NKANIKINU WA NKAND’A NZAMBI: “Nuvezananga mambu yo yambuziana, ovo muntu obakidi nkw’andi diambu; wauna kanuyambulwila o Mfumu, i una mpe nuyambulwila.”—Kolosai 3:13.

Adieyi usongele? Nkand’a Nzambi utezanesanga e sumu ye mfuka, o loloka kutezaneswanga yo yambulwila e mfuka. (Luka 11:4) Nkanda umosi wavova vo o mvovo “loloka” muna Kingerekia usongele vo “yambulwila e mfuka yo lembi yo lomba diaka.” Avo tulolokele mvimba ndiona utuvangidi e mbi, ke tuyindula diaka ko dina kavangidi. O loloka muntu, ke disongele ko vo tuyangalele mbi kavenge yovo veza e mfwilu katutwasidi. Kansi, dikutufilanga mu lembi vutula e mbi muna mbi kana nkutu vo kuma tuna kiau.

Nga wamfunu o unu? Wau vo yeto awonso tu wantu a lembi lunga, tusumukanga. (Roma 3:23) Ozevo, diambote twalolokanga akaka kadi yeto mpe sumuka tusumukanga ye tuzolanga vo akaka batuloloka. Vana ntandu, vava tulolokanga akaka, yeto kibeni mpe nluta tubakanga. Mu nkia mpila?

Vava tulembi lolokanga akweto, yeto kibeni tukuyilwekanga. Ediadi dilenda kutufila mu vidisa kiese yo kututwasila mpasi muna zingu. Dilenda kututwasila mpe yimbevo ya vonza. O dotolo Yoichi Chida yo nlongi Andrew Steptoe (psicólogo) bavova muna Journal of the American College of Cardiology vo: “Lufimpu lwavangilu lusonganga e ziku vo o lunda makasi i dimosi muna mambu metwasanga yimbevo ya ntima.”

Owau badika e nluta tulenda vua muna loloka akaka. Vava tulolokanga, tukalanga kuna luvuvamu ye kintwadi ye akaka, tutatidilanga mpe e ngwizani eto ye akaka. Edi disundidi o mfunu, tutangininanga Nzambi ona ololokanga emvimba asumuki ana bevilukanga o ntima, ozolele mpe vo twavanga diau adimosi.—Maku 11:25; Efeso 4:32; 5:1.