Nga Diamfunu mu Zay’e Mvutu?

‘Nuzay’e ludi, e ludi kikunuvevola.’​—YOANE 8:32.

MUNA Nkand’a Nzambi muna ye ludi kilenda kutuvevola muna malongi mayingi maluvunu melongwanga mu kuma kia Yesu. Nga mana tukwikilanga mu kuma kiandi mfunu kikilu mena? Elo, mfunu mena kuna kwa Yave, kuna kwa Yesu ye mafwete mpe kala mfunu kwa yeto.

● Ekuma dinina diamfunu kwa Yave? E kuma kadi “Nzambi i zola.” (1 Yoane 4:8) Yave ozolele vo twazinga ye kiese yakwele mvu. Yesu wavova vo: “Muna nzola kazolele nza [ya wantu] o Nzambi i kavanin’o Mwan’andi amosi, kimana konso on’okwikilanga muna yandi . . . moyo a mvu ya mvu kevwa.” (Yoane 3:​16) Nzambi wafila Mwan’andi muna kutuvuluza yo ziula e nzila kimana twavwa o moyo a mvu ya mvu muna Paradiso ova ntoto, mun’owu w’ekani diandi diantete. (Etuku 1:​28) Nzambi ozolele vana lukau lwa moyo a mvu ya mvu kw’awana belongokanga e ludi mu kuma kia Mwan’andi yo zingila e ngwizani ye mana belongokanga.​—Roma 6:23.

● Ekuma dinina diamfunu kwa Yesu? Yesu mpe ozolanga o wantu. Wasonga e nzol’a mvevo muna vana o moyo andi mu kuma kieto. (Yoane 15:​13) Wazaya wo vo yandi kaka i nzil’a luvuluku. (Yoane 14:6) Nga tufwete sivika mu zaya vo Yesu ozolele vo wantu ayingi bavwa nluta mia kimenga kiandi kia lukûlu? Ekiaki i kuma katumina alandi andi benda longa wantu mu nza yawonso mu kuma ki’ekani ye luzolo lwa Nzambi.​—Matai 24:14; 28:​19, 20.

● Ekuma dinina diamfunu kwa yeto? Yindula mambu obadikilanga vo mamfunu nze vimpi yovo yitu yaku. Nga ozolanga kala ye vimpi ye zingu kiambote kumosi ye yitu yaku? Yave muna Yesu okuvananga kumosi ye azolw’aku e vuvu kia kala ye vimpi wambote ye moyo wa mvu ya mvu muna nz’ampa, muna ke mukala diaka mayela ko ngatu mpasi. (Nkunga 37:​11, 29; Lusengomono 21:​3, 4) Nga oyangalela zingila mu nza ya mpila yayi? Avo i wau, vena ye diambu ofwete vanga.

Badika diaka e sono kilandidi o ntu a diambu w’elongi diadi: ‘Nuzay’e ludi, e ludi kikunuvevola.’ E ludi mu kuma kia Yesu ye fulu kiandi muna ndungana ekani dia Nzambi kilenda kutuvevola muna ubundu w’esumu ye lufwa. Kansi, muna vwa luvevoko lwalu, ofwete ‘zaya e ludi.’ Kala y’etima dia longoka mayingi mu kuma kia ludi kiaki yo zaya e nluta olenda vwa kumosi ye azolw’aku. Mbangi za Yave bekala ye kiese kia kusadisa.