KIA diambu kafwete vanga o yakala muna mwesa nkaz’andi kiese? Ayingi bekwikilanga vo e kani diantete dia yakala i sala muna twasa nzimbu mu nzo. Kansi, akaka muna akento bena ye mavua mayingi bakinu mona lukendalalu. Muna bonga e nona, Rosa wa nkento mosi kuna Espanha wavova mu kuma kia yakala kasompana yandi: “Kuna mbazi muntu ambote kakala, kansi mu nzo nkwa ntima mbadi!” Joy wa nkento mosi kuna Nigéria wavova vo: “Vava kiatambulwilanga nzengo za nkaz’ame ko, wampovesanga vo, ‘ofwete vanga mawonso mpovele, kadi mono i yakala diaku!’”

Aweyi yakala kafwete sadila kintu kiandi mu mpila yambote? Adieyi yakala kafwete vanga kimana e nzo andi yakala se fulu kiakiese ye kia “vundu” kwa nkaz’andi?​—Rutu 1:9.

Kana una vo nkento yo yakala bafwanana vana meso ma Nzambi, Bibila kivovanga vo konso muntu ovuidi kiyekwa muna nzo. E sono kia Roma 7:2 kivovanga vo o nkento wasompa una kuna nsi a “nsiku a nkaz’andi.” Nze una makompani mekadilanga yo muntu una vo ntu, Nzambi wasola yakala kakala ntu a nkento. (1 Korinto 11:3) Muna kuma kiaki, ayakala bafwete vitanga o ntu muna nzo.

Ayakala aweyi nufwete sadila wisa nwavewa kwa Nzambi? Bibila kivovanga vo: ‘Nuzolang’akazi eno, waun’o Kristu kazolela e nkutakani.’ (Efeso 5:25) Kana una vo kasompa ko, e nona kia Yesu Kristu kilenda kusadisa mu kala yakala diambote. Mu nkia mpila?

Yesu wakasakesanga yo sadisa akaka. Yesu wasia nsilu kwa wantu awonso babangikwanga yo nwana ye mpasi za zingu vo: “Nwizoku ngina, . . . nwasolola vundu kia mioyo mieno.” (Matai 11:28, 29) Yesu wabasadisa muna nitu yo kubakasakesa muna mwanda. E kiaki i kuma ulolo wa wantu bafinamenanga Yesu, kadi bakala ye ziku vo okubavevola mu mpasi zau.

 Ayakala aweyi nulenda tanginina e mbandu a Yesu? Muna sadisanga akento eno mu salu ya nzo. Akento ayingi bekuyimwenanga nze Rosa ona wavova vo: “Yakala nze ntaudi a nkaz’ame.” Kansi, yakala dimosi oyikilwanga vo Kweku ona una yo longo lwakiese wavova vo: “Nkumbu miayingi iyuvulanga nkaz’ame dina mfwete vanga muna kunsadisa. Wau vo itoma kunzolanga, ivanganga mawonso muna kumvana lusadisu muna salu ya nzo.”

Yesu wavuanga wantu mfunu yo kubasonga e ngemba. Nkento mosi wakala ye kimbevo kiangolo mu mvu 12, vava kawá nsangu za masivi ma Yesu wavova vo: ‘Avo mpiakane kaka mvuatu andi, mpulukidi.’ Ndungidi kakala yau. Ozevo, wafinama Yesu yo viakana o mvuatu andi yo yeloka. Nanga ankaka bakala vana ndambu bamona vo diambu diambi kavanga, kansi Yesu wabakula e mpasi zandi. a Wamvovesa kuna ngemba zawonso  vo: “E mwana, . . . sasuka muna kimbevo kiaku kiampasi.’ Vana fulu kia kumfusulwisa nsoni yovo kunkazila, Yesu wabakula mpasi zandi. Muna mpila yayi, Yesu wasonga vo nkwa ngemba kakala.​—Maku 5:25-34.

Ayakala aweyi nulenda tanginina e mbandu a Yesu? Avo nkaz’aku kena kiambote ko, e yayi i ntangwa ofwete luta kunsia e sungididi yo songa luzindalalu. Vava bakula ngindu zandi. Muna bonga e nona, Ricardo wavova vo: “Vava imonanga vo nkaz’ame ofwemene, ivanganga mawonso mu lembi sakisa e nganzi zandi.”

Yesu wamokenanga ye alongoki andi. Yesu wamokena kwayingi ye akundi andi. Wavova vo: ‘Mawonso yawá kwa S’ame, inuzayisi mo.’ (Yoane 15:15) Dialudi vo, ezak’e ntangwa Yesu wakalanga yandi mosi muna yindula yo samba. Kansi, nkumbu miayingi kazayisanga ngindu zandi kwa alongoki andi. Muna fuku vitila kavondwa nze kimpumbulu, Yesu wavovesa alongoki andi vo ‘nkendalele kwayingi.’ (Matai 26:38) Kana nkutu vava bavanganga mambu mankendelekanga, Yesu kayambula mokena ye akundi andi ko.​—Matai 26:40, 41.

Ayakala aweyi nulenda tanginina e mbandu a Yesu? Zayisanga ngindu zaku kwa nkaz’aku. Nkento olenda vova vo yakala diandi otoma mokenanga yo wantu kuna mbazi, kansi muna nzo kemokenanga ko. Kansi, tala e mpila Ana kemonanga vava nkaz’andi keziulanga ntima muna mokena yandi. Wavova vo: “Imonanga vo zola kikilu ke kunzolanga, muna kuma kiaki tuna ye ngwizani ambote.”

Venga e fu kialembi vovesa nkaz’aku muna kuntumba. Nkento mosi wavova vo: “Vava nkaz’ame kanfungilanga makasi, waviokesanga lumbu yayingi lembi kumpovesa diambu. Yamonanga vo veza kanvezanga yo lembi kumvua mfunu.” Kansi, Edwin ovavanga tanginina mbandu a Yesu. Wavova vo: “Vava ifunganga makasi, ivanganga e ngolo zalembi vana mvutu vana vau. Ivingilanga yavana tuvua ntangwa yambote muna mokena.”

Joy ona oyikilu kala kuna lubantiku, wayantika mona nsobani kwa nkaz’andi tuka kayantikila longoka Bibila ye Mbangi za Yave. Wavova vo: “Nkaz’ame mu soba kena e fu yandi, osianga ngolo za tanginina Yesu muna songa zola.” Mafunda ye mafunda ma akazi bevuanga nluta mia malongi ma Bibila. Nga ozolele kala mosi muna yau? Avo i wau, lomba longi dia ngovo dia Bibila kwa Mbangi za Yave..