Sono yayingi ya Kingerekia ivovelanga mbut’a makesa (mbut’a nkama) ma Roma. O mfidi a makesa mavonda Yesu, ngenda yayi kakala yau. Koneleo wa muntu antete wa musi Zula ona wakituka se Nkristu, ngenda yayi mpe kakala yau. O mfidi a makesa wawandisa Paulu yo Yulio ona wanatisa Paulo kuna Roma, mbuta za makesa mpe bakala.​—Maku 15:39; Mavangu 10:1; 22:25; 27:1.

O mbut’a makesa i muntu wafilanga buka kia 50 yovo 100 makesa. O mbu’ta makesa wakala ye salu kia longa yo ludika masoladi mandi, fimpa e mvuatu ye nwaninwa yau mu zaya kana vo yambote yakala yo vita ntu vava bayendanga muna vita.

E ngenda ya mbut’a makesa i ngenda isundidi ina soladi kadi tambula. Muna tambula e ngenda yayi, diavavanga vo soladi kakala mfidi ambote. E mbuta za makesa yau bakala ye mbebe ya diatisa makesa ma luyalu lwa Roma. Lusansu lumosi lusonganga vo awana basolwanga se mbuta za makesa “i wantu batoma zaya mambu ma vita lutila makesa mankaka muna buka.”

Nswaswani ye matala-tala (lumueno) ma unu, matala-tala kuna nza nkulu mu bronze, cobre, palata ye wolo mavangilwanga. Vava kiatungwa e saba kia sambila kuna Isaele i nkumbu antete matala-tala mayikwa muna Nkand’a Nzambi. Akento bavana matala-tala muna yikama salu kia vanga e longa diavauka dia nsongo ye sikininwa kiandi. (Luvaiku 38:8) Nanga matala-tala mama mateka zezeswa muna sadilwa mu salu kiaki.

Matala-tala, nsanga mia wolo ye lekwa yankaka ya akento yatimunwa kuna Isaele ye zunga ina lukufi i ziku kisonganga vo e lekwa yayi yatoma sadilwanga kwa akento kuna nza nkulu. Matala-tala mama mavindumuka makala, masiwa dibaya muna ndambu ye simbilu yovo nkafi. Kansi, matala-tala mana ka matoma songanga lose ko ke maviengeswanga ko.

Matala-tala ma nza nkulu ka matoma mwesanga ko nze matala-tala ma unu. E kiaki i kuma ntumwa Paulu kavovela vo: “Owau tumwenanga muna pelo ke itoma mwesanga ko.”​—1 Korinto 13:12.