Nki i Mwand’avelela?

LUMBU kimosi Yesu wayuvula alongoki andi vo: “Nki’ese vava nwina, dilombwa mbolo kwa mwan’andi, kakumvan’etadi? ovo mbizi a maza, oyandi kayambula mbizi a maza, kamvan’e nioka? Ovo diaki kelombwa, kakumvana nkutu?” (Luka 11:​11, 12) Yingyana-ngyana ya zunga kia Ngalili, maki bazolanga dia ye mbizi za maza; ekiaki i kuma bakwamanenanga lomba kwa mase mau e lekwa ina bazolanga.

Yesu wavova vo tufwete kwamanana lomba mwand’avelela nze una mwana una ye nzala kelombelanga madia. (Luka 11:​9, 13) Avo tubakwidi kana nki i mwand’avelela dilenda kutusadisa mu zaya o mfunu una muna zingu kieto. Yambula twateka fimpa dina kelonganga Nkand’a Nzambi mu kuma kia mwand’avelela.

“Nkum’a Mpungu”

Nkand’a Nzambi utoma kiesesanga vo mwand’avelela i nkuma kesadilanga Nzambi mu vanga luzolo lwandi. Vava mbasi Ngambiele kazayisa Maria vo mwana kewuta, kana una vo mwenze kakala, mbasi wamvovesa vo: “O mwand’avelel’okuyiza, o nkum’a Mpungu ukuyitalela; muna wau, eki kiwutwa kiyikilwa vo kiavelela, Mwan’a Nzambi.” (Luka 1:​35) E mvovo mia Ngambiele misonganga vo mwand’avelela ye “nkum’a Mpungu-ngolo” ngwizani una.

Vena ye sono yakaka ya Nkand’a Nzambi yisonganga e ludi kia diambu diadi. Mika wa ngunza wavova vo: “Ngolo zame zalunga muna mwand’a Yave.” (Mika 3:⁠8) Yesu wa sia nsilu kw’alongoki andi vo: “Oyeno nutambula nkuma, vava kekunuyiz’o mwand’avelela.” (Mavangu 1:⁠8) Paulu wa ntumwa wavovela “muna ngolo za mwand’avelela.”​—⁠Roma 15:​13, 19.

Adieyi tulenda vova muna mvovo miami? Mwand’avelela ye nkum’a Nzambi ngwizani kikilu una. Nzambi mwand’avelela kesadilanga mu songa nkum’andi. Muna mvovo miakia, o mwand’avelela i nkum’a Nzambi yovo ngolo za Nzambi. Ekwe mpila nkuma kavwidi o Nzambi! Katulendi bakula ko e nkuma kasadila mu sema e lekwa yawonso. Muna Yesaya wa ngunza, Yave okutuvovesanga twabadika edi: “Nusengola meso muna kayé, nwamona nani osemene yayi yawonso, ovaikisanga vu kiau kiawonso muna nkumbu; muna nene wa nkum’andi, wau vo nkwa mpamu mun’efuka, ke vakondelo mosi ko.”​—⁠Yesaya 40:⁠26.

Muna kuma kiaki, Nkand’a Nzambi usonganga vo muna lusadisu lwa “nkuma” a Nzambi wa Mpungu-ngolo, o nsema watoma kubikwa ye mawonso mevangamanga mo ngwizani mena. Dialudi vo e ngolo za Nzambi kazina nsuka ko ye muna kuma kia ngolo zazi i tunina o moyo.​—⁠Tala e babu “Salu kia Mwand’avelela.”

Yave olenda sadila mwand’andi avelela mu mpila zayingi nze vava kasema e nza. Wasadila wo mpe vava kasema o wantu. Muna Nkand’a Nzambi muna ye nona yayingi  yisonganga una ngolo za Nzambi zikumikinanga selo yandi ova ntoto.

“O Mwand’a Yave Wina Yame”

E salu kia Yesu ova ntoto, kilenda kutusonga e mpila mwand’avelel’a Nzambi ulenda kumikina e selo yandi. Yesu wavova kwa nkangu a Nazarete vo: “O mwand’a Yave wina yame.” (Luka 4:​18) O Yesu adieyi kavanga muna “ngolo za mwanda”? (Luka 4:​14) Wawuka mpila zawonso za mayela, walembeka e tembwa kia mbu, wadikila nkangu muna mbolo ye mbizi zamaza zakete yo fula mafwa. Petelo wa ntumwa wayikila Yesu vo ‘i muntu twasongwa kwa Nzambi muna mavangu ma nkuma yo masivi ye sinsu, ina  kavangil’o Nzambi muna yandi.’​—⁠Mavangu 2:⁠22.

O mwand’avelela ke uvanganga diaka masivi mama ko o unu. Kansi, ulenda vanga mambu m’esivi kuna kwa yeto. Yave muna zola kwawonso, ovananga mwand’andi avelela kw’asambidi andi nze una Yesu kakanikina alongoki andi. (Luka 11:​13) Muna kuma kiaki, Paulu wa ntumwa wavova vo: “Nlenda vanga mawonso muna ndion’okunkùmikanga.” (Filipi 4:​13) Nga mwand’avelela ulenda mpe vanga ediadi muna zingu kiaku? Elongi dilanda divana e mvutu za kiuvu kiaki.

[Foto ina muna lukaya lwa 5]

Photodisc/SuperStock

[Foto ina muna lukaya lwa 5]

Nkand’a Nzambi utezanesanga mwand’avelela ye maza. Vava Nzambi kasila nsilu kwa nkangu andi vo okubasambula, wavova vo: “Mpongola maza ma nkw’evwina, ye nkoko vana ntoto ayuma; mpongola mwand’ame muna mbongo aku, ye nsambu muna wutwa yaku.”​—⁠Yesaya 44:⁠3.

Vava Nzambi kapongola mwand’andi kwa selo yandi, ‘bazala yo mwand’avelela.’ Yesu, Yoane wa Mvubi, Petelo, Paulu, Banaba y’alongoki ana bakutakana vamosi muna lumbu kia Pentikosti a mvu a 33 wa tandu kieto, awonso beyikilwanga vo bazala yo mwand’avelela.​—⁠Luka 1:15; 4:1; Mavangu 4:8; 9:17; 11:​22, 24; 13:⁠9.

Yindula ediadi: Nga muntu olenda kwandi ‘zala’ muna wantu? Nga muntu olenda ‘pongolwa’ muna buka kia wantu? Kadilendakana nkutu ko. Nkand’a Nzambi uyikanga wantu bazala ye ngangu, umbakuzi yovo zayi wa ludi, kansi ke uyikanga kana nkutu muntu mosi ko wazala yo nkw’andi muntu.​—⁠Luvaiku 28:3; 1 Ntinu 7:14; Luka 2:40; Kolosai 1:⁠9.

E mvovo wa Kingerekia wasekolwa vo “mwanda” i pneuʹma, ulenda songa mpe vo nkuma ulembi moneka. Muna Dicionário Expositivo de Palavras do Novo Testamento ya Vine, e mvovo wau pneuʹma “usongele vo tembwa . . . fulumwinu, diau adimosi mpe ye mwanda una nze tembwa, ke umonekanga ko, ke lekwa ko kansi nkuma.”

Dia ludi vo, o mwand’avelela ke muntu ko. *

[Mvovo Vana Yand’a lukaya]