Ekuma Longo Lufwilanga?

“Afarisi bezidi kuntonta [Yesu], oku vo, Nga diansongi edi, dia yakal’osindika nkaz’andi muna konso diambu e?”—Matai 19:3.

WANTU akaka muna lumbu ya Yesu bavava zaya kana vo longo lulenda zinga. Yesu wabavovesa vo: “Nga ke nwatanga wo ko, ovo, ona wabavanga kuna lubantiku eyakala yo nkento kabavang’e? ovovele mpe vo, Muna diambu diadi o’yakala kafwete yambwil’o s’andi yo ngw’andi, katatidil’o nkaz’andi; yau ewole bakala se nitu mosi. Ke bekala diaka nwole ko, se nitu mosi kaka. Dianu vo, kina kiayikakeswa kwa Nzambi, o muntu kavambanisa ko.” * (Matai 19:4-6) Ka lukatikisu ko, ekani dia Nzambi vo longo lwa zinga.

Muna nsi zayingi o unu, vana vena nkama wantu besompanga, tezo kia 40 ‘bevambananga’ yo vonda longo. Nga luludiku lwa Nkand’a Nzambi mu kuma kia longo ka luna diaka mfunu ko? Wau vo longo lufwanga, nga disonganga vo e nkubik’a longo ke yasikila ko?

Badika nona eki: Akala wole y’akazi au basumbidi makalu ma ntindu mosi. Yakala dimosi yo nkaz’andi betoma lunga-lunganga ekalu diau yo diatisila dio una ufwene. Ekalu diau ke difwidi ko. Yakala diakaka yo nkaz’andi ke betoma lunga-lunganga kalu diau ko yo diatisila dio mu mpila yambi. Ekalu difwidi yo bembola dio. Nani una ye kuma? Ekalu yovo mfumu ekalu? Ka lukatikisu ko, o mfumu ekalu i nkwa kuma.

Diau adimosi, wau vo tongo twayingi tufwanga ke disonganga ko vo e nkubik’a longo ke yasikila ko. E ziku kia diambu diadi kimonekanga muna tongo twayingi tusikilanga. O tongo twatu tuvananga kiese ye zingu kiasikila kwa wantu, esi nzo ye mbanza. Kansi, nze ekalu o longo muna zinga, vangululwa yo lungwa-lungwa luvavanga.

Diakala awana basompele ke kolo ko yovo awana basompa tuka mvu miayingi, luludiku lwa Nkand’a Nzambi lusadisanga mu tomesa yo kumika longo. Tala nona yakaka muna makaya malende.

[Mvovo Vana Yand’a lukaya]