Wantete wa Samuele 28:1-25
-
Saulu wele kingula ngang’a matombola kuna Endo (1-25)
28 Muna lumbu yayina Afelesetia bakutakese makesa mau kimana benda nuanisa Isaele.+ Akisi ovovese Davidi vo: “Zaya wo vo ongeye yo makesa maku kwenda nukwenda yame kuna vita.”+
2 Davidi ovovese Akisi vo: “Otomene zaya dina kevanga ntaudi aku.” Akisi ovovese Davidi vo: “Ekiaki i kuma ikutumbikila se nyingidi ame yakwele mvu.”*+
3 Samuele wafwa, Isaele yawonso bandila yo kunzika muna Rama, mbanz’andi.+ Saulu wayinga nganga za matombola ye nganga za ngombo muna nsi.+
4 Afelesetia bakutakene yo sikidisa ndo muna Suneme.+ Saulu mpe olungalakese Isaele yawonso, basikidisi ndo muna Ngileboa.+
5 Saulu vava kamwene ndo ya Afelesetia, omwene wonga, ntim’andi uyangamene kikilu.+
6 Kana una vo Saulu wayuvulanga Yave,+ o Yave kamvutulanga diaka ko, kiakala muna ndozi, muna Urimi+ ngatu muna angunza.
7 I bosi, Saulu ovovese ntaudi zandi vo: “Numpavila nkento wina vo ngang’a matombola,+ ngienda kunyuvula.” Ntaudi zandi bamvutwidi vo: “Kuna Ene-dore+ kuna yo nkento mosi wina vo ngang’a matombola.”
8 Dianu vo, Saulu osobele mpw’andi, ovuete mvuatu miankaka, wele kwa nkento muna fuku ye ntaudi zandi zole. Ovovele vo: “Dodokolo, unzayisa mambu mevangama kuna ntwala, muna kinganga kiaku kia matombola,+ umpaikisila konso ona ikuzayisa.”
9 O nkento umvovese vo: “Ozeye dina kavangidi Saulu ye una kakatulwidi nganga za matombola ye nganga za ngombo muna nsi.+ Ekuma ozolele kundekela o ntambu yo kumpoda?”+
10 Saulu undididi e ndofi muna Yave, oku vo: “Ndidi e ndofi muna Yave wa Nzambi amoyo, kunata nkanu ko muna diambu diadi!”
11 O nkento oyuvuidi vo: “Nani ozolele yavaikisila?” Saulu ovutwidi vo: “Umpaikisila Samuele.”
12 O nkento vava kamwene “Samuele,”*+ okazidi mu nding’angolo yo vovesa Saulu vo: “Ekuma umpunini? Ngeye i Saulu!”
13 O ntinu umvovese vo: “Kumoni wonga ko, nki omwene?” Nkento ovutwidi kwa Saulu vo: “Ona mbwene una nze nzambi, otombokele muna ntoto.”
14 Saulu oyuvuidi vo: “E mpw’andi aweyi ina?” O nkento ovutwidi vo: “Yakala dia nunu otombokele, ovuete mvuela yakondwa moko.”+ Saulu vava kabakwidi wo vo i “Samuele,” ofukamene, obukikidi ndose vana ntoto, okundidi.
15 “Samuele” ovovese Saulu vo: “Ekuma untokanesene muna kuntombolwesa?” Saulu ovutwidi vo: “Mu mpasi kikilu ngina. Afelesetia bezidi kundwanisa, o Nzambi umbembwele, ke kumpananga diaka mvutu ko, kana muna ngunza ngatu muna ndozi;+ i kuma ibokelele, wanzayisa dina mfwete vanga.”+
16 “Samuele” ovovele vo: “Ekuma ungiuvulwidi wau vo Yave ubembwele+ yo kituka se ntantu aku?
17 Yave ovanga dina kavovele mu mono: Yave okatula kintinu vana moko maku yo vana kio kwa nkwaku, kwa Davidi.+
18 Yave uvangidi diambu diadi o unu, kadi kwalemvokela nding’a Yave ko yo lembi fwasa Aneyamaleke+ ana bamfungisa makasi.
19 Yave oyekola Isaele yo ngeye kibeni vana moko ma Afelesetia,+ o mbazi ongeye+ yo wan’aku+ nukala yame. Yave oyekola mpe makesa ma Isaele vana moko ma Afelesetia.”+
20 Vana vau Saulu obwidi mambukama vana ntoto, omwene o wonga wayingi mu kuma kia mvovo mia “Samuele.” Kakala diaka ye ngolo ko, kadi kadia ko e lumbu kiakina, fuku yo mwini.
21 O nkento vava kafinamene Saulu yo mona vo oyangamene kikilu o ntima, umvovese vo: “O ntaudi aku olemvokele dina ovovele, nsidi moyo ame mu vonza*+ yo vanga dina undombele.
22 Dodokolo, owau, wila ntaudi aku. Yambula yatwasila mbolo; wadia, wakumama kimana wavutuka muna nzil’aku.”
23 Kansi, Saulu kazolele ko, ovovele vo: “Kidia ko.” E ntaudi zandi yo nkento bandodokele. Ubawididi, otelamene yo vuanda vana mfulu.
24 O nkento ozabukidi, wele vonda mwan’a ngombe amazi kakala yandi muna nzo. Obongele mfumfu, obumbidi yo, obabwidi yo e mbolo zakondwa mfuna.
25 Otwese zo kwa Saulu ye ntaudi zandi, badidi. I bosi, batelamene, bele kwau muna fuku wauna.+
Mvovo vana yand'a lukaya
^ Mvovo wa sina: “se nlundi a ntu ame lumbu yawonso.”
^ Yovo “muntu wakala ye mpw’a Samuele.”
^ Yovo “nsidi moyo ame vana koko.”
