Ku zunga ki’asukami yawutukila, kuna vata dimosi dia Roma. E zingu kiame kiampasi kiakala. Kizeye ngudi ame ko, kiakala mpe ye ngwizani ambote ko yo se diame. Mono mosi yakidikilanga.

Vava yakala ye kimbuta kia mvu kumi, yayantika yiya. Yavaika muna nzo vava yakakala ye mvu 12. Nkumbu miayingi, o s’ame wansadisanga mu vaika mu pelezo yo kundata kuna nzo. Ntangwa zawonso yatantananga yo wantu, nkwa makasi yakala, yasaulanga wantu awonso. Vava yalungisa mvu 14 yavaika emvimba muna nzo. Yayantika nua fomo zangolo yo zingila mu mpambu za nzila. Wau vo kiakala ye fulu kia leka ko, yaziulanga makalu mangani yo leka mo, yavaikanga muna nsiuka-nsiuka yo vava e pompi mu kuyisukula.

Yakituka se mwivi ampwena, kiayiyanga kaka nkutu zangani ko, kansi yakotanga mpe mu nzo zangani ye muna mbanza mu yiya mu fuku. Yazayakana kwayingi, ke kolo ko, yakota mu buka kimosi kia kimpumbulu yo “yantika” yiya kuna banco. Wau vo nkwa makasi yakala, awonso muna buka kieto, banzitisanga. Kiayendanga konso fulu ko lembi nata nkele ame. Vava yalekanga yasianga wo vana mfika ame. Yayantika vanga mawonso mambi, nua fomo zangolo, yiya, sadila mvovo miasafu ye zumba. Ntangwa zawonso yavavwanga kwa mapolisia yo siwa muna pelezo mu mvu miayingi.

Lumbu kimosi vava yavaikiswa muna pelezo, yayenda kingula ngudi ame a nleke. Kiazaya wo ko vo ngudi ame a nleke yo wan’andi bakituka se Mbangi za Yave. Bampovesa vo twenda kumosi kuna lukutakanu lwau. Wau vo yazola zaya mana mevangamanga ko, yabaka e nzengo za  kwenda. Vava twalwaka kun’Eseka dia Kintinu, yavwanda vana ndambu a kielo kimana yamonanga awonso bakotanga yo vaika. Kansi, yanata mpe nkele ame.

O lukutakanu lwaluna lwasoba e zingu kiame. Yamonanga nga mono ngina mu nza yakaka. Awonso bankaisanga kuna ngemba yo kunsevesa. Yamu unu kivilakananga ko e mpila bantambulwila ye ngemba yasongwa kwa Mbangi za Yave. Fulu kiaswaswana kikilu kiakala ye kina yayukwa.

Yayantika longoka Nkand’a Nzambi ye Mbangi za Yave. Ekolo yalongokanga, yamona o mfunu wa soba zingu kiame. Yasadila sono kia Ngana 13:20 kivovanga vo: ‘On’okangala y’akwa ngangu, okal’e ngangu. O nkundi a mazowa, mpasi kemona.’ Yamona vo mfwete yambula e buka kiakina kia kimpumbulu. Ke diakala diambu diakete ko, kansi muna lusadisu lwa Yave, yalenda wo vanga.

Yasoba mpe e mpw’ame. Yayambula nua e fomo ye diamba. Yazenga nsuki zame, yayambula vwata nlunga mia matu yo yambula mvovo miasafu. Yayantika songa e volo mu zingu kiame.

Kiazolanga tanga ko ngatu longoka, i kuma diakadila diampasi mu tanga yo longokanga Nkand’a Nzambi. Kansi, e ngolo yavanga zansadisa mu yantika zola Yave malembe-malembe, ntona zame mpe zayantika kuntumba. Yakitumbanga yo katikisa kana vo Yave olenda kundoloka mu mbi yawonso yavanga. Vava ikalanga ye ngindu zazi, ifiaulwiswanga mu tanganga e mpila ina Yave kalolokela Davidi wa Ntinu vava kavola masumu mampwena.—2 Samuele 11:1–12:13.

Diambu diakaka diampasi yawanana diau, i sila umbangi mu nzo ye nzo muna zayisa lukwikilu lwame kw’akaka. (Matai 28:19, 20) Yakalanga ye wonga vo ndenda wanana ye muntu yalweka yovo kota nsoki. Malembe-malembe yayantika sunda wonga wau. Yayantika kala ye kiese kia sadisa akaka mu zaya vo Yave Se diambote ye nloloki.

O longoka mu kuma kia Yave, diatanina e zingu kiame. Akundi ame ayingi bafwa, kansi mono ngina ye zingu kiakiese ye vuvu kia kusentu. Yalongoka songa lulembamu ye volo vava nkalanga ku makasi. Mu kuma kiaki, yayantika kala ye ngwizani ambote y’afinangani ame. Yasompana yo Carmen wa nkento ambote. Tusalanga kumosi ye kiese kiawonso mu sadisa akaka bazaya e ludi kia Nkand’a Nzambi.

Owau i nsadi a ziku. Ezak’e ntangwa kuna banco nsadilanga, kansi vana fulu kia yiya, salu kia velelesa isalanga.