MVUTU ZA NKAND’A NZAMBI: ‘E ntangwa ikwiza, ina ikala vo awonso bena muna ziami bewa nding’andi [Yesu] bevaika.’—Yoane 5:28, 29.

Yesu wasakula vo vava Kintinu kiandi kiyala e nza, awana bena muna ziami bevaika. Fernando ona oyikilu kala osungamenanga vo: “E nkumbu antete yatanga sono kia Yoane 5:28, 29 yasivika kikilu. E sono kiaki kiampana vuvu kiakieleka, kiansadisa mpe mu kala ye ngindu zasikila mu kuma kia kusentu.”

Kuna nza nkulu, Yobi wa nkwa kwikizi wakala ye vuvu vo Nzambi wadi kumvutulwisa moyo avo ofwidi. Yobi wayuvula vo: “Muntu ovo ofwidi, nga olenda zinga diaka?’ I bosi, wavutula ye ziku kiawonso vo: ‘Ivingila e lumbu yawonso ya salu kiampasi [kolo kena muna ziami], yavana kiluaka mpevok’ame.’—Yobi 14:14, 15.

E diambu dia lufuluku ke diakala diampa ko kwa Mareta wa mpangi a Lazaro. Vava Lazaro kafwa Yesu wamvovesa vo: ‘Mpangi aku fuluka kefuluka.’ Mareta wavutula vo: ‘Nzeye wo vo ofuluka muna lufuluku, muna lumbu kia mbaninu.’ Yesu wamvovesa vo: ‘Mono i lufuluku yo moyo. Ndiona okwikilanga omu mono, kana nkutu ofwidi, moyo diaka kekala.’ (Yoane 11:23-25) I bosi, Yesu wafutumuna Lazaro. O lusansu lwalu lwakiese lusonganga mambu mampwena mevangama kuna ntwala. Yindula e kiese tumona vava lufuluku luvangama mu nza yawonso!

MVUTU ZA NKAND’A NZAMBI: Diambu dia Nzambi disonganga vo e mfuluk’a Yesu yaswaswana ye mfuluka ya wantu nana beyikwanga mu Nkand’a Nzambi. Wantu awaya bavutuka diaka zingila va ntoto. Kansi, mu kuma kia mfuluk’a Yesu tutanganga vo: “Yesu Kristu . . . wina vana koko kwalunene kwa Nzambi, wau kayenda kun’ezulu.” (1 Petelo 3:21, 22) Nga Yesu yandi kaka wafuluka yo kwenda ku zulu? Yesu wavovesa ntumwa zandi vo: ‘Avo ngiele kunukubikil’e fulu, se yavutuka yanutambula, kimana konso kuna ikala, oyeno mpe nwakala ko.’—Yoane 14:3.

 Kristu wayenda ku zulu yo kubika e fulu mu kuma ki’akaka muna alongoki andi. Wantu 144.000 befuluka yo kwenda ku zulu. (Lusengomono 14:1, 3) Nki bekwenda sala kuna zulu?

Salu kiayingi bekwenda sala. Diambu dia Nzambi divovanga vo: ‘Akwa nsambu ye avauki awana bekala ye kunku muna lufuluku lwantete; muna yau o lufwa lwazole ke luna ye wisa ko, bekala se nganga za Nzambi yo Kristu, beyala yandi muna 1.000 dia mvu.’ (Lusengomono 20:6) Awana befuluka yo kwenda kuna zulu, beyala o ntoto se atinu ye nganga kumosi yo Kristu.

MVUTU ZA NKAND’A NZAMBI: Muna mvovo miandi miavumunwinwa ntumwa Paulu wavova vo: ‘Ngina ye vuvu muna Nzambi, e vuvu kina bena kiau mpe wantu awaya, i sia vo, vekala yo lufuluku lwa ansongi ye awana balembi songa.’—Mavangu 24:15.

Aki nani bekala mu buka kia awana Paulu kayikila vo ‘ansongi’? Daniele wa nkwa kwikizi wavoveswa kuna mfoko a zingu kiandi vo: ‘Vunda, i bosi otelama yo tambula kunku kiaku kuna mbaninu a lumbu.” (Daniele 12:13) Akweyi Daniele kefulukila? Bibila kivovanga vo: “Asongi bevwa nza, besikila vo yakwele mvu.” (Nkunga 37:29) Yesu wasakula vo: ‘Akwa nsambu alembami kadi bevwa nza.’ (Matai 5:5) Daniele, akala ankaka ye akento akwikizi, bevutulwiswa moyo yo zinga diaka va ntoto yakwele mvu.

Aki nani bekala mu buka kia awana Paulu kayikila vo ‘balembi songa’? Mafunda ye mafunda ma wantu bafwa lembi vua e lau dia zaya e ludi kia Bibila yo sadila kio muna zingu kiau. Vava befulwa bekala ye lau dia zaya Yave * yo Yesu. (Yoane 17:3) Awonso besola sadila Nzambi, bekala ye lau dia zinga yakwele mvu nze Yave.

MVUTU ZA NKAND’A NZAMBI: Nzambi ‘okunguna mansanga mawonso muna meso mau, o lufwa ke lukala diaka ko; musungula kala diaka dilu, yovo kazu, ngatu mpasi.’ (Lusengomono 21:4) “Betunga nzo yo kala mo, bekuna mpatu za vinyo, yo dia bundu yau.”—Yesaya 65:21.

Yindula una kikala e zingu vava azolw’eto befuluka. Kansi, e kiuvu kikwamanene i kiaki, Aweyi olenda kadila ye ziku vo lufuluku luvangama kieleka?