Yesaya 37:1-38
37 Vava o Kizekeya wa Ntinu kawidi wo, otiazwini e mvuatu miandi, ovuete e ngoto, okotele muna nzo a Yave.+
2 I bosi, otumini Eleyakime ona wavitanga o ntu muna nzo,* yo Sebena wa nsoneki ye akuluntu vana vena anganga ana bavuete e ngoto, benda kwa Yesaya wa ngunza+ wa mwan’a Amoze.
3 Bamvovese vo: “I wau wuwu kavovele o Kizekeya: ‘E lumbu kiaki lumbu kiampasi, kialusembo* ye kiansoni; kadi o wana bazolele wutuka, kansi o ngudi kena ye ngolo za wuta ko.+
4 Nanga o Yave wa Nzambi aku owá e mvovo mia Rabesake, ona otuminu kwa mfumu andi, o ntinu a Asuri, kimana keza fidisa Nzambi amoyo e mpaka,+ o Yave wa Nzambi aku kamvutulwila mun’owu wa mvovo mina kawidi. Muna kuma kiaki, samba+ muna wete dia nkangu una o moyo.’”+
5 Muna diadi, e selo ya Kizekeya wa Ntinu bele kwa Yesaya,+
6 o Yesaya ubavovese vo: “I wau wuwu nuvova kwa mfumu eno, ‘I wau wuwu kavovele o Yave: “Kumoni wonga ko+ mu kuma kia mvovo mina owidi, e mvovo mialutiangu mina e selo ya ntinu a Asuri+ bavovele mu kuma kiame.
7 Kadi ivilakesa e ngindu zandi,* owá e nsangu yo vutuka kuna nsi andi;+ ikumfila kafwila muna nsosolo kuna nsi andi.”’”+
8 Vava Rabesake kawidi vo ntinu a Asuri okatukidi kuna Lakisi, wele kwa yandi, unwene ekolo kenuanisanga Libena.+
9 I bosi, o Ntinu owidi nsangu mu kuma kia Tinkaka wa Ntinu a Etiopia vo: “Oyandi ovaikidi keza nuana yaku.” Vava kawidi wo, otwikidi diaka anati a nsangu kwa Kizekeya,+ oku vo:
10 “I wau wuwu nuvovesa Kizekeya wa Ntinu a Yuda: ‘Kuyambula ko vo Nzambi aku ona obundanga e vuvu kavuna, oku vo: “Yerusaleme ke iyekolwa vana moko ma ntinu a Asuri ko.”+
11 Tala! Ongeye owidi mana atinu a Asuri bavangidi muna nsi zawonso, e mpila bafwasidi zo.+ Nga obenze vo ngeye kaka ovuluka e?
12 E nzambi za zula, nga zavuluza e zula ina akulu ame bafwasa e?+ Akweyi ina e Ngozane, Karani,+ Rezefe yo nkangu a Edene una wakala muna Telasa?
13 Akweyi kena o ntinu a Kamati, o ntinu a Ampadi yo ntinu a mbanz’a Sefavayime,+ a mbanz’a Ena ye Iva?’”
14 Kizekeya otambwidi e nkanda vana moko ma anati a nsangu, otangidi mio. I bosi, Kizekeya otombokele kuna nzo a Yave, oyalumwini mio* vana ntadisi a Yave.+
15 Kizekeya oyantikidi samba kwa Yave,+ oku vo:
16 “E Yave a vu,+ wa Nzambi a Isaele, ovuende vana kunda kia kimfumu vana ntandu a* akelubi, ngeye kaka i Nzambi aludi muna yintinu yawonso ova ntoto. Ngeye wavanga e zulu yo ntoto.
17 E Yave, tamba o matu maku yo wá!+ E Yave, temona o meso maku yo mona!+ Wá e mvovo miawonso mina Sankerebe katumini mu tonta Nzambi amoyo.+
18 Kieleka, e Yave, atinu a Asuri bafwasidi e nsi zawonso+ kumosi ye nsi au.
19 Batubidi e nzambi zau vana tiya,+ kadi ke nzambi ko kansi salu ya moko ma wantu,+ nti ye matadi. I kuma bafwasidi zo.
20 Kansi owau, e Yave wa Nzambi eto, utuvuluza vana moko mandi, kimana yintinu yawonso ya nza yazaya wo vo ngeye kaka i Nzambi, e Yave.”+
21 I bosi, Yesaya wa mwan’a Amoze, otwikidi nsangu ezi kwa Kizekeya: “I wau wuwu kavovele o Yave wa Nzambi a Isaele: ‘Wau vo osambidi kwa mono mu kuma kia Sankerebe wa Ntinu a Asuri,+
22 edi kavovele o Yave mu kuma kiandi:
“O mwenze wa mwan’ankento a Zione uvezele yo kuseva.
O mwan’ankento a Yerusaleme uninginisini o ntu.
23 Nani ofidisi e mpaka+ yo tianguna e?
Kwa nani ozangwidi e ndinga,+Yo sengola o meso maku ma lulendo e?
Kwa Mvauki a Isaele!+
24 Ovezele Yave muna selo yaku+ yo vova vo:
‘Ye ulolo wa makalu mame ma vitaItomboka kuna mbata za miongo,+Kuna zunga ya Lebanone ina kwandá kikilu.
Ikesa e nti miandá mia nsedele ye sipelese zandi zambote.
Ikota muna matininu mandi masundidi o lá, muna mfinda zandi zankaki.
25 Itimuna e sima yo nua maza;Iyumisa nkoko mia* Engipito muna tambi yame.’
26 Nga kuwidi ko e? Ediadi se kolo diasikidiswa.*
Yakubika* dio tuka muna lumbu ya nz’ankulu.+
Owau ilungisa dio.+
Ongeye okitula e mbanza zazungwa e yaka se mazumbu.+
27 O nkangu au ke ukala ye ntanini ko;Bezakama yo wonga yo fusulwiswa e nsoni.
Bekituka nze titi ya nzanza ye titi yankunzu,Nze titi imenene vana nkala yo yumiswa kwa tembwa kia este.
28 Kansi, ntomene zaya vava ovuandanga, vava ovaikanga ye vava okotanga,+Ye vava okumfungilanga makasi,+
29 Kadi o makasi umfungidi+ ye nkwit’aku ilweke omu matu mame.+
Muna kuma kiaki, isia luvaku lwame muna nzunu aku ye bindikilwa+ muna nua aku,Ikuvutulwila muna nzila ina wizidi.”
30 “‘Ekiaki kikala se sinsu kwa ngeye:* Omu mvu wau oyeno nudia ina ikuyimenena;* muna mvu una wanzole, nudia mbwaza za makunde ma ina ikuyimenena; kansi muna mvu una wantatu, nukuna yo vela e mbongo, nukuna mpatu za vinyu yo dia e bundu yandi.+
31 Awana bevuluka muna nzo a Yuda, i sia vo, awana besala,+ bemena e mianzi kuna nsi yo yima e bundu muna tayi.
32 Kadi muna Yerusaleme muvaika nsadiswa, muna Mongo a Zione muvaika awana besala o moyo.+ O vema kwa Yave a vu kuvanga wo.+
33 “‘Ozevo, i wau wuwu kavovele o Yave mu kuma kia ntinu a Asuri:+
“Ke kota mu mbanza yayi ko+Yovo tuba mo e nzanzaYovo nuanisa yo muna ngubuNgatu bumbikila yo e kundubulu mu nuanisa yo.”’+
34 ‘Muna nzila ina kezidi, i mûna kevutukila;Oyandi ke kota mu mbanza yayi ko,’ u kavovele o Yave.
35 ‘Itanina e mbanza yayi+ yo vuluza yo mu kuma kia nkumbu ame+Ye mu kuma kia Davidi wa selo kiame.’”+
36 O mbasi a Yave ovaikidi, ovondele 185.000 ma wantu muna ndo ya Asuri. Vava nkangu usikamene muna mene-mene, umwene mavimbu mawonso.+
37 Muna kuma kiaki, Sankerebe wa Ntinu a Asuri okatukidi, ovutukidi kuna Ninive+ yo kala kûna.+
38 Vava kavumbamenenge muna nzo* a Niseroke wa nzambi andi, o wan’andi, Andameleke yo Sareze bamvondele muna nsosolo,+ batinini kuna nsi a Ararate.+ Esa-kadone wa mwan’andi+ okitukidi se ntinu vana fulu kiandi.
Mvovo vana yand'a lukaya
^ Yovo “lûmbu lwa ntinu.”
^ Yovo “kialuvezo.”
^ Mvovo wa sina: “isia mwanda muna yandi.”
^ Mvovo wa sina: “wo.”
^ Nanga, “vana kati kwa.”
^ Yovo “nsuku mia Nile ya.”
^ Mvovo wa sina: “diavangwa.”
^ Yovo “Yavanga.”
^ Yovo “imena muna mbongo isotoka vana ntoto.”
^ I sia vo, Kizekeya.
^ Yovo “tempelo.”
