Nga ozolele zaya una e zingu kiaku kikala kuna sentu? Wantu ayingi bena yo luzolo lwalu. Wantu ayingi basakula mambu mesinga bwa ye melungananga mu mpila yaswaswana. Badika e nona ilende:

• AKWA NGANGU ZA NZA besadilanga masini ma mpila mu mpila ye nzimbu zayingi muna sakula mambu mayingi mevangama nze lufwasu lwa nza yo yika kana vo noka ku noka yovo ve.

• AFIMPI A MAMBU beyikanga mana mevangama muna yinkita, makompani ye tuyalu. Warren Buffett, mosi muna mvwama zitomene zayakana, oyikilwanga vo ngunza kadi olenda yika mana mevangama mu kuma kia yinkita ye makompani omu nza. Nate Silver, osakulanga mana mevangama muna luyalu lwa Estados Unidos ye nsendo mivewa muna filme zivangwa kuna Hollywood.

• LEKWA YANKULU ibadikilwanga mpe vo ungunza. Ayingi bekwikilanga vo mana mevangamanga o unu mateka sakulwa muna nkand’a Michel de Notredame (Nostradamus) muna tandu kia 16. Manaka ma Maya masakula vo e nza ifwaswa kina kia 21 kia ngonde a Desemba ya mvu wa 2012, wantu ayingi bakwikila muna diambu diadi.

• AFIDI A MABUNDU ezak’entangwa besakulanga mambu mebwa mu nza yawonso muna lukisa wantu yo kutakesa alandi. Harold Camping wa ngunza a lumbu kia lufundisu ye alongoki andi basakula vo e nza mu mvu wa 2011 yadi fwaswa. Kansi, e nza ke yafwaswa ko yamu unu.

• AKWA MPANDU bevovanga vo bena ye ngangu za sakula mana mevangama kuna sentu. Edgar Cayce yo Jeane Dixon basakula mambu madi vangama muna tandu kia 20. Basakula mambu mayingi ke malungana ko. Kasikil’owu, Dixon wasakula vo e Vita ya Tatu ya Nz’amvimba mu mvu wa 1958 yadi bwa. Cayce wasakula vo e mbanz’a Nova York mu kalunga yadi dimuka muna mvu mia 1970.

Nga vena ye mpila ya zayila mana mevangama kuna sentu? E kiaki kiuvu kia mfunu. Kele vo wakala ye ngangu za zaya mana mebwa kuna sentu, e zingu kiaku kiaswaswana kiadi kala.