E KOLO tuzingilanga i kisundidi e mpasi muna lusansu lwawonso lwa wantu. (2 Tim. 3:1-5) O zola kweto muna Yave ye luzolo lweto lwa lemvokela nkanikinu miandi miansongi lutontwanga e lumbu yawonso. Yesu wazaya wo vo e lumbu yambaninu yampasi kikilu ikala. Muna kuma kiaki, wasia o nsilu kw’alongoki andi vo okubavana lukasakeso bevwa o mfunu kimana bazizidila yakuna mbaninu. (Mat. 24:3, 13; 28:20) Muna kubakasakesa, Yesu wasola ntaudi akwikizi kimana kabavananga ‘madia ma mwanda muna ntangwa ifwene.’—Mat. 24:45, 46.

Tuka kasolela ntaudi akwikizi muna mvu wa 1919, ulolo wa “esi nzo” betukanga mu ndinga zawonso bekutakeswanga muna nkubik’a Nzambi yo tambula madia ma mwanda. (Mat. 24:14; Lus. 22:17) Kansi, ke nkanda miawonso ko mivaikiswanga mu ndinga zawonso, ye ke wantu awonso ko belendanga tanga nkanda mieto muna nzil’eto ya Internete. Kasikil’owu, ndonga ke bena ye vídeo ko yovo malongi mevaikiswanga kaka muna jw.org. Nga diadi disongele vo Akristu akaka ke betambulanga madia mawonso ko ma mwanda bavwidi mfunu? Muna baka e mvutu, yambula twabadika yuvu yá yamfunu.

Vava Satana katonta Yesu mu kitula matadi se mbolo, Yesu wavutula vo: “Ke mu dia kaka ko i kazingila muntu, kansi mu konso edi divaikidi omu nu’a Nzambi.” (Mat. 4:3, 4) E mvovo mia Yave miasonama muna Nkand’a Nzambi. (2 Pet. 1:20, 21) Muna kuma kiaki, o Nkand’a Nzambi i lekwa kiantete kina muna madia ma mwanda tutambulanga.—2 Tim. 3:16, 17.

E nkubik’a Yave ivaikisanga Tradução do Novo Mundo das Escrituras Sagradas yamvimba yovo ndambu mu vioka ndinga 120. Ndinga zayingi zikulamanga konso mvu. Vana ntandu a nsekola yayi, nsekola zakaka za Bibila zivaikiswanga mu ndinga zayingi. Ediadi ngwizani dina ye luzolo lwa Yave vo ‘wantu a mpila zawonso bavuluzwa, yo luaka muna visa kia zay’e ludi.’ (1 Tim. 2:3, 4) Wau vo ‘ke vena nkutu vangwa kilembi moneka vana ndose a [Yave] ko,’ tulenda kala ye ziku vo otunta awana ‘bezayanga e nsatu zau za mwanda’ muna nkubik’andi yo kubavana madia ma mwanda.—Ayib. 4:13; Mat. 5:3, 6; Yoa. 6:44; 10:14.

Muna kala ye lukwikilu lwasikila, muntu kafwete tanganga kaka Bibila ko. Kafwete mpe bakulanga yo sadila mana kelongokanga. (Yak. 1:22-25) I diau kavanga o Ntiopia muna tandu kiantete. Vava Filipo wa nteleki kamona muntu ndioyo watanganga Diambu dia Nzambi, wanyuvula vo: “Ng’ozeye momo otangidi e?” O Ntiopia wavutula vo: “Nkia nzaya ndenda mo zaya, ovo kisongelo mo kwa muntu ko?” (Mav. 8:26-31) Filipo wasadisa Ntiopia mu bakula mana katanganga. Umbakuzi wau wamfila mu lomba vo kavubwa. (Mav. 8:32-38) Diau dimosi, e nkanda mieto mikutusadisanga mu bakula e ludi kina muna Diambu dia Nzambi. Mana tutanganga mesimbanga kikilu ntima mieto yo kutufila mu sadila mana tulongokanga.—Kol. 1:9, 10.

Wau vo tu selo ya Yave, e nkanda mieto mikutuvananga lekwa yayingi ya mwanda ina tufwete dianga yo nua. (Yes. 65:13) Kasikil’owu, Eyingidilu divaikiswanga mu ndinga vioka 210, disasilanga ungunza wa Nkand’a Nzambi, dikutusadisanga mu bakula ludi kiamfunu yo kutukasakesa mu zingila ngwizani ye nkanikinu mia Nzambi. Despertai! ivaikiswanga mu tezo kia ndinga 100. Finkanda-nkanda fiafi fikutusadisanga mu zaya mayingi mu kuma kia nsem’a Yave yo kutulonga una tulenda sadila tuludiku tuna muna Nkand’a Nzambi. (Nga. 3:21-23; Roma 1:20) O ntaudi akwikizi ovaikisanga nkanda misasilanga Nkand’a Nzambi mu vioka 680 lwa ndinga. Nga ovaulanga e ntangwa mu tanga Nkand’a Nzambi konso lumbu? Nga otanganga konso Eyingidilu ye Despertai! ye nkanda miawonso miampa mivaikiswanga konso mvu muna nding’aku?

Vana ntandu a vaikisa nkanda, e nkubik’a Yave ikubikanga mpe malongi mevovuanga muna nkutakani ye muna tukutakanu twampwena. Nga oyangalelanga malongi, fuka, nsongesela ye mbokena zikalanga muna tukutakanu twatu? Kieleka, Yave okutuvananga madia mayingi ma mwanda.—Yes. 25:6.

Ve. Ke difwete kutusivikisa ko avo selo yakaka ya Yave betambulanga madia ma mwanda lutila akaka. Ekuma? Badika nona ki’antumwa. Muna lumbu ya Yesu, antumwa tuludiku twayingi batambulanga lutila alongoki akaka. (Maku 4:10; 9:35-37) Kana una vo i wau, alongoki akaka ke bafwanga nzala za mwanda ko, batambulanga madia ma mwanda bavwanga o mfunu.—Ef. 4:20-24; 1 Pet. 1:8.

Diambote mu sungamena vo ke mawonso ko Yesu kavova yo vanga vava kakala ova ntoto masonama muna Nkand’a Nzambi. Yoane wa ntumwa wasoneka vo: “Vena mpe yo mambu mengi makaka, mana mavanga Yesu, mana mena vo, ovo masonama mawonso edi mbenze vo e nza kibeni ke ifwani nkanda miasonama ko.” (Yoa. 21:25) Akristu muna tandu kiantete mayingi bazaya mu kuma kia Yesu lutila nkutu yeto. Kana una vo i wau, ke tukondwanga má ko. Ekuma? E kuma kadi Yave ovanganga nkubika kimana twazaya mayingi mu kuma kia Yesu wa Mfumu eto yo landa mbandu andi.—1 Pet. 2:21.

Badika mpe nkanda mina batwikanga antumwa muna nkutakani za tandu kiantete. Umosi muna nkanda kasoneka Paulu ke wasiwa ko muna Nkand’a Nzambi. (Kol. 4:16) Nga diadi disongele vo ke tuna ye madia mafwana ko ma mwanda wau vo ke tuna ye nkanda wau ko? Ve. Yave ozeye mana tuvwidi o mfunu ye okutuvananga madia mafwana muna sikila muna mwanda.—Mat. 6:8.

O unu, selo yakaka ya Yave bena ye madia mayingi ma mwanda lutila akaka. Nga muna nding’aku ke muvaikiswanga nkanda miayingi ko? Avo i wau, zaya dio vo Yave okulunga-lunganga. Longokanga e nkanda una miau yo kwendanga muna tukutakanu twa ndinga ina obakulanga. Kala ye ziku vo Yave okusadisa mu sikila muna mwanda.—Nku. 1:2; Ayib. 10:24, 25.

Muna nzil’eto ya Internete, jw.org, tuvaikisanga yinkada-nkanda ye nkanda miakaka misasilanga Nkand’a Nzambi. Muna mpe ye malongi mesadisanga akazi, aleke yo wana. Esi nzo bebakanga nluta vava bebadikanga malongi mama muna Nsambil’au ya Esi Nzo. Vana ntandu, muna nzil’eto ya Internete, muna ye nsangu zamfunu nze za sikola ya Ngiladi, lukutakanu lwa konso mvu ye nsangu za sumbula ibwanga ye mambu ma mfundu mu kuma kia nkangu a Yave. (1 Pet. 5:8, 9) E nzil’eto jw.org sadilwa kiamfunu mpe muna sila umbangi, kisadisanga mu samuna nsangu zambote kana nkutu mu nsi zina zisimanga e salu kieto.

Kansi, olenda kwaku sikila muna mwanda kiakala vo otanganga malongi muna nzil’eto ya Internete yovo ve. O ntaudi akwikizi ovaikisanga nkanda miayingi kimana Akristu awonso batambula madia ma mwanda bavwidi mfunu. Muna kuma kiaki, kufwete yindula ko vo ofwete sumba kaka komputador yovo salanganu yakaka kimana watanganga nkanda mieto muna nzil’eto ya Internete, jw.org. Akaka balenda nieteka maka malongi mevaikiswanga muna jw.org yo vana mo kw’awana ke besadilanga Internete ko. Kansi, ke diasikidiswa ko vo e nkutakani zavanganga wo.

Tuvutulanga kikilu matondo kwa Yesu wau kelungisanga o nsilu andi wa kutuvana madia tuvwidi o mfunu mu sikila muna mwanda. Tuna ye vuvu vo Yave okwamanana kutuvana ‘madia ma mwanda’ yakuna mbaninu a nza yayi yambi.