NTU A DIAMBU WA FUKWA | NGA SATANA UNA KIELEKA?
Nga Tufwete Mwena Satana Wonga?
Diampasi muna bakula monóxido de carbono una vo mupepe wa mpondi, kadi ke utanga nsudi ko ngatu moneka. Ulenda vonda wantu lembi zaya vo mupepe wa mpondi bafulumwini. Kansi, ke dina mfunu ko mu mona wonga. Vena ye diambu dilenda kusadisa mu bakula yo kuyitanina muna mupepe wau wa mpondi. Wantu ayingi besianga ngunga (alarme) muna nzo zau kimana yabalukisa vava e vonza kikwizanga.
Nze mupepe wampondi, o Satana mpe kemonekanga ko, nkwa nsoki kikilu. Kansi, Nzambi okutusadisanga muna kunzaya. Avo osadidi nkubika kekutuvananga o Nzambi, kukala ye kuma ko kia mwena Satana wonga.
Nswa wa kuyisolela. Muna Yakobo 4:7 tutanganga vo: ‘Nkadi Ampemba, nunsi’e kitantu, kanutina.’ Kana una vo Satana ovwidi nkuma, kalendi kukomekena ko mu vanga dina kuzolele vanga ko. Ngeye kibeni ofwete sola. Muna 1 Petelo 5:9 tutanganga vo: “Nunsi’e kitantu [Nkadi Ampemba], nusikila muna lukwikilu.” Sungamena vo Satana wayambula Yesu vava kalenda kumvukumuna ko. (Matai 4:11) Diau adimosi mpe, ngeye olenda sia Satana e kitantu.
Kikundi yo Nzambi. E sono kia Yakobo 4:8 kikutukasakesanga vo ‘twafinama Nzambi.’ Yave yandi kibeni okubokelanga wakala nkundi andi. Aweyi olenda wo vangila? E mpil’ambote olenda wo vangila i longoka mayingi mu kuma kiandi muna Bibila. (Yoane 17:3) Mana olongoka mu kuma kia Yave mekufila muna kunzola yo vanga luzolo lwandi. (1 Yoane 5:3) Avo ofinamene S’aku ezulu, adieyi kesinga vanga? Yakobo wakudikila vo ‘oyandi [Nzambi] mpe okufinama.’
Nsilu wa lutaninu. Muna Ngana 18:10 tutanganga vo: “E nkumbu a Yave, nzo ezulu angolo: O nsongi otinina mo, ovulukidi.” Ediadi ke disongele ko vo ovwa lutaninu lwa Nzambi avo osadidi kaka nkumbu andi. Kansi, awana kaka bevuminanga nkumbu andi i balenda vwa lutaninu lwandi konso ntangwa.
Nona yakieleka. Sono kia Mavangu 19:19 kivovanga mu kuma kia Akristu kuna Efeso ana batambulwila e ludi vo: ‘Ebidi vana bena, ana bavandidinge mpandu, bakutikidi nkanda miau, bayokèle mio vana vena wantu awonso: Babadikidi e ntalu, yazi tanu ya palata.’ * Akristu awaya bayoka e lekwa yawonso basadilanga muna mpandu kana una vo nzimbu zayingi yafwa. E yayi mbandu ambote kwa yeto. O unu, e nza yazala ye mavangu ma mpandu. E mavangu ye lekwa isadilwanga muna mpandu ilenda moneka vo yambote kwandi, kansi ilenda kotesa nkuya mu nzo. Diamfunu wafwasa e lekwa yayi kana nkutu vo ntalu yayingi yafwa.—Nsiku 18:10-12.
Rogelio ona oyikilu kuna lubantiku, yamuna kimbuta kiandi kia mvu 50 kakwikilanga ko vo Nkadi Ampemba una. Kansi, kuna kwalanda wasoba ngindu zandi. Ekuma? Rogelio wavova vo: “E diambu diantete yavanga i vava kala ye Bibila. O zayi wa Bibila wansadisa mu kwikila vo Nkadi Ampemba una kikilu. O zayi wau ukunsadisanga mpe mu lembi vukumunwa kwa Satana.”
“O zayi wa Bibila wansadisa mu kwikila vo Nkadi Ampemba una kikilu. O zayi wau ukunsadisanga mpe mu lembi vukumunwa kwa Satana”
Nga ozolele zaya e ntangwa ina Satana kesinga fwaswa? Nkand’a Nzambi ulenda kusadisa kadi usakulanga e ntangwa ina Nkadi Ampemba ona ovukumunanga wantu ketubwa “van’eyanga dia tiya y’elengo.” (Lusengomono 20:10) Dialudi vo tiya ye nlengo ke tulendi vonda vangwa kia mwanda ko. Ozevo eyanga dia tiya, lufwasu lwa mvu ya mvu disunzulanga. Satana ofwaswa yakwele mvu. Ekwe ntangw’a kiese ikala kw’awana bezolanga Nzambi!
Muna kuma kiaki, kwamanana longoka mayingi mu kuma kia Yave ye nzila zandi. * Yindula una omona vava ‘Satana kefwaswa.’
^ tini. 8 E nzimbu ziyikilu mu sono kiaki avo za denali ya Roma zakala, ozevo e ntalu a nzimbu bakutika i mfutu wa lumbu kimosi kia 50.000 ma asadi!
^ tini. 11 Muna zaya diaka mambu makaka mu kuma kia Satana ye mpandu, tala kapu kia 10 kia nkanda, O Nkand’a Nzambi Adieyi Kieleka Kelonganga? Olenda wo lomba kwa Mbangi za Yave yovo tanga wo muna www.isa4310.com./kwy
