NKAND’A NZAMBI uvovanga vo: “Wa, o wana s’ekau dia Yave: E mbongo a vumu i nsendo andi.” (Nku. 127:3) Ntangwa yakiese ikalanga kwa mase vava mwana kewutukanga.

Vana ntandu a kiese, o luwutuku lwa mwana mbebe yayingi lutwasanga. O mwana muna nungunuka yo vimpi wambote, kafwete toma dianga. Muna sikila muna nsambil’aludi, madia ma mwanda kevwanga o mfunu ye luludiku lwa mase ana besianga e ngolo za kunlonga nkanikinu mia Nzambi. (Nga. 1:8) Nkia ntangwa kafwete yantika longwa? Adieyi divavwanga?

Badika e nona kia Manoa wa mwisi kanda dia Anedani, ona wazingilanga muna mbanz’a Sora kuna Isaele yankulu. Mbasi a Yave wavovesa nkaz’a Manoa ona wakala vo sita vo owuta mwan’eyakala. (Afu. 13:2, 3) Kana una vo Manoa yo nkaz’andi bayangalala mu wá nsangu zazi, batokana mpe mu kuma kia dina bafwete vanga muna sansa mwan’au muna mpila yambote. Muna kuma kiaki, Manoa wasamba vo: “E Mfumu, yambula muntu a Nzambi ona watuma, keza diak’oku twina, katulong’edi twavanga kwa mwana, on’owutuka.” (Afu. 13:8) Manoa yo nkaz’andi balonga Samesone wa mwan’au e nsiku mia Nzambi. Samesone nanga walemvokela mana kalongwa. Nkand’a Nzambi ukutuvovesanga vo mwand’a Yave wasadisa Samesone mu vanga mambu ma nkuma nze mosi mun’afundisi a Isaele.—Afu. 13:25; 14:5, 6; 15:14, 15.

Nkia ntangwa mase bafwete yantika longa wan’au? “Tuka muna kinsedia,” Timoteo walongwa “e sono yavelela” kwa Yunike wa ngudi andi ye kwa Loi wa nkak’andi ankento. (2 Tim. 1:5; 3:15) Elo, Timoteo wayantika longwa e sono tuka muna kinsedia kiandi.

Diangangu kwa mase m’Akristu mu lomba luludiku muna sambu yo vanga nkubika kimana bayantika longa mwan’au “tuka muna kinsedia.” Muna nkand’a Ngana 21:5 tutanganga vo: ‘O makani ma nkwa fululu ndandu metwasanga, kansi konso nkwa nzaki-nzaki, kondwa kekondwa.’ Vitila mwan’au kawutuka, ka lukatikisu ko vo mase betoma kubamanga. Nanga besonekanga e lekwa ina mwana kevwa o mfunu. Diamfunu mpe mu vanga e nkubika za mpila belongela mwan’au oma ma Yave. Bafwete kala y’ekani dia yantika longa mwan’au tuka muna lumbu kewutuka.

Nkanda mosi usasilanga una mwana kenungunukinanga yamuna ntela kimbuta uvovanga vo e ngonde zina zilandanga vava mwana kewutukanga, i ntangwa ina tomfo twandi tusimbanga mambu mu nzaki. Muna kuma kiaki, diambote kwa mase mu sadila e ntangwa yayi mu longa mwan’au oma ma Yave ye nkanikinu miandi.

Mpangi mosi ankento una vo mviti a nzila wavova mu kuma kia mwan’andi ankento vo: ‘Yayendanga yandi muna salu kia umbangi vava kakala ye kimbuta kia ngonde mosi. Kana una vo kabakulanga ko dina diavangamanga, ngina ye ziku vo wabaka nluta muna kalanga yame entwadi muna salu kia umbangi. Vava kalungisa mvu miole, walendanga kaya e yinkanda-nkanda kw’awana twawanananga yau muna salu kia umbangi.’

Mase balenda vwa nluta muna longanga wan’au tuka muna kinsedia. Kansi, mase bazeye wo mpe vo ke diasazu ko mu vanga wo.

Wau vo diasazu dikalanga kwa wana mu yambula sia sungididi, dilenda kala diampasi kwa mase muna kubalonga. O wana bezolanga tala konso lekwa yo vava zaya mana bamwene. Adieyi mase bafwete vanga mu sadisa wan’au kimana basia e sungididi muna mana belongwanga?

Badika dina Mose kavova muna Nsiku 6:6, 7. Wavova vo: “O mambu mama, mana ikukanikin’o unu, makala muna ntim’aku: watoma mo longel’o wan’aku, wamokena wo vav’ofongele muna nzo, yovo se kiya yovo leka yovo sikama.” E mvovo wasekolwa vo ‘longela’ una ye nsasa vo, vutukila elongi nkumbu miayingi. O mwan’a kete una nze nti wakete uvavanga siwa o maza ntangwa zawonso. Nze una ambuta bebakulwilanga mambu vava mevutukilwanga nkumbu miayingi, o wana mpe belongokanga vava mvovo mivutukilwanga nkumbu miayingi.

Ntangwa divavanga kwa mase mu longa o wan’au e ludi mu kuma kia Nzambi. Kansi, dilenda kala diampasi kadi mase salu yayingi bekalanga yau. Paulu wa ntumwa ovovesanga Akristu vo basumbanga “e ntangwa” mu vanga mambu masundidi o mfunu. (Ef. 5:15, 16) Aweyi mase balenda wo vangila? Mpangi mosi una vo nkuluntu, o nkaz’andi mviti a nzila ngonde ke ngonde, basikidisa e ntangwa ina belonganga mwan’au ankento ye ntangwa besalanga e salu ya nkutakani ye salu yakaka. Nkia ntangwa belonganga mwan’au ankento? O se wavova vo: “Konso mene vitila ngyenda kuna salu, mono yo nkaz’ame tukuntangilanga lusansu lumosi muna nkanda Tusansu twa Nkand’a Nzambi yovo tanga yandi finkanda Fimpanga e Sono Lumbu Yawonso. Muna fuku, tukuntangilanga mpe vitila kenda leka ye tukwendanga yandi muna salu kia umbangi. Tuvanganga mawonso mu sadila konso elau muna kunlonga muna mvu miandi miantete.”

Tuzolele vo wan’eto bakala ye ngangu vava bekituka se ambuta. Kansi, e kuma kiantete tukubalongelanga i kubasadisa mu zola Nzambi ye nsi a ntim’au wawonso.—Maku 12:28-30.

Muna nkunga 127:4 tutanganga vo: “Owu wina nzanza vana koko kw’ekesa, i un’o wan’a toko.” O Nkand’a Nzambi utezanesanga wana ye nzanza ivavanga vo yatoma singikwa muna tela bulu. O nkongo kolo kiakete kaka kekalanga ye nzanza vana koko, ke ivutukanga diaka ko avo onongene yo. Diau adimosi mpe, amase kolo kiakete kaka bekalanga yo wan’au vitila bakituka se ambuta. Muna kuma kiaki, diamfunu kikilu kwa mase mu sadila ntangwa yayi mu longa wan’au mu zola yo lemvokela e nsiku mia Nzambi.

Yoane wa ntumwa wasoneka mu kuma kia wantu ana kasadisa mu kituka se asambidi a Yave vo: “Kina ya kiese kisundidi kiaki ko, kia wa vo wan’ame muna ludi i bekangadilanga.” (3 Yoa. 4) Mase m’Akristu balenda vova diau adimosi vava bemonanga vo wan’au “muna ludi i bekangadilanga.”