Afonso: E Miguel aweyi kaka? Ngiangalele muna ku mona diaka.

Miguel: Mono mpe ngiangalele.

Afonso: Ngizidi kuvana Eyingidilu ye Desper­tai ya ngonde yayi. Ngina ye ziku vo oyangalela mana mena mo.

Miguel: Ntondele. Diambote kikilu wizidi, kadi diambu nzolele kuyuvula.

Afonso: Nkia diambu?

Miguel: Lumbu kimosi vava yamokena yo nkw’ame a salu, yamvovesa mana yatanga muna nkanda wampana. Kansi, wampovesa vo kitangi diaka nkanda mia Mbangi za Yave ko kadi ke bekwikilanga mu Yesu ko. Nga ediadi dialudi? Yanzayisa vo bosi ikuyuvula vava okunkingula.

Afonso: Diambote ungiuvwidi vana fulu kia yuvula wantu ke bena Mbangi za Yave ko. E mpila yambote ya zayila dina muntu kekwikilanga i yuvula yandi kibeni.

Miguel: Olungidi kwaku.

Afonso: E ludi i kiaki: Mbangi za Yave bekwikilanga muna Yesu. Tuna ye ziku vo lukwikilu muna Yesu i nsabi muna vuluzwa.

Miguel: Nzeye wo vo nukwikilanga muna Yesu. Kansi, vava nkw’ame a salu kanzayisa diambu diadi, yatokana kwayingi. Nanga katwasidi mokenena diambu diadi ko.

Afonso: Nga tulenda tanga e sono isonganga o mfunu wa kwikila muna Yesu? E sono yayi i yau betoma sadilanga e Mbangi za Yave muna salu kiau.

Miguel: Kinga e!

Afonso: Tuyantikila muna mvovo mia Yesu miasonama muna Yoane 14:6. Yesu wayika mvovo miami vava kamokena yo mosi muna ntumwa zandi. “Yesu umvovese vo, Mono kwame i nzila, i ludi, i moyo mpe, ke ven’on’okwiza kwa Se ko, ovo ke mu mono ko.” Mun’owu wa sono kiaki, ayeyi i nzila muna finama Se?

Miguel: Yesu i nzila.

Afonso: Dialudi. Yeto Mbangi za Yave i diau tukwikilanga. Kansi unzayisa eti: Vava tusambanga, mu nkumbu a nani tufwete sambila?

Miguel: Mu nkumbu a Yesu.

Afonso: Elo. I dianu vo konso sambu ivanganga mu nkumbu a Yesu ivangilanga kio. I diau mpe Mbangi za Yave bevanganga.

Miguel: Diambote mu zaya wo.

Afonso: Tubadika mpe e sono kia Yoane 3:16. Wantu betoma zitisanga e sono kiaki, kadi kiyikanga muna mvovo miankufi mawonso mana Yesu kavova yo vanga muna salu kiandi ova ntoto. Nga olenda kio tanga?

Miguel: Ingeta. Kivovele vo: “Kadi muna nzola kazolele nza o Nzambi i kavanin’o Mwan’andi amosi, kimana konso on’okwikilanga muna yandi ke vila ko, moyo a mvu ya mvu kevwa.”

 Afonso: Ntondele. Nga wa wá kala e sono kiaki?

Miguel: Ingeta, nkumbu miayingi iwanga kio. Kisonekwanga mpe mu fulu yayingi.

Afonso: Ingeta, kitomene zayakana kikilu. Tala dina Yesu kavova. O zola kwa Nzambi kwaziula nzila kimana wantu bavwa moyo a mvu ya mvu. Kansi, adieyi tufwete vanga muna vwa moyo wau?

Miguel: Tufwete kala yo lukwikilu.

Afonso: Ingeta. Tufwete kwikila muna mwana mosi kaka a Nzambi, i sia vo Yesu Kristu. Ediadi diatoma sasilwa muna lukaya lwa 2 lw’Eyingidilu itwasidi. Ekani di’Eyingidilu i “kasakesa o wantu mu kala yo lukwikilu muna Yesu Kristu ona wafwa kimana twavwa moyo a mvu ya mvu. Owau, Yesu oyalanga se Ntinu muna Kintinu kia Nzambi.”

Miguel: Mwene kala, Eyingidilu dieno disonganga e ziku kia diambu diadi!

Afonso: Dialudi kikilu.

Miguel: Ozevo, ekuma wantu bevovelanga vo ke nukwikilanga muna Yesu ko?

Afonso: Nanga vena ye kuma yayingi ifilanga wantu mu vova diambu diadi. Akaka bekwikilanga mu mana bewanga kanele vo ke bena ye ziku ko. Akaka belongwanga luvunu lwalu kwa alongi a mabundu.

Miguel: Nanga akaka bevovanga vo ke nukwikilanga muna Yesu ko ekuma kadi nuyikilwanga vo Mbangi za Yave, kansi ke Mbangi za Yesu ko.

Afonso: Nanga dilenda kala dialudi.

Miguel: Ekuma nulongelanga ntangwa zawonso mu kuma kia Yave?

Afonso: Nze Yesu, tukwikilanga vo osadila nkumbu a Yave wa Nzambi diamfunu kikilu. Badika dina o Yesu kavova kwa Se diandi muna sambu. Diambu diadi diasonama muna Yoane 17:26. Nga olenda tanga e sono kiaki?

Miguel: Ingeta. “Yabazayisa nkumbu aku, nzayisa yo mpe; o zola kuna wanzola kwakal’omu yau, omono mpe omu yau.”

Afonso: Ntondele. Yesu wayika vo wazayisanga nkumbu a Nzambi kwa wantu. Ekuma kavangila wo?

Miguel: Kizeye ko.

Afonso: Yambula twafimpa sono kiakaka kia Nkand’a Nzambi kilenda kutusadisa mu bakula e diambu diadi. Tutanga sono kia Mavangu 2:21. Kivovele vo: “Konso on’ovovela nkumbu a Yave, ovuluzwa.” Ka lukatikisu ko vo Yesu wazaya wo vo ovovela nkumbu a Nzambi i dimosi tufwete vanga muna vuluzwa.

Miguel: Elo.

Afonso: Luvuluku i dimosi muna mambu mefilanga alandi a Yesu mu zaya yo sadila nkumbu a Nzambi. Ekiaki mpe i kuma tuvovelanga nkumbu a Yave. Tuzeye wo vo diamfunu mu zayisa nkumbu a Nzambi yo sadisa akaka kimana yau mpe bavovela nkumbu andi.

Miguel: Kana una vo wantu ka bazeye nkumbu a Nzambi ko ngatu sadila yo, banzeye kadi bekumvovelanga.

Afonso: Dilenda kala dialudi. Kansi, wau vo Nzambi wasengomona nkumbu andi, ediadi dikutusadisanga muna kumfinama.

Miguel: Adieyi ozolele vova?

Afonso: Yindula eti: Nga mfunu kikilu diakala mu zaya nkumbu a Mose? Ekuma kayikilwa kaka ko vo muntu ona wavambula Mbu Ambwaki yovo watambula Nsiku Kumi? Diau adimosi mpe yo Noa, ekuma kayikilwa muna nkumbu  andi? Ekuma kalembi yikilwa vo muntu ona watunga nzaza yo vuluza mioyo mia esi nzo andi ye bulu? Avo i Yesu kristu, ekuma kayikilwa kaka ko vo muntu ona watuka kuna zulu yo fwa mu kuma kia masumu meto?

Miguel: I diau mpe iyindulanga.

Afonso: Kansi, Nzambi wazola vo twazaya nkumbu za wantu awaya. O zaya e nkumbu zau, dikutusadisanga mu kwikila muna lusansu lwau. Kana una vo katwamona Mose ko, Noa ngatu Yesu, o zaya e nkumbu zau dikutusadisanga mu kala ye ziku vo wantu akieleka bakala.

Miguel: Kiasidi yindula diambu diadi mu mpila yayi ko!

Afonso: Vena ye kuma kiakaka kifilanga Mbangi za Yave mu sadila nkumbu a Nzambi. Tuzolele sadisa wantu mu kwikila vo Yave wa Nzambi muntu akieleka ye balenda kumfinama. Kuna diak’e sambu, tusamunanga dina Yesu kevanganga muna luvuluzu lweto. Nga tulenda tanga diaka sono kiakaka muna toma bakula diambu diadi?

Miguel: Ingeta.

Afonso: Kuna lubantiku tutangidingi sono kia Yoane 14:6. Sungamena vo Yesu wavova vo yandi “i nzila, i ludi, i moyo.” Owau tutanga Yoane 14:1. Nga olenda tanga mvovo mia Yesu vana nsuka a sono kiaki?

Miguel: Ingeta, kivovele vo: ‘Nukwikila muna Nzambi, nukwikila mpe omu mono.’

Afonso: Ntondele. Nga muntu olenda kala yo lukwikilu lwakieleka avo okwikidi kaka muna Yesu yovo muna Yave?

Miguel: Nkatu. Yesu wavova vo tufwete kwikila muna yau awole.

Afonso: I wau kibeni. Kansi, okwikila muna Nzambi yo Yesu ke diau kaka ko divavwanga. Ozevo, tufwete zingila ngwizani yo lukwikilu lweto.

Miguel: Dialudi.

Afonso: Kansi, aweyi o muntu kalenda songela vo okwikilanga muna Nzambi yo Yesu? Se yavutuka lumbu kiakaka twavovela diambu diadi. *

Miguel: Ke diambu ko.