Wanzole wa Paulu Kuna kwa Timoteo 1:1-18
1 Paulu, wa ntumw’a Kristu Yesu muna luzolo lwa Nzambi mun’owu wa nsilu a moyo wina muna Kristu Yesu,+
2 kuna kwa Timoteo wa mwan’ame anzolwa:+
Yambula wakala ye nsambu, nkenda yo luvuvamu lutukanga kwa Nzambi wa Se yo Kristu Yesu wa Mfumu eto.
3 Ntondele Nzambi ona isadilanga e salu kiavauka ye ntona zavelela wauna wavanga akulu ame, kisidi vilakana kuyika ko muna ndodokela zame fuku yo mwini.
4 Wau nsungamene mansanga maku, ngina ye luzolo lwamonana yaku kimana yazadiswa ye kiese.
5 Kadi nsungamene lukwikilu+ lwaku lwakondwa kivunina, luna lwateka kala kwa nkak’aku ankento Loi ye kwa ngudi aku Yunike, ngina ye vuvu vo ngeye mpe una lwau.
6 Muna kuma kiaki, isusumwini wasadila kuna vema o lukau lwa Nzambi luna watambula vava yayambika o moko mame.+
7 Kadi Nzambi katuvene mwand’a unkuta ko,+ kansi wankuma kaka+ yo zola ye lulungalalu.
8 Dianu vo, kumoni nsoni ko za sila umbangi mu kuma kia Mfumu eto,+ ngatu wa mono mbakami andi, kansi zizidila kaka e mpasi+ muna diambu dia nsangu zambote, bundanga e vuvu muna nkum’a Nzambi.+
9 Yandi watuvuluza yo kutubokela e mbok’avelela,+ ke mu kuma kia mavangu meto ko, kansi mu kuma kia kani diandi ye nsambu zandi,+ zina twavaninua muna Kristu Yesu tuka tandu yavioka,
10 kansi owau zitomene zayakana muna nsengomok’a Kristu Yesu+ wa Mvuluzi eto, ona wasukisa lufwa+ yo kutusonga una tuvuila moyo+ ye nitu ilembi wola+ muna nsangu zambote,+
11 zina yatumbikilwa se nteleki, ntumwa ye nlongi.+
12 Ekiaki i kuma imwenanga mpe e mpasi zazi,+ kansi kimonanga nsoni ko.+ Kadi nzeye Ndiona ikwikilanga, ngina ye vuvu vo olenda lunda kina inyekekele yamuna lumbu kiakina.+
13 Simbinina e mbandu a mambu mavimpi*+ mana yazayisa ekolo wasonga lukwikilu yo zola kutukanga muna kala ntwadi yo Kristu Yesu.
14 Lunda eki kiambote wavewa muna mwand’avelela, owu wina mu yeto.+
15 Ozeye dio vo awonso bena mu mvivu a Asia+ bantina, kumosi mpe yo Fungelo yo Emongene.
16 Yambula o Mfumu kasonga nkenda kwa esi nzo a Onesiforo,+ kadi nkumbu miayingi kankumika, kamwena tuvambu twame nsoni ko.
17 Vava kakala kwaku Roma, wampava ye fululu kiawonso yavana kansolola.
18 Yambula Mfumu kansadisa kimana kamona e nkenda za Yave* muna lumbu kiakina. Ngeye otomene zaya e salu yawonso kasala muna Efeso.
