NTU A DIAMBU WA FUKWA | NGA NZAMBI OYANGALELANGA E VITA?
Una Nzambi Kabadikilanga e Vita Kuna Nz’ankulu
Vava Aneyisaele babangikwanga, nkumbu miayingi balombanga lusadisu lwa Nzambi mu sambu. Kansi, lusadisu ke lwayiza vana vau ko. E mbeni zababangikanga i nkangu a Ngipito. (Luvaiku 1:13, 14) Aneyisaele mvu miayingi bavingila vo Nzambi kabavevola mu mpasi zazina. I bosi, e ntangwa yafwana muna kubavevola. (Luvaiku 3:7-10) Nkand’a Nzambi uvovanga vo Nzambi yandi kibeni wanwanisa nkangu a Ngipito. Wabatwasila vuku yayingi, i bosi wavonda ntinu a Ngipito yo makesa mandi muna Mbu Ambwaki. (Nkunga 136:15) Yave wa Nzambi wasonga vo yandi ‘kesa dia vita’ ona watanina nkangu andi.—Luvaiku 15:3, 4.
Wau vo Nzambi yandi kibeni wanwanisa nkangu a Ngipito, ediadi disonganga vo ke menganga vita zawonso ko. Ezak’e ntangwa, Nzambi wavananga nswa kwa nkangu a Isaele wanwana e vita. Muna bonga e nona, Nzambi watuma nkangu a Isaele banwanisa esi Kenani kadi wantu ambi bakala. (Nsiku 9:5; 20:17, 18) Watuma mpe Davidi wa Ntinu a Isaele kanwanisa Afelesetia ana bakala vo yimpumbulu. Nzambi wanzayisa nkutu e ndekwa kafwete sadila mu sunda e vita.—2 Samuele 5:17-25.
Lusansu lwalu lusonganga vo ezak’e ntangwa Nzambi wayambulanga vo nkangu andi wanwana e vita muna kuyitanina yo tanina e nsambila avelela. Kansi, tala mambu tatu mu kuma kia vita kavanina o nswa:
-
NZAMBI WABAKANGA E NZENGO KANA NANI OFWETE NWANA VITA. Lumbu kimosi, Nzambi wazayisa Aneyisaele vo: “Ke nuvwa mfunu a nwana ko.” Ekuma? E kuma kadi Nzambi yandi kibeni wadi nwana vana fulu kiau. (2 Tusansu 20:17; 32:7, 8) Nzambi nkumbu miayingi kavanga e diambu diadi nze una kavanga kwa esi Ngipito. Ezak’e ntangwa Nzambi wavananga nswa kwa nkangu andi banwana e vita mu tanina e Nsi a Nsilu.—Nsiku 7:1, 2; Yosua 10:40.
-
NZAMBI WASIKIDISANGA E NTANGWA IFWETE NUANUA E VITA. Nkangu a Nzambi wavingilanga yavana Nzambi kavananga o nswa muna nwana ye mbeni zau. Diavavanga vo bavingila yavana e ntangwa yayi yadi fwana, ke badi kuyibakila nzengo za nwana ko. Vava bakibakilanga e nzengo, ke basundanga ko. Nkand’a Nzambi usonganga vo vava Aneyisaele banwananga lembi vanwa nswa kwa Nzambi, mfwilu babakanga. *
-
Kana una vo Nzambi wanwanisa esi Kenani, wavuluza Rakabi ye yitu yandi
NZAMBI KEYANGALELANGA LUFWA LWA WANTU KO, KANA NKUTU LWA YIMPUMBULU. Yave wa Nzambi i nto a moyo, yandi mpe i Mvangi eto. (Nkunga 36:9) Muna kuma kiaki, kezolanga ko vo wantu bafwa. Kansi, diankenda kikilu vo vena yo wantu ambi bebangikanga yo vonda nkutu akaka. (Nkunga 37:12, 14) Ezak’e ntangwa Nzambi wavananga nswa vo yimpumbulu yavondwa muna vita kimana mavangu mambi malembi wokela. Kana una vo i wau, vava kavananga nswa kwa nkangu a Isaele banwana ye mbeni zau, Nzambi wasonganga ‘nkenda yo luzindalalu’ kwa awana babangikanga nkangu andi. (Nkunga 86:15) Muna bonga e nona, Nzambi wakanikina nkangu a Isaele vo vitila banwanisa e mbanza, bafwete boka nkoki yovo ntangu wa vanga “ungudi.” Ediadi diavananga e lau kwa mbeni za Aneyisaele mu soba e ngindu yo venga e vita. (Nsiku 20:10-13) Ediadi disonganga vo Nzambi ‘keyangalelanga lufwa lua kimpumbulu ko; kansi e kimpumbulu kaviluka muna nzil’andi kazinga.’—Yezekele 33:11, 14-16. *
Muna lufimpu lwalu, tumwene vo Nzambi wasadilanga vita muna fokola lubangamu ye mavangu mambi. Kansi, Nzambi yandi kibeni wabakanga e nzengo kana vo nkia ntangwa ifwete nwanwa e vita ye nani ofwete nwana. Nga ediadi disongele vo Nzambi wayangalelanga vita zozo? Nkatu. Nzambi omenganga nsoki. (Nkunga 11:5) Nga ngindu za Nzambi mu kuma kia vita zasoba vava o Mwan’andi Yesu Kristu kayantika e salu kia longa muna tandu kiantete?
^ tini. 7 Lumbu kimosi, Aneyisaele basundwa kwa esi Kenani wau vo Nzambi kabavana nswa ko wa nwana yau. (Ntalu 14:41-45) Vioka mvu miayingi, o Ntinu Yosiya wanwana e vita lembi vewa o nswa kwa Nzambi, muna kuma kiaki wafwa.—2 Tusansu 35:20-24.
^ tini. 8 Vava banwananga y’esi Kenani, Aneyisaele ke babokanga nkoki ko wa vanga ungudi. Ekuma? E kuma kadi Nzambi wateka vana 400 za mvu kwa esi Kenani mu soba mavangu mau mambi. Ozevo, vava Aneyisaele babanwanisa, o umpumbulu wa esi Kenani wasaka. Ke bakala yo luzolo lwa soba mavangu mau ko. (Etuku 15:13-16) Ekiaki i kuma Nzambi kabakila nzengo vo bafwaswa emvimba. Kansi, akaka muna yau ana basoba mavangu mau ke bavondwa ko.—Yosua 6:25; 9:3-27.
Nanga Oyangalela Mpe Malongi Mama
EYINGIDILU DIA NKANGU
Rekabe ‘Walungisilwa Muna Mavangu’
Aweyi lusansu lwa Rekabe lusongelanga vo yeto awonso mfunu twina vana meso ma Yave? Adieyi tulenda longoka muna lukwikilu lwa Rekabe?
EYINGIDILU DIA NKANGU
Nga Lufundisu lwa Nzambi—Lwansoki?
Muna baka e mvutu za kiuvu kiaki, tala nona yole ya lufundisu lwa Nzambi luyikwanga muna Nkand’a Nzambi—Kizalu muna lumbu ya Noa ye lufwasu lwa esi Kenani.
