Muna Malundilu Meto

Lusansu lwa Peregrino

“KILENDI sila umbangi muna nzo ye nzo ko.” Alongoki ayingi ampa a Nkand’a Nzambi i wau beyindulanga vava bezayanga vo bafwete sila umbangi kwa wantu balembele zaya. Kansi, e mvovo miami mia mpovi wa zikuka ye nlongi a Nkand’a Nzambi wasalanga salu kia peregrino.

Atangi ayingi a Zion’s Watch Tower (Eyingidilu) bavaika muna mabundu mau, bakala ye luzolo lwa kutakana ye akw’au ana bayangalelanga ludi kia Nkand’a Nzambi. Finkanda-nkanda fiafi fiakasakesanga atangi kimana bavava akaka ana batambulwilanga eludi yo kutakananga muna longoka Nkand’a Nzambi. Tuka muna mvu wa 1894, e Sociedade Torre de Vigia yayantika fila akunzi muna kingula buka ina yavavanga lusadisu. Akunzi awaya bayikilwanga vo peregrino ye basalanga ye fululu kiawonso. O muntu muna solwa se peregrino, diavavanga vo kakala nlembami, toma zaya Nkand’a Nzambi, mpovi ambote, kala ye ndekwa za longela yo kwikila muna lukûlu. E nkingula ya peregrino muna konso buka, lumbu kimosi yovo lumbu yole yavanganga. Alongoki ayingi a Nkand’a Nzambi e nkumbu antete bavaikanga mu salu kia umbangi i lumbu kina bakayanga mboka z’elongi dia nkangu dia peregrino awaya. Kuna mfoko elongi diandi muna sikola, Hugo Riemer ona wakituka se mosi muna Buka kia Selo Yambuta, wavana mvutu za yuvu yawonso ya Nkand’a Nzambi kayuvulwa yamuna dingidingi. Kana una vo wayoya, watoma yangalala yo vova vo lukutakanu lwaluna lwa “lukasakeso” lwakala.

Eyingidilu diavova vo “ekani” dia nkingula za peregrino i kumika “esi nzo ana bakala ye lukwikilu” muna tukutakanu twavangamenanga muna nzo za minkwikizi. Alongoki a Nkand’a Nzambi muna zunga yakala lukufi bayizanga mu wá elongi dia nkangu ye dia yuvu ye mvutu. I bosi, Akristu basonganga fu kia tambula nzenza. Maude Abbott vava kakala dumbelele, wayenda wá elongi dia nkangu muna mene, i bosi awonso bayala meza vana yanzala. “Madia mayingi makala vo nze mbizi, nsusu ya kangwa, mbolo ye makaka mpe. Konso muntu mu yeto wadia yo yukuta, i bosi kuna masika twakutakana diaka mu wá elongi diakaka.” Kansi, Maude Abbott wavova vo: “Muna lukutakanu yeto awonso twayantika nimba.” Benjamin Barton wasala se peregrino mu mvu miayingi, lumbu kimosi wavova vo, ‘kele vo yadia madia mawonso yavewanga, nga kolo yayambula salu kia Peregrino.’ Kuna sentu, ampangi kuna vula diasina kuna Brooklyn basoneka nkanda mu kasakesa ampangi z’akento ana bakala ye fu kia tambula peregrino kimana “balambanga madia mavevoka mana badianga konso lumbu” ye “kubakubikila fulu kiambote kia leka.”

Peregrino ndekwa zambote za longela bakala zau, basadilanga fwaniswa, nona yovo konso lekwa bakala kiau muna toma kiesesa mambu. Mpangi Richard Harvey Barber, ntangwa zawonso wafilanga “malongi mandi mu mpila yambote.” Mpangi Fatherly Walter J. Thorn, wavovanga nze “akulu eto kuna nz’ankulu.” Lumbu kimosi, ekolo kakala mun’ekalu, Shield Toutjian wakaza vo, “ningama!” Wakulumuka yo vela mvuma. Wasadila mvuma zozo muna longa akw’andi diambu diamfunu mu kuma kia nsem’a Yave.

E nsobani muna salu kia peregrino, ntonta zayingi diatwasa kwa akaka, musungula kw’ambuta. Vava kia sobwa ekani dia salu kiau, akaka bakendalala. Diavavanga vo bavitang’o ntu muna salu kia samuna nsangu  zambote muna nzo ye nzo. Eyingidilu dia 15 kia ngonde Malusu ya mvu wa 1924 muna Kingelezo diavova vo, “o sila kintinu umbangi i mbuta diambu” muna salu ki’Akristu akieleka. “Diadi i’kani difidilwanga Peregrino.”

Peregrino ayingi bakendalala mu kuma kia nsobani yayi, akaka muna yau bayambula salu kia kingula buka yo soka mabundu ma yau kibeni. Mpangi Robie D. Adkins, wavova vo, peregrino mosi ona watoma longanga, wavova yo lukendalalu lwawonso vo: “O fila malongi muna tukutakanu i mpila ya sila umbangi kaka nzeye. Kilendi sila umbangi muna nzo ye nzo ko.” Mpangi Adkins wasungamena vo: “Yamona diaka mpangi ndioyo muna lukutakanu lwa mvivu lwa mvu a 1924, lwakala muna mbanz’a Columbus, Ohio Estados Unidos. Mpangi zawonso bakala ye kiese muna lukutakanu lwaluna, yandi kaka wakala mu kinsona yo telama yandi mosi kaka vana viozi kia finti. Tuka muna lumbu kiakina, kiamona diaka ko. I bosi, wayambula nkubika.” Kuna diak’e sambu, “mpangi zayingi banatanga nkanda muna makalu mau ye kiese kiawonso.” Bakala ye luzolo lwa sila umbangi muna nzo ye nzo.—Mav. 20:20, 21.

Kana una vo peregrino ayingi bakala yo wonga wa sila umbangi muna nzo ye nzo yo longa akaka, basalanga e salu kia umbangi ye kiese kiawonso. Mpangi Maxwell G. Friend (Freschel) ona wasala e salu kia peregrino muna ndinga y’esi Alemanha wasoneka mu kuma kia sila umbangi muna nzo ye nzo vo: “O sila umbangi muna nzo ye nzo, diakudikila nsambu muna salu kia kingula buka.” Mpangi John Adams Bohnet wavova vo ampangi batoma yangalalanga lukasakeso lwa samuna nsangu za Kintinu. Ndonga “bavitang’o ntu yo vema kwawonso muna salu kiaki.”

Tuka mvu miayingi, akengi a zunga ana besalanga ye kwikizi bekasakesanga ampangi muna nkutakani. Mpangi Norman Larson ona osadilanga Yave tuka kolo wavova vo, “ka lukatikisu ko, tuka muna kileke kiame imonanga salu kiamfunu basalanga peregrino. Mayingi bavanga mansadisa mu singika zingu kiame.” O unu, ampangi ana besalanga kuna mvevo se akengi a zunga, betoma sadisanga mpangi zau muna mwanda. E salu kiau kifilanga akw’au akwikizi mu vova vo: “Tulenda sila umbangi muna nzo ye nzo!”

[Mvovo mia Sina muna lukaya lwa 32]

Lumbu kiakiese kiakalanga vava peregrino balwakanga!

[Foto ina muna lukaya lwa 31]

Muna mvu wa 1905 Benjamin Barton buka 170 kakingula

[Foto ina muna lukaya lwa 32]

Walter J. Thorn ona wasala salu kia peregrino, wabadikilwanga nze Se muna kuma kia nkal’andi ya Kikristu

[Foto ina muna lukaya lwa 32]

Muna mvu wa 1902 J. A. Browne wafilwa se peregrino kuna Jamaica mu kasakesa yo kumika buka 14 yakete

[Foto ina muna lukaya lwa 32]

E salu kia peregrino kiavangamesa lukwikilu, kumika kintwadi kia Kikristu yo sadisa ampangi basikila muna nkubik’a Yave