Aweyi Olenda Bakulwila Nkand’a Nzambi

1. Lomba Lusadisu lwa Nzambi

Ninfa on’ozingilanga kuna Itália wavova vo: “Vakala ye ntangwa yatanganga Nkand’a Nzambi una kialele ko. Yavanganga wo kadi yazaya wo vo nkanda wau i Diambu dia Nzambi. Kana nkutu vo kiayangalelanga mana yatanganga ko, yazolanga zaya mana Nzambi kasoneka muna Nkand’andi. Yakala ye ngindu za tanga Nkand’a Nzambi wawonso. Kuna lubantiku, yamona vo ke wakala wampasi ko mu bakulwa, kansi vava yalwaka mu fulu yakala yampasi mu bakula, yayambula wo tanga.”

NGA dina diabwila Ninfa i diau mpe divangamanga kwa ngeye? Ediadi dibwilanga wantu ayingi. Kansi, nze una tumwene mun’elongi divitidi, Yave wa Nzambi wa Nsonekesi a Nkand’a Nzambi ozolele vo wabakula e Diambu diandi. Aweyi olenda wo bakulwila? Diantete i lomba lusadisu kwa Ndiona wasonekesa wo.

E ntumwa za Yesu babadikilwanga vo “balembi longwa” kadi kebatanga sikola za kirabi ko ngatu longwa kwa afidi a nsambila. (Mavangu 4:​13) Kansi, o Yesu wabasikidisa vo balenda kwau bakula e Diambu dia Nzambi. Mu nkia mpila? Yesu wavova vo: “O nsadisi, wa mwand’avelela, ona otuminwa kwa Se muna nkumbu ame, yandi okunulonga mawonsono.” (Yoane 14:​26) Nzambi wasadila mwand’avelela yovo ngolo zandi mu sema ntoto ye lekwa yawonso ya moyo ina mo. (Etuku 1:⁠2) Wasadila mpe mwanda wau muna vumunwina 40 ma wantu ana basoneka ngindu zandi muna Nkand’a Nzambi. (2 Petelo 1:​20, 21) O mwanda wau usadisanga mpe awana bevavanga bakula Nkand’a Nzambi.

Aweyi olenda tambulwila mwand’avelela a Nzambi? Ofwete wo lomba ye kwikizi kiawonso. Kieleka, ofwete wo kwamanana lomba. Yesu wavova vo: “Nulomba, ozevo nuvewa; nuvava, ozevo nusolola; nudoda, ozevo nuziulwilwa. . . . Ovo nuzeye o vana tukau twambote kwa wan’eno, o Tata kun’ezulu, nkia nduta kelut’o van’o mwand’avelela kw’awana bekunlomba.” (Luka 11:​9, 13) Kuna mvevo wawonso, Yave ovananga mwand’avelela kw’awana belombanga wo ye kwikizi. E ngolo zazi za Nzambi, zilenda kusadisa mu bakula mvovo miavumunwinwa mia Nkand’a Nzambi emi miasonekwa vioka mafunda ma mvu. Mwand’avelela a Nzambi ulenda kuvana ngangu za sadila mana olongokanga muna Nkand’a Nzambi muna zingu kiaku.​—⁠Ayibere 4:12; Yakobo 1:​5, 6.

Konso ntangwa otanganga Nkand’a Nzambi, sambanga kwa Nzambi mu lomba mwand’avelela wasadisa mu bakula Diambu diandi.