Nga Mvutu za Kiuvu Kiaki Mfunu Zina?
Nga Mvutu za Kiuvu Kiaki Mfunu Zina?
“Mvu kumi yakala miau vava yayantika vaika ye matoko. Kuna lubantiku, mu moko kaka twasimbananga yo fibaziana. Ke vavioka kolo ko, twayantika simbaziana e yîkwa yakaka yo kuyivana muna mavangu mansoni. Vava yalungisa mvu 15, yayantika sala yo zolwa kwa wan’amakala ana bavavanga vukana yame. Edi yazolanga, yamoneka vo i nkwa unkabu. Ediadi diamfilanga mu yantika tanginina mawonso mavanganga akundi ame a salu. Yazolanga vo yayangalelwa kw’akundi ame. Muna kuma kiaki, yayantika kuyivana muna mavangu ma mpila mu mpila mansoni.”—SARAH, * AUSTRÁLIA.
NGA dikusivikisa mu zaya vo Sarah mu nzo y’Akristu kasansukila? Mase mandi bavavanga kunlonga o mfunu wa zingila e ngwizani ye nkanikinu mia Nkand’a Nzambi. Kansi, Sarah wasola nzila yakaka.
Ndonga balenda yindula vo Sarah nzengo zambote kabaka. Bebanzanga vo nkanikinu mia Nkand’a Nzambi mu kuma kia vukana miaviokela e ntangwa. Akaka bevovanga vo ke diambi kwandi ko dia kala Nkristu yo kuyivana mu mavangu ma zumba.
Nga diamfunu mu zaya yo lemvokela dina Nkand’a Nzambi ulonganga mu kuma kia vukana? Nkand’a Nzambi ‘wavumunwinwa kwa Nzambi, una yo mfunu mpe muna longa.’ (2 Timoteo 3:16) Avo okwikilanga vo Nzambi wavanga o wantu, o Nkand’a Nzambi i Diambu diandi diavumunwinwa, dikala diamfunu mu zaya dina kevovanga mu kuma kia vukana.
Diankenda kikilu vo, ndonga bekalanga ye ngindu zabendomoka mu kuma kia dina o Nkand’a Nzambi uvovanga mu kuma kia vukana. E mfumu za mabundu ana bevovanga vo Nkand’a Nzambi bezitisanga, ngindu zaswaswana belonganga mu kuma kia vukana. Kieleka, e diambu diadi mabundu divambulanga.
Vana fulu kia kwikila dina wantu akaka bevovanga, ekuma olembi vaulwila e ntangwa kimana ngeye kibeni watoma fimpa diambu diadi? Elongi dilanda difimpa mvutu za Nkand’a Nzambi za yuvu kumi itoma yuvulwanga mu kuma kia vukana. Elongi diadi divana mvutu zasikididi, zisonga dina Nkand’a Nzambi ulonganga. Elongi diansuka muna malongi mevovela diambu diadi disonga e kuma nzengo tubakanga zinina o mfunu.
[Mvovo Vana Yand’a lukaya]
^ tini. 2 Nkumbu yasobwa.
