‘O Yingila’ Ekuma Kwinina o Mfunu?

“NKI i sinsu mpe kia ngiz’aku, ye mbaninu a tandu?” (Mat. 24:3) Muna mvutu za kiuvu kiaki, Yesu wasonga kw’alongoki andi e sinsu kiakiá, kiasikididi, kina ke balendi vilakana ko, nze una wasonama muna Matai kapu kia 24, Maku kapu kia 13 ye muna Luka kapu kia 21. Wakudikila vo: “Nuyingila.”—Mat. 24:42.

Kele vo e sinsu kiatoma kiá kikala, ekuma Yesu kavovela vo “nuyingila”? Vena ye kuma yole. Kiantete, mambu mevunzanesanga e ngindu malenda fila muntu mu veza e sinsu, ediadi dilenda kunyoyesa muna mwanda yo yambula yingila. Diazole, o Nkristu olenda bakula diambu dimosi diayikwa muna sinsu, kansi wau vo ke divangamanga mu zunga kiandi ko, olenda dio veza. Muna kuma kiaki, olenda yindula vo e ‘mpasi zayingi’ zina vo i diambu diansuka muna ungunza wa Yesu, ke zikwiza wau ko ye ke dina mfunu ko mu kwamanana ‘yingila.’—Mat. 24:21.

“Ke Bazaya wo Ko”

Yesu wasungamesa alandi andi mu kuma kia wantu bazinganga muna lumbu ya Noa. O wantu bazaya wo vo Noa nsangu zambote kasamunanga yo tunga e nzaza. Bamonanga mpe umpumbulu wavangamanga. Kana una vo i wau, ‘ke basia sungididi ko.’ (Mat. 24:37-39) O unu, o wantu fu kia mpila yayi bekalanga kiau vava belukiswanga. Kasikil’owu, ayingi ke bezitisanga ko e tezo bafwete diatisila ekalu. Nkumbu miayingi, ayadi besianga nkaku muna nzila kimana anati a makalu balembi diatisila mu nswalu wasaka. Diau adimosi, o Nkristu olenda mona e sinsu kia lumbu yambaninu, kansi ke vanganga diambu ko mu soba e zingu kiandi. I diau diavangama kwa Arielle, nleke ozingilanga kuna Weste ya África.

Arielle wazolanga tala nsaka z’esomba dia moko za wan’amakento muna televizau. Vava bayantika kubika e buka kia tá esomba diadi kuna sikola, etima dia tá esomba diamfila mu vilakana e vonza dilenda twasa muna ngwizani andi yo Nzambi. Wakoteswa muna buka kiaki nze nkakidi (guarda-redes). Adieyi diavangama? Wavova vo: “Akaka muna akundi ame makangu bakala mau, ana banuanga diamba ye fomo. Bansevanga wau vo kiakala ye makangu ko. Kansi yabanzanga vo ke belenda kumvukumuna ko. Kuna kwalanda, e nsaka zazi zayantika fwasa kimwanda kiame. E nsaka z’esomba dia moko zakota muna ngindu ye ntim’ame. Muna tukutakanu tw’Akristu, nkumbu miayingi e ngindu zame zavaikanga mun’Eseka dia Kintinu yo kwenda kuna yanzala kia nsaka. E kiwuntu kiame mpe kia Kikristu kiasoba. Vana fulu kia tá esomba muna sakana, etima dia sunda akaka diakituka se diambu disundidi o mfunu. Muna kuma kiaki, yaviokesanga ntangwa yayingi mu toma kubama. Ediadi diantovolanga kikilu. Yayantika nkutu veza akundi ame mu kuma kia nsaka.”

Kansi, diambu dimosi diavangama ekolo batanga esomba diamfila mu toma kuyifimpa. E  buka kiakaka kiavewa nswa wa tá penalidade kuna ndambu au mu kuma kia mpilakanu bavanga. Arielle wasolwa mu kakila esomba dialembi kota. Wavova vo: “Lembi teka badika, yasamba kwa Yave kansadisa kimana esomba dialembi kota.” E diambu diadi diamfila mu yindula una e nsaka zafwasila e ngwizani andi yo Yave. Adieyi kavanga?

Wavova vo: “Yatala e DVD Os Jovens Perguntam—O Que Fazer da Minha Vida? * Yabaka e nzengo za tala yo diaka kansi, o nkumbu wau ye sungididi kiawonso. Yazaya wo vo e diambu diakala yo André oyikwanga muna DVD, i diau mpe yakala diau. Yasia e sungididi muna dina nkuluntu mosi kavovesa André vo katanga yo badika e sono kia Filipi 3:8. I diau mpe yavanga. I bosi, yakatuka muna buka.”

“Ediadi diasoba e zingu kiame. E fu kia vava sunda akaka kiafokoka kumosi yo tokana kwasaka. Diantwasila kiese kiayingi yo finama diaka akundi ame Akristu. Yavutukila sia e salu ya mwanda vana fulu kiantete. Yayantika diaka sia e sungididi muna tukutakanu yo yangalela to. Yawokesa mpe e salu kiame kia umbangi. Owau, nkumbu miayingi isalanga se mviti a nzila a nsadisi.”

Avo nsaka zikufilanga mu veza e sinsu kayika o Yesu, diambu ofwete vanga nze una Arielle kavanga. Tez’o vanga mambu malende: Vavulula muna Índice das Publicações da Torre de Vigia, ina iyikilwanga vo nkanda wa vavila tusalu twaswekama. Isonganga e fulu olenda sololwela malongi mambote ye lusansu lwa wantu ana bawanana ye mambu mampasi nze ngeye. Olenda vwa e nluta muna tukutakanu tw’Akristu muna toma kubika malongi yo soneka mambu mamfunu. Akaka bezolanga fonga vana nkunda yantete kimana batoma sia sungididi muna mambu mevovwanga. Vava mpovi keyuvulang’e yuvu kwa nkangu, sia e ngolo za vana mvutu zantete. Vana ntandu, kala walungalala muna mwanda muna tezanesanga mambu mampa mana Yesu kayika muna sinsu mebwanga o unu ova nza ye ungunza wakaka mu kuma kia “lumbu yambaninu.”—2 Tim. 3:1-5; 2 Pet. 3:3, 4; Lus. 6:1-8.

“Nukubama”

E sinsu kia lumbu yambaninu kimonekanga mu “nza yawonso.” (Mat. 24:7, 14) Wantu ayingi o unu bemonanga mpasi mu kuma kia yimbevo, mvengele, nzakama za ntoto ye mambu makaka mayikwa muna ungunza. Nswaswani ye wantu awaya, ndonga bezingilanga muna zunga ya luvuvamu. Avo kumonanga mambu mawonso ko mena muna sinsu, nga ediadi difwete kufila mu yindula vo e mpasi zayingi ke zikwiza wau ko? Ke diangangu ko mu kala ye ngindu za mpila yayi.

Kasikil’owu, badika dina Yesu kasakula mu kuma kia “mvengele ye vuku.” (Luka 21:11) Diantete, o Yesu kavova ko vo mambu mama mu fulu yawonso mekala yovo mu kolo kimosi mevangama. Kansi, edi kavova vo mambu mama mevangama “muna mwakàkakàka.” Muna kuma kiaki, ke tulendi vingila ko vo mambu mama mavangama muna fulu yawonso ye mu kolo kimosi. Diazole, una kayika mvengele, Yesu wasonga vo akaka mun’alandi andi bafwete keba e fu ki’eloko. Wavova vo: ‘Se nutomi kulunga-lunga kweno, e ntima mieno mialembi zemboka yo wuyana mu kuma kia dia.’ (Luka 21:34) Muna kuma kiaki, Akristu awonso ke  bafwete vingila ko vo mambu mawonso mena muna sinsu mababwila. Yesu wavova vo: “Ovo numwene mambu mama mavangamene, nuzaya wo vo e kintinu kia Nzambi kifinamene.” (Luka 21:31) E nzila z’amwangi a nsangu mu lumbu yeto zikutusadisanga mu mona mambu mawonso mena muna sinsu, kana nkutu vo ke mavangamene mu zunga kieto ko.

Sungamena mpe vo Yave wasikidisa e ‘lumbu ye ola’ iyantika e mpasi zayingi. (Mat. 24:36) E mambu mebwanga ova ntoto ke malendi soba lumbu kiaki ko.

Yesu walukisa Akristu muna fulu yawonso vo: “Nukubama.” (Mat. 24:44) Tufwete kalanga twakubama ntangwa zawonso. Dialudi vo ke tulendi sala salu ya nkutakani ko lumbu yawonso. Vana ntandu, ke mosi ko mu yeto ozeye kana va nkia salu kewanuka vava kiyantika mpasi zayingi. Akaka ku mpatu bewanuka yovo mu salu ya nzo. (Mat. 24:40, 41) Muna kuma kiaki, adieyi tulenda vanga mu kala wakubama?

Mpangi Emmanuel yo nkaz’andi Victorine kumosi ye wan’au sambanu amakento bezingilanga ku zunga kimosi kia África, ke bemonanga mambu mawonso ko mena muna sinsu ya lumbu yambaninu. Muna kuma kiaki, babak’e nzengo za mokenanga oma ma Nkand’a Nzambi e lumbu yawonso kimana bakala bakubama. Emmanuel wavova vo: “Diampasi diakala mu solola ntangwa yambote kwa yeto awonso. I bosi, twasola ola yasambanu yamuna ola yasambanu ye miniti makumatatu muna mene. Tuyantikilanga muna sono kia lumbu, i bosi tukubikanga tini ya nkanda tulongoka muna nkutakani muna lumingu lwaluna.” Nga e nkubika yayi ikubasadisanga mu kala wakubama? Elo. Mpangi Emmanuel yandi i mfidi a buka ki’akuluntu muna nkutakani. O nkaz’andi Victorine nkumbu miayingi kesalanga nze mviti a nzila ansadisi yo sadisa wantu ayingi mu zay’e ludi. O wan’au amakento yau awonso betoma kuyivananga muna salu ya nkutakani.

Yesu watulukisa vo: “Nutoma tala, nuyingila.” (Maku 13:33) Kufwete yambula konso diambu ko diafila mu lembi yingila. Lemvokelanga malongi mambote tuwanga muna tukutakanu ye muna nkanda mieto, nze una Arielle kavanga. Nze esi nzo ya mpangi Emmanuel, konso lumbu vavanga vanga diambu mu songa vo wakubama wina yo ‘yingila.’

[Mvovo Vana Yand’a lukaya]

[Mvovo mia Fwaniswa mina muna lukaya lwa 4]

O mokena oma ma Nkand’a Nzambi e lumbu yawonso disadisanga Emmanuel y’esi nzo andi mu kala ‘bakubama’