Vavaikidi akwa mvalu nyá miangolo, o lusansu lwalu lwa nkuma lwasonama muna Nkand’a Nzambi! Mvalu wantete wampembe, o muntu okangalanga wau ozele yo nkembo, kadi oyadikilu e kintinu. Kuna nim’andi kukwizanga mvalu wambwaki, o muntu okangalanga wau okatwidi luvuvamu ova nza yawonso. Vezidi mvalu wantatu, wandombe nga tombe kia fuku, o muntu okangalanga wau, una ye balanza vana moko mu songa vo e nzala zikotele ova nza. Vo i mvalu wa nyá waseboka, wazala ye yimbevo ye mambu mankaka mefwasanga o vimpi wa wantu yo kubatwasila Lufwa. Ku nim’andi kuna ye Ziami kia wantu awonso, muziamanga ulolo wa wantu befwanga!—Lusengomono 6:1-8.

“E nkumbu antete yatanga lusansu lwa akwa mvalu nyá yabakama kwa wonga. Yabanza vo e Lumbu kia Lufundisu kifinamene, kiakala yakubama ko, kiadi vuluka ko.” U kavova —Crystal.

“O lusansu lwa akwa mvalu nyá lwansivikisa kwayingi. Kansi vava yatoma bakula e mona-meso kiaki, yabakula e nsas’andi.” U kavova —Ed.

Vo i ngeye, nkia ngindu zikulwakilanga vava otanganga lusansu lwa akwa mvalu nyá muna nkand’a Lusongomono? Nga omonanga nze una Crystal kamona yovo una Ed kamona? Kansi, e mbuta diambu i diadi, e nkangalu mia akwa mvalu nyá i diambu ditomene zayakana muna nkand’a Lusengomono, nkanda wansuka muna Nkand’a Nzambi. Nga ozeye wo vo olenda vua nluta miayingi avo otomene bakula e mona-meso kiaki? Nkia nluta? Nzambi wasia nsilu vo okala ye kiese kiasikila avo otangidi, olongokele yo lemvokela mambu masonama muna nkanda wau wazala yo ungunza.—Lusengomono 1:1-3.

Kanele vo wantu ayingi bemonanga wonga vava betanganga e mona-meso kia akwa mvalu nyá, kansi o Nzambi kasonekesa kio ko muna kutumwesa wonga. Zaya dio vo mafunda ye mafunda ma wantu bevovanga vo e mona-meso kiaki kikumikanga lukwikilu lwau yo kubatwasila e vuvu kiasikila kuna sentu. I diau mpe dilenda vangama kwa ngeye! Dodokolo diaku, tanga e mona-meso kiaki.