbi kwa ndevi; ke yiyanga muntu ko; ovananga madia mandi kwa mumfwe a nzala yo vuika ndiona wina e nkonga;
17 ke mwesanga nsukami mpasi ko; avo odevese ke vavanga nluta ko yovo ndandu; olemvokelanga e nzengo zame za mfundisa yo diatila muna nsiku miame; o muntu ndioyo ke fwila mu kuma kia bi wa se diandi ko. Kieleka, okwamanana kaka zinga.
18 Kansi, wau vo se diandi mvunginiki, oyiyidi mpangi andi ye ovanganga mambu mambi vana vena nkangu andi, oyandi ofwa mu kuma kia bi wandi.
19 “‘Kansi oyeno nuyuvula vo: “Ekuma o mwana kalembi natina o nkanu mu kuma kia bi wa se diandi?” Wau vo mwana ovangidi edi diambote ye edi diansongi, okwamanene landa e nsiku miame miawonso yo lunda mio, okwamanana kieleka zinga.+
20 O moyo una usumuka i wau ufwa.*+ O mwana ke nata nkanu ko mu kuma kia bi wa se diandi, o se mpe ke nata nkanu ko mu kuma kia bi wa mwan’andi. O nkwa unsongi ofundisilwa mun’owu wa unsongi wandi, o muntu ambi mpe ofundisilwa mun’owu wa bi wandi.+
21 “‘Avo muntu ambi oyambwidi masumu mawonso mana kavolele yo kwamanana lunda e nsiku miame yo vanga diambu diambote ye diambu diansongi, kieleka, okwamanana zinga. Ke fwa ko.+
22 Nzambi ke kuntumba ko mu kuma kia konso sumu dina kavolele.*+ Oyandi okwamanana zinga wau kevanganga diambu diansongi.’+
23 “‘Nga iyangalelanga lufwa lwa muntu ambi e?’+ u kavovele o Mfumu Yave. ‘Nga kivavanga ko vo muntu ndioyo kayambula e nzila zandi ye kakwamanana zinga e?’+
24 “‘Kuna diak’e sambu, avo muntu ansongi oyambwidi unsongi wandi yo vanga diambu diambi, kavanga mambu mawonso mangemi mana wantu ambi bevanganga, nga okwamanana zinga e? Ke dimosi ko muna mavangu mandi ma unsongi disungamenua.+ Oyandi ofwa mu kuma kia kondwa kwandi kwa kwikizi ye sumu dina kavolele.+
25 “‘Kansi oyeno nuvova vo: “E nzil’a Yave ke yansongi ko.”+ Dodokolo nuwá, e nzo a Isaele! Nga e nzil’ame i ke yansongi ko e?+ Nga ke nzila zeno ko i zalembi songa e?+
26 “‘Avo muntu ansongi oyambwidi unsongi wandi yo vanga diambu diambi yo fwa, ofwa mu kuma kia bi wandi.
27 “‘Avo muntu ambi oyambwidi o bi wandi kevanganga yo yantika vanga diambu diambote ye diambu diansongi, ovuluza moyo* andi.+
28 Avo yandi kibeni obakwidi ye oyambwidi o bi wandi wawonso kavangidinge, kieleka, okwamanana zinga. Ke fwa ko.
29 “‘Kansi e nzo a Isaele ivova vo: “E nzil’a Yave ke yansongi ko.” E nzo a Isaele, nga e nzil’ame kikilu i ke yansongi ko e?+ Nga ke nzila zeno ko i zalembi songa e?’
30 “‘Ozevo, e nzo a Isaele, ifundisa konso muntu mu yeno mun’owu wa nzila zandi,’+ u kavovele o Mfumu Yave. ‘Nuyambula, elo, nuyambula emvimba o bi weno wawonso kimana walembi kala se tadi diatela sakuba, dikunutwasila o nkanu.
31 Nukatula omu yeno o bi wawonso una nuvangidi,+ nuyima* ntim’ampa yo mwand’ampa.+ Kadi, ekuma nufwila, e nzo a Isaele?’+
32 “‘Kiyangalelanga lufwa lwa muntu ko,’+ u kavovele o Mfumu Yave. ‘Muna kuma kiaki nuviluka, nuazinga.’”+
Mvovo vana yand'a lukaya
^ Yovo “O muntu ona osumuka, fwa kefwa.” Tala Nsas’a Mvovo, “Moyo.”
^ Tala Nsas’a Mvovo.
^ O mvovo wa Kiyibere nanga ngwizani wina yo mvovo “doti,” usadilwanga se mvovo a luvezo.
^ Mvovo wa sina: “mbungudi a menga.”
^ Yovo “O muntu ona osumuka, fwa kefwa.”
^ Mvovo wa sina: “Nzambi ke sungamena kana dimosi ko muna masumu kavolele.”
^ Tala Nsas’a Mvovo.
^ Mvovo wa sina: “nuyivangila.”
